मूल स्यूस्स्यायूजे कामजे किताब 7 - घले नयाँ करारस्तिफनसदे चेब भाषण 1 होर्दे पात्ता केन् पूस्र्यादे स्तिफनसने लोत्दे, “च अम्ब पो ठीक औ?” 2 स्तिफनसदे यदे, “अत-च्योन्यू, पयू, ङैजे पो ङ्यीनो! महिमाजे परमेश्वरदे ङीनजे मेमे अब्राहामने ङू हारानने टूङयली खूम् मेसोपोटामियाने ख्यङ्ब दर्शन पीन ख्य, 3 मेस्ये ङूने य ख्य, ‘नैजे रङ्से देश प्रे रङ्से मीयू पोङ्गीदेबे ङैदे कम्ब देश नने तन्क्य, हैयानेने न प्र।’ 4 “होर्दे ङू कल्दीयूजे देशदे योङ्देबे हारानने रदेबे टूङ्दे, मेस्ये ङूजे प सीयेमेस्ये परमेश्वरदे ङूने हैयादे अम्ब मुलुकने सर्दीबीदे, अन्-याने दीनी नमयू बास टून ख्यङ्। 5 ङूने हम्ब नेने सीर-सम्पत्ति अम्पीन्। स-क्यूजे फाच्यात्या पीनब मोने प्रेनूस्य, तोप् छ्यप नेत्याये अम्पीन्। तर अब्राहामजे छगूम्-पूर्गूम् त्वोलीने हम्ब सीर-सम्पत्ति परमेश्वरदे ङूजे छगूम्-पूर्गूम्यूने रङ्सेजे सीर-सम्पत्तिजे रूप्ने पीन्क्य यदेबे कबुल चीत्दे। 6 परमेश्वरदे येर्बे यदे, ‘नैजे छगूम्-पूर्गूम् मीजे मुलुकने प्रदेबे टूङ पर्दीय, मेस्ये थमयूदे थेमयूने त्वो-त्वोम बन्दीदेबे सै स्यी वर्ष सेमे अन्ज्य चीत्देबे येक्क्य।’ 7 परमेश्वरदे यदे ‘तर थमयू कम्ब जातजे त्वो-त्वोम क्यूत्देबे टूङ्क्य हम्ब जातजे न्याय ङैदे चीक्क। होर्देमेस्ये थमयू योङ्रदेबे अम्ब नेने ङैने पूस्तीय।’ 8 होर्दे परमेश्वरदे अब्राहामप्रे खतनाजे करार ख्यादे, मेस्ये इसहाकजे प अब्राहाम क्यूत्देबे येर्या-ङ्यीदे इसहाकजे खतना चीत्दे। याकूबजे प इसहाक क्यूत्दे, मेस्ये याकूब बाह्रै खलकजे प क्यूत्दे। 9 “याकूबजे च योसेफने सूजो अत-च्योन्यूदे म्यातप् चीत्देबे ङूने मिश्र देशने सोङ्बीदे। तर परमेश्वर ङूप्रे ख्य। 10 परमेश्वरदे ङूजे साप्ता दु:ख-सकस्दे छूर्दीदे मिश्र देशजे मूरूम् फारोजे खूम्ने ङूने कृपा चीत्दे मेस्ये बुद्धि पीन्दे, मेस्ये फारोदे ङूने मिश्र देश, होर्दे ङूजे कीम् म्हीती क्वा फ्याजेने हाकिम चीम्मीदे। 11 “होर्देमेस्ये मीश्र देश मेस्ये कनान भरीने अनिकाल पर्दीदेबे सकस् केन् रदे, मेस्ये ङीनजे मेमेदे से अम्प्र। 12 तर याकूबदे मिश्र देशने से ख्यङ् यब पो तदेबे ङीनजे मेमेयूने पात्ता खूम् हैयानेने कूल्बीदे। 13 ङ्ही खेप् पलोने तूब योसेफदे ङूजे अत-च्योन्यूने रङ्से नालीबेली स्योत्दे, मेस्ये योसेफजे म्हीतीजे बारेने फारोदे था प्रेत्दे। 14 योसेफदे रङ्से प याकूबने मेस्ये रङ्सेजे म्हीती टक्कने टेल्देबे ङै ट्याने ख’ यदेबे कोबीदे। थम म्हीतीब सोम्लङ्दे पन्द्र ख्य। 15 याकूब मिश्र देशने गीलीदे, मेस्ये हैयानेने ङू सीइ, मेस्ये ङीनजे मेमेयूये हैयानेने सीइदे। 16 होर्देमेस्ये थमयूजे लास शकेमने कूदीदे, मेस्ये अब्राहामदे हमोरजे चयूप्रे लू फादेबे कीनब खङ्सने येत्दे। 17 “तर कन्छ्वाब परमेश्वरदे अब्राहामप्रे यब कबुल पूरा क्यूर बील ट्याने रदे हन्छ्वाब मिश्र देशने हम्ब मीयू थेप्-थेप् क्यूट्टदे, मेस्ये थमयूजे संख्या कूम क्यूत्दे। 18 हन्छ्वाब मिश्र देशने योसेफने अन्स्येब सूजो मूरुम् त्या रदेबे राज्य चेने सुरुचीत्दे। 19 ङूदे ङीनजे मीयूप्रे छल व्यवहार तन्दे, मेस्ये ङीनजे मेमेयूने थमयूजे पीचयू फीने रेदेबे येने कर् चङ ख्य, मेस्ये येर्बे चूजोके प्रेब पीचयू क्वाने सेख्य। 20 “अन्छ्वा बीलने मोशाजे जन्म क्यूत्दे। ङू परमेश्वरजे खूम्ने सोरो ज्य ख्य। ङू ल सोम्सेमे रङ्सेजे पजे कीम्ने स्वोत्दे। 21 ङू फीने छाबेमेस्ये फारोजे चीमीदे ङूने लङ्देबे टेल्कीदे, मेस्ये रङ्सेजे च बन्दीदेबे स्वोत्दे। 22 मोशाने मिश्रीयूजे साप्ता विद्याने शिक्षा पीन ख्य, मेस्ये रङ्सेजे वचनने मेस्ये कामने मोशा शक्तिशाली क्यूत्दे। 23 “कन्छ्वाब मोशा ङ्यील्लङ् वर्षजे क्यूत्दे, हन्छ्वाब रङ्से इस्राएलजे अत-च्योन्यू तूतीङ् रदे। 24 रङ्से जातजे च्योन्त्याने अन्-न्याय चीन्नब तङ्देबे, ङूदे ङूजे रक्षा चीत्दे, मेस्ये हम्ब अन्-न्याय चेब मिश्रीने सेत्देबे रङ्सेजे च्योन्ने चेब अन्-न्यायजे खीफादे। 25 परमेश्वरदे ङैजे लाने क्यूत्देबे थमयूजे उद्धार चीम्मीय यब पो ङैजे अत-च्योन्यूदे कोस्ये यदेबे ङूदे ह्वे चीन्न ख्य। तर थमयूदे हम्ब अङ्को। 26 नैदेरेदे इस्राएलीयू ङ्ही रङ्से रङ्सेने च्यफा चीन्नब बीलने ङू रदेबे थमयूने मिलाप चीम्मेने बोङ् चीत्दे, ‘मीयू, नमयूब अत-च्योन् न, चेने त्यादे त्याने अन्-न्याय चे?’ 27 तर रङ्से खीम्चे फ्याने अन्-न्याय चेब मीदे ङूने हूल्पीदेबे यदे, ‘ङीजे लागि हुकुम चील्लेब मेस्ये न्याय च्येब मी नने सूदे क्यूस्सेपीन्दे? 28 मूरू हम्ब मिश्रीने सेप्र न ङैनेये से मे औ?’ 29 येर जवाफ तदेबे मोशा छ्योङ्यीदेबे मिद्यान देशने गीलीदे फीजे मी क्यूत्देबे टूङ्गीदे। हैयाने ङूजे च ङ्ही जन्मीदीदे। 30 “ङ्यील्लङ वर्ष क्यूरे ङ्येदे सीनै गङ्जे मी अन्टूङब चनमन नेने, प्ल्याङ्नब पोथ्राजे ज्वालाने स्वर्ग दूतत्या मोशा ट्याने तङ्रदे। 31 कन्छ्वाब मोशादे अम्ब तङ्दे अन्छ्वाब ङू अम्ब दर्शन तङ्देबे हार्मन्दीकदे, मेस्ये हम्ब लेने ट्याने प्रेनूब परमप्रभुजे येर आवाज तदे, 32 ‘ङ नैजे मेमेयूजे परमेश्वर ख्यङ्-अब्राहाम, इसहाक मेस्ये याकूबजे परमेश्वर।’ मोशा फदेबे फ्रीक्दे, मेस्ये ङूदे हन्दीयोर् ले-सेमे आँट अन्ची। 33 “परमप्रभुदे ङूने यदे, ‘नैजे तोप्जे पैङ्गी प्यङ्, चेनेयलो न मेर्नब ने पवित्र ख्यङ्। 34 मिश्रने ख्यब ङैजे मीयूजे अन्ज्य दसा ङैदे तङ्दे, मेस्ये थमयू अन्सूग्देबे बीगन फानबये तदे। थमयूने उद्धार चेने ङ मो तल्र ख्यङ्। जेम्से ख, ङ नने मिश्र देशने कूल्बीय।’ 35 “अम्ब मोशाने थमयूदे, ‘सूदे नने हाकिम मेस्ये न्याय चेब यदेबे चुन्दीदे’ यदेबे ङूने अन्ज्य चीत्दे। पोथ्राने तङ्रब स्वर्गदूतने क्यूत्देबे परमेश्वरदे ङूने हाकिम मेस्ये उद्धार चीम्मेब बन्दीदे कूल्बीदे। 36 अम्ब मीदेने मिश्र देशने, लाल समुद्रने मेस्ये ङ्यील्लङ् वर्ष सेमे मी अन्टोङब चनमन नेने उदूम्जे काम मेस्ये च्यूनूयू चीत्देबे थमयूने फीने योन्डीदे। 37 “ङू हम्ब मोशाने न, ङूदे इस्राएलजे मीयूने य ख्य, ‘परमेश्वरदे ङैने तयार चीम्मेप्रने नमयूजे अत-च्योन्यू नङ्दे नमयूजे लागि अगमवक्ता त्या तयार चीक्क्य।’ 38 ङू हम्ब मोशाने न, ङू मी अन्टोङब चनमन नेने ख्यब मी हुलप्रे स्वर्गदूतयेप्रे ख्य, हम्ब स्वर्गदूतदे सीनैजे गङ्ने ङीनजे मेमेयूप्रे पो क्यम ख्य, मेस्ये ङूदेने ङीनने पीनजे लागि परमेश्वरजे सोम्बो वचनयू प्रे ख्य। 39 “ङीनजे मेमेयूदे मोशाजे आज्ञा सेम् अम्पर्दी। थमयूदे ङूने क्यापीदेबे मिश्रदेशनेने ल्वाबब सेम् चीत्दे। 40 थमयूदे हारूनने येरे यदे, ‘ङीजे खूम्खूम् प्रब कोइ देवतायु ङीजे लागि बन्दीमी, चेनेयलो ङीने मिश्र देशदे फीने योन्डेब अम्ब मी मोशाने च क्यूरे ङीने था त्वो।’ 41 हम्ब दिनने थमयूदे म्हीसी पीचजे मूर्ति त्या बन्दीदेबे हम्बने बलिये चेर्तीदे, मेस्ये रङ्सेजे लादे बन्देब काम लेत्देबे सूग्दे। 42 तर परमेश्वरदे थमयूने क्यापीदे, मेस्ये थमयूने तो मूजे कर्चेन्यू लीनी मेस्ये मीयाजे पूजा चीस्स्ये पीन्दे, अम्ब पो अगमवक्तायूजे किताबने लिख्दीये ख्यङ्, ‘इस्राएलजे मीयू, नमयूदे ङ्यील्लङ् वर्षसेमे मी अन्टोङब चनमन नेने ङैने रोलाजे बलि मेस्ये भेटीयू चेर्तीदा? 43 नमयूदे मोलोखजे पाल कीम्, होर्दे रेफन देवताजे कर्चेन् रेत्दे, हम्ब नमयूदेने पूस्तेने बन्दीयेब मूर्तियू ख्यङ्। जेम्से ङैदे नमयूने बेबिलोनजे तीप्ल्याये कूल्बीय।’ 44 “मी अन्टोङब चनमन नेने ङीनजे मेमेयूदे रङ्सेजे गवाहीजे पाल कीम् त्या ये ख्य। हम्ब पाल परमेश्वरदे मोशाने च्योलब नमूना बमोजिम बन्दीये ख्य। 45 ङीनजे मेमेदेये थमयूजे पलोने यहूदी तेब मीयूजे देशजे हुकुम चील्लेने रब यहोशूप्रेने हम्ब पाल रेत्दे। दाऊदजे पलोसेमे थमयूप्रे हैयानेने हीत्दे। 46 दाऊददे परमेश्वरजे दया प्रेत्देबे याकूबजे परमेश्वरजे लागि टूङब कीम्त्या बन्दीय यदेबे बिन्ती चीत्दे। 47 तर ङूजे लागि कीम्ब सोलोमनदे बन्दीदे। 48 “तर लादे बन्देब कीम्यूने परमेश्वर वास अन्टूङ्, यदेबे अगमवक्तादे य ख्य, 49 ‘ङैजे टूङ कीम् स्वर्ग ख्यङ्, मेस्ये पृथ्वी ङैजे तोप् छ्यने ख्यङ्, नमयूदे ङैजे लागि कर खल्जे कीम् बन्दीय? परमप्रभुदे यदे, ङैजे अराम चेब ने कम्ब ख्यङ्? 50 अम्ब साप्ता थोक ङैजे लादे बन्दीयेब ते स्व?’ 51 “ओ अड्क्योलो मीयू, नमयूजे सेम् कोङ, मेस्ये नअन्त क्यूरे ख्यङ्। नमयूदे येतार्ने पवित्र आत्माजे विरोध चेख्यङ्। नमयूजे मेमेदे कर चे ख्य, होरप्रने नमयूदेये चे ख्यङ्। 52 अगमवक्तायू नङ्ने कम्बने थमयूजे मेमेयूदे सतनम् अन्चे चीत्दे स्व? परमेश्वरजे पवित्र सेवा चेब रेन ख्यङ् यदेबे खबर स्य्वेब अगमवक्तायूनेये थमयूदे सेत्दे। नमयूदेब सेवा चेने रबने धोक पीन्देबे सेत्दे। 53 स्वर्गदूतयूदे सूम्दीयेब नियम नमयूदे प्रेब प्रेत्दे, तर हम्ब नियमब अम्मन्दी।” लूङ्दे ठरीदेबे स्तिफनसने सैत्दे 54 कन्छ्वाब थमयूदे स्तिफनसजे अम्ब पो तदे, हन्छ्वाब थमयू छीदे मूत्दे क्यूत्देबे स कीटीटी चीत्दे। 55 तर स्तिफनस पवित्र आत्मादे पुरा फ्यादेबे स्वर्गतेले लेत्दे। हैयाने ङूदे परमेश्वरजे महिमा मेस्ये ङूजे स्येद्तेले येशू मेर्नब तङ्दे। 56 होर्दे ङूदे यदे, “ले, स्वर्ग पूक्येब ङैदे तङ्दे, मेस्ये हैयाने परमेश्वरजे स्येत्तेयोर् मीजे च मेरनब ङैदे तङ्दे।” 57 तर थमयू बोङ्बे पारा पूत्देबे लङ्दे, मेस्ये रङ्से-रङ्से ङ्येलम न चदे, मेस्ये थमयू त्याफेने ङू फ्याने नैन्डदे। 58 थमयूदे ङूने सहरदे सहर फीने स्येङ्गीदेबे ङू फ्याने लूङ् छादे, मेस्ये गवाहीयूदे रङ्सेजे कोलायू प्यङ्देबे शाऊल यब स्योर्ब त्याजे तोप् ट्याने येत्दे। 59 थमयूदे स्तिफनस फ्याने लूङ् छान ख्य, ङूदे प्रार्थना चीत्दे, “ओ प्रभु येशू, ङैजे आत्मा ग्रहण चीदो।” 60 होर्दे ङूदे पूजी चोदेबे के केन् योन्देबे यदे, “ओ प्रभु, अम्ब पापजे दोष थमयूने अन्लादीस्य।” अन्छ्वात्या यदेबे ङूदे दीयो पूत्दे। |
Ghale New Testament © Nepal Bible Society, 2011.
Nepal Bible Society