मूल स्यूस्स्यायूजे कामजे किताब 27 - घले नयाँ करारपावल रोमने गीलेब 1 समुद्रदे प्रदेबे ङी इटालिया प्रपर्दीय यदेबे मोतो चेमेस्ये, थमयूदे पावलने सूजो झ्यालखानने ख्यब मीयूप्रे युलियस यब मूरुम् केन् अगस्टसजे फौजजे कप्तान त्याजे जिम्माने क्यापीदे। 2 एड्रामिटेनोसदे एशियाजे क्यू जाहजयू टूङब थर थरजे ने योङ्देबे प्रब क्यू जहाज त्याने टदेबे ङी प्रने सुरुचीत्दे। अरिस्तार्खस यब थेसलोनिकेजे माकेडोनीजे मी त्या ङीप्रे ख्य। 3 नैदेरेदे ङी सीदोनने फ्योयीदेबे रोक्तीदे। युलियसदे पावलने ङ्येम्देबे ङूजे ख्योन्यू ट्याने प्रदेबे कोला चैते हन्छ्वाने तोङ्मी यब आज्ञा पीन्दे। 4 हैयादे क्यू जहाज फेरि समुद्रतेले गीलीदे, मेस्ये उन्दू चील्लीदेबे ङी साइप्रस तेले गीलीदे। 5 किलिकिया मेस्ये पामफिलियाजे तीप्ल्या समुद्रने फ्योयेमेस्ये, ङी लुकियाजे माइरा यब सहर त्याने फ्योरदे। 6 हैयाने इटालिया प्रब अलेक्जेन्ड्रियाजे क्यू जहाज त्या तूदेबे कप्तानदे ङीने हम्बने टस्ये पीन्दे। 7 कूम दिनसेमे कोले-कोलेबे गीलीदेबे मूस्कील्बे क्नीडसने फ्योरदे मेस्ये उन्दूदे चीत्देबे थेप खूम् प्र-अन्ख्व क्यूत्देबे क्रेटजे सेन् क्यूत्देबे ङी सालमोनेजे न-न क्यूत्देबे गीलीदे। 8 बेस्से मूस्यूल् क्यूत्देबे हम्बजे न-न क्यूत्देबे ङी सोरो ज्य क्यू जहाज टूङब नेजे समुद्र यब नेने फ्योरदे। हैयादे लासिया सहर ट्याने ख्य। 9 बील कूम चेके ख्य मेस्ये समुद्र फ्याने प्रबये सोरो फत्या क्यूर ख्य, मेस्ये बर्त टूङब बीलये गीलेजेनबदे, पावलदे थमयूने 10 येरे यदेबे मोतो चीत्दे, “ख्योन्यू, अम्ब समुद्र फ्याने प्रबदे खाली जहाज मेस्ये अम्बजे मालसामानजे त्यामे नोक्सान दी, तर ङीनजे जीउ-ज्यानसजने फत्या मेस्ये नोक्सान क्यूक्की यदेबे ङ मन्न ख्यङ्।” 11 तर कप्तानदे पावलजे पो यली क्यू-जहाज चील्लेब मी प्रे नोबोदे यब पोने थेप् पत्तीदे। 12 ल्याङ् रब बील चजे लागि हम्ब क्यू-जहाज टूङ ने ज्य त्व ख्य, होरेक्यूत्देबे कूम मीयूदे केरेबेनेयली हैयादे प्रदेबे फोनिक्स सहरने फ्योबने बोङ् चे यदेबे मोतो पीन्दे। फोनिक्सब क्रेटजे क्यू जहाज टूङब नेत्या ख्य, अम्ब दक्षिण-पश्चिम मेस्ये उत्तर-पश्चिमयोर्तेले क्यून्नब ख्य। समुद्रने उन्दू-झीरी 13 कन्छ्वाब दक्षिण उन्दू सोलेबे चील्लीरदे, थमयूजे मतलब पक्क क्यूत्दे मन्देबे, क्यू-जहाजदे लङ्गर योन्देबे थमयू क्रेटजे न-न क्यूत्देबे प्रमेदे। 14 तर खात्यालाबे हम्ब टापूदे बेस्से केन् उन्दू-झीरी रदे। हम्ब उत्तर-पूर्वजे ङ्हीने च्यूमब सोरो केन् उन्दू ख्य। 15 कन्छ्वाब उन्दूदे क्यू-जहाज यूङ्देबे चील्ले अन्खू। मेस्ये ङीदे हम्बने केनेने प्रली प्रस्य यदेबे क्यापीदे। 16 क्लौडा यब चीद टापू त्याजे नेने फ्योयेमेस्ये ङीदे मूस्कील्दे क्यू-जहाजजे डुङ्गाने जूक्दे खूदे। 17 हम्बने तो लङमेस्ये थमयूदे मूती त्या योन्देबे क्यू-जहाजने नङ्दे ख्यारीदे, मेस्ये सीरटिस यब पीसजे धाप्ने फस्तीबने फदेबे थमयूदे पाल तेल्बीदे, मेस्ये क्यू-जहाज रङ्सेदेने क्यूने प्रमेदे। 18 जेम्से उन्दूबे-च्वोदे ङीयूने सोरो ती-तप् छो-तप् चेमेदे, मेस्ये नैदेरेदे थमयूदे क्यू-जहाजजे मालसामान समुद्रने छाबेमेदे। 19 होर्दे तेस्रो दिन थमयूदे रङ्सेजे लादेने क्यू-जहाज चील्लीब चैतेब सामानयूये समुद्रने छाबीदे। 20 कूम दिनसेमे मीय, कर्चेन् चैत्याये तङ अम्प्रे। उन्दू केन् चील्लेजे चील्ले चीत्देबे आखिरीने ङीदे बच्दे प्रेक्की च यब आशाये क्यापीदे। 21 कूम दिनसेमे थमयू चैये अन्चलाबे टूङ ख्य। होर्दे पावलदे थमयूट्याने रदेबे यदे, “ख्योन्यू, नमयूदे ङैजे पो ङ्यीन पर्दे ख्य। क्रेटदे क्यू-जहाज चील्ले अन्क्यूर ख्यङ्, मेस्ये येर सकस् प्रे हानी नमयूदे सैदे अम्पर्ते ख्यङ्दे। 22 जेम्से ङ यीय, बोङ् ची। नमयू नङ्ने सूजेये जीया प्रस्ये त्वो, तर क्यू-जहाजब नाश क्यूप्पीय। 23 चेनेयलो ङ कम्ब परमेश्वरजे ख्यङ्, मेस्ये सूने ङ पूस्तीय, दीनी मून्दे ङूजे दूतत्या ङैट्याने मेर्रदे। 24 ङूदे ङैने यदे, ‘पावल, अम्फलाची, न कैसरजे खूम्ने पक्कने मेर पर्दीय, मेस्ये ले, नैप्रे क्यू-जहाजने टब जती क्वाजे प्राण परमेश्वरदे नैजे लाने पीन ख्यङ्।’ 25 होरेक्यूत्देबे ख्योन्यू, बोङ् ची। ङ परमेश्वरने विश्वास चीक्क्य, ङैने कर स्योते ख्य, ठ्याक्के होरने क्यूक्क्य। 26 तर ङीनब कोइ टापू त्याने च्या-थूङ्बीय।” क्यू-जाहज धूज क्यूरेब 27 तर कन्छ्वाब चौधौँ मून् क्यूरे ख्य, मेस्ये ङी एड्रियास समुद्रने ल्यान्द्याङ लीन्दीङ् क्यून्न ख्य, हन्छ्वाब मून्गूङ्तेले क्यू-जहाज चील्लेब मीयूदे ङीन समुद्रदे स-ट्याने फ्योबीन ख्यङ् यब सम् क्यादे, 28 मेस्ये गहिरो नप्दीदे लेप्प थमयूदे सैत्यादे नूस्स्यू फीटला पत्त लैदीदे, मेस्ये छीत्या तीलाने गीलीदेबे फेरि गहिरो नप्दीब थमयूदे स्यील्लङ्दे फिट च्यूला पत्त लैदीदे। 29 होर्दे लूङ् केन्ने च्या-थूङ्बीयी यदेबे, थमयूदे क्यू-जहाजजे ङ्यलम्देयोर लङ्गर स्यी तेल्बीदे, मेस्ये नप् क्यूस्स्य यदेबे प्रार्थना चीत्दे। 30 होर्दे क्यू-जहाज चील्लेब मीयू ग्येब मेल्न ख्य, मेस्ये खूम्जे लङ्गर तल्बेब ङ्यूङ् चीत्देबे डुङ्गा समुद्रने तल्बे जेन ख्य, 31 होर्दे पावलदे कप्तानप्रे सिपाईयूने यदे, “अम्ब मीयू क्यू-जहाजने अन्टोङ्देयलो नमयू बच्दे अन्खू।” 32 होर्दे सिपाईयूदे डुङ्गाजे थबयू ख्वाबीदे, मेस्ये डुङ्गा प्लेकीस्ये पीन्दे। 33 म्या सेरेरे तङ्र ख्य, पावलदे थमयू खोत्तानेने चसे च यदेबे बिन्ती चीत्दे। ङूदे यदे, “दीनी चौध दिन क्यूरी, नमयू अल्मल् क्यूत्देबे चैत्याये अन्चलाबे ठीले-ठीले टून ख्यङ्। 34 होरेक्यूत्देबे च क्यूक्को चत्या च यदेबे ङ नमयूने बिन्ती चीक्क्य। चत्या चदेयलो नमयूदे बोङ् प्रेक्क्य, नमयू सूजये टफूत्याये नाश क्यूस्से त्वो।” 35 अम्ब पो यमेस्ये ङूदे क्यङ् टेल्दे, मेस्ये खोत्ताजे खूम्ने परमेश्वरने धन्यवाद पीन्देबे क्यङ् क्योत्देबे चमैदे। 36 होर्दे थमयूदेये आँट प्रेत्देबे चसे छीत्या चदे। 37 क्यू-जहाजने ङी जम्म सैङ्ही सोम्लङ्दे सोह्र जना ख्य। 38 थमयूदे कलाबे चमेस्ये, क्यू-जहाज यङ्लाबे चेने ह्व समुद्रने छाबीदे। 39 म्या तङमेस्येये जहाज चील्लेब मीयूदे हम्ब ने चीन्ते अन्खू, तर थमयूदे पीस ख्यब सम्म नेत्या तङ्देबे क्यू-जहाज हन्दीयेर् कूपसे मन्दे। 40 थमयूदे लङ्गरयू ख्यायेब थबयू ख्वादेबे लङ्गरयू मो तेल्बीदे, मेस्ये समुद्रनेने छाबीदे। हन्छ्वाब पूइय ख्यायेब थबयू फाबीदे। खूम्जे पाल लङ्देबे उन्दूतेलेयोर् फर्कीदीपीदे मेस्ये क्यू-जहाजने नतेलेयोर् ख्योर्कीदे। 41 तर क्यूनङ्ने ख्यब पीसजे म्यूर्ने क्यू-जहाज च्या-थूङ्गीदेबे हैयानेने क्योयी, जहाजजे खूम्जे भा खै-कायी मेस्ये चील्ले अन्खू, होर्दे ङ्यलम्जे भाब छालयू टरदेबे क्योप्प मेदे। 42 कैदीयू पौडी क्यादेबे छ्योङ्बीयीच मन्देबे सिपाईयूदे थमयूने सेब मोतो चीत्दे। 43 तर कप्तानदे पावलने जूक्तीमेब सेम्दे थमयूने होरे चेने रोक्तीदे। पौडी क्यासे रब जती क्वाने खूम्ने क्यू-जहाजदे समुद्रने छङ्देबे पखने योङ्ब यदेबे ङूदे हुकुम पीन्दे, 44 मेस्ये खास्या ख्यबयूब फाल्ल्यायूने मेस्ये जहाजजे टूक्रायूने टूङ्देबे तीप्ल्या प्र यदे। येर्बे क्वाने चेलाबेने समुद्र नने फ्योयीदे। |
Ghale New Testament © Nepal Bible Society, 2011.
Nepal Bible Society