मूल स्यूस्स्यायूजे कामजे किताब 26 - घले नयाँ करार1 अग्रिपासदे पावलने यदे, “नने रङ्सेजे पक्षने क्यमब हक ख्यङ्।” होर्दे रङ्से ला तान्तीदेबे पावलदे रङ्से जूक्तेजे लागि क्यम मैदे: 2 “ओ मूरूम् अग्रिपास, यहूदीयूदे ङैने लैदीनब साप्ता दोषजे बारेने दीनी नैजे खूम्ने ङैदे रङ्से जूक्तेने क्यम प्रेत्देबे ङ रङ्सेने भाग्यमानी मन ख्यङ्। 3 यहूदीयूजे साप्ता छ्यप् मेस्ये सवाल-जवाफजे पोने नदे बेस्से चेलाबे था ख्यबदे, ङैजे बयान अन्-आतीलाबे ङ्यीम्मी यदेबे ङ बिन्ती चीक्क्य। 4 “ङैजे जातिजे अन्द्रने मेस्ये यरूशलेमने सुरुमेस्ये ङैजे स्योर्ब जीयाजे बीलमेस्येदे ङैजे जीयाजे आनिबानि यहूदीयूने था ख्यङ्। 5 कूम सेमेमेस्ये थमयूने थाने ख्यब पो ख्यङ्, ङीन्जे धर्मजे कट्टर हुल नङ्ने ङैदे फरिसी त्या क्यूत्देबे रङ्से जीया च ख्य। थमयूदे चैतीदेयलो अम्ब पोजे गवाही पीन खूइय। 6 परमेश्वरदे ङीजे मेमेने चीतेब कबुलने ङैदे आशा चेब कारणदे दीनी ङ अम्ब मुद्दाने मेर्न ख्यङ्। 7 ङीजे बाह्र खलकदे अम्ब आशा चीत्देबे नो-मून् सेम् त्या क्यूत्देबे पूस्ते ख्यङ्, मेस्ये अम्ब आशाजे लागि यदेबे, ओ मूरूम्, यहूदीयूदे ङैने दोष लैदे ख्यङ्। 8 परमेश्वरदे सीयेब मीयूने सोम्बो चीक्क्य यब पो चेने नमयू सूदेये अम्पत्ते? 9 “नासरतजे येशूजे मीन्जे विरुद्धने कूम सजाइ पीन पर्दीय यदेबे ङ रङ्सेनेये विश्वास ख्य। 10 ङैदे यरूशलेमने होरेने चीत्दे, मेस्ये पूस्र्या केन्यू ट्यादे हुकुम प्रेत्देबे परमेश्वरजे पवित्र मीयू कूमने ङैदे झ्यालखानने चङ्स्ये पीनत्या दी, तर थमयूने सेप्प थमयूजे विरुद्धने ङैदे ङैजे मन्जुरीये पीन्दे। 11 कूम खेप् ङैदे थमयूने ‘जेम्सेमेस्ये नासरतजे येशूने विश्वास अन्ची’ यसे पीनने सभा-कीम्यूने जबरजस्ती सजाइ पीन्स्ये पीन्दे। ङ थमयू तङ्देबे छीदे मूत्ते क्यूत्देबे फीजे सहरयूनेये प्रदेबे ङैदे थमयूने सतनम् चीत्दे। 12 “येर्बे केन् पूस्र्यायूजे हुकुम मेस्ये आज्ञाजे चिट्ठी प्रेत्देबे ङ दमस्कस सहरतेले गीलीदे। 13 ओ मूरुम्, नो-गूङ्ब ङैदे स्वर्गदे मीयायली थेप् ओथ्याङ् सेर् तङ्दे, अम्ब ङ मेस्ये ङैप्रे प्रेनब ख्योन्यूजे ख्यूरीरी चेम्केतीन ख्य। 14 कन्छ्वाब ङी क्वाने सने क्यरीदे, हन्छ्वाब हिब्रू केदे ङैने येरे येनब आवाज ङैदे तदे, “शाऊल, शाऊल, न ङैने चेने सतनम् चे? चूम्स्याने त्वाक्कैदे खान्दीब ननेने नैय।” 15 होर्दे ङैदे यदे, “ओ प्रभु, न सू स्व?’ प्रभुदे यदे, ‘ङ येशू न, ङैने नदे सतनम् चीन्न ख्यङ्। 16 तर लङ् मेस्ये रङ्सेजे तोप्ने मेर्, चेनेयलो ङैने नदे तङब मेस्ये ङैदे नने तनब पोजे लागि सेवा चेब मेस्ये साक्षी जूर्तेस्ये मन्दे ङ नैट्याने तङ्रदे। 17 ङ नने नैजे रङ्सेजे जाति मेस्ये यहूदी तेब मीयूप्रे जूक्ती मीय। ङ नने यहूदी तेबयू ट्याने कूल्बीय, 18 यी नदे थमयूजे म्या पूक्मी, मेस्ये थमयू मून्दूङ्दे ओथ्याङ् तेले, मेस्ये शैतानजे शक्तिदे परमेश्वर तेले ल्वारस्य। येरेने थमयूदे पापजे क्षमा प्रेक्क्य मेस्ये ङै फ्याने विश्वास चीत्देबे पवित्र क्यूरेब मीयूजे ने थमयूदेये प्रेक्क्य।’ 19 “होरेक्यूत्देबे, मूरुम् अग्रिपासदे, स्वर्गजे दर्शनने ङैदे अम्मन्दे चेअन्खू। 20 तर सुरुने दमस्कसने, होर्दे यरूशलेमने मेस्ये यहूदियाभरीजे देशयूने टूङब मीयूने, मेस्ये यहूदी तेब मीयूनेये पश्चात्ताप चीत्देबे परमेश्वरतेले ल्वाख मेस्ये रङ्सेजे पापये क्यापीदेबे ज्य काम ची यदेबे ङैदे प्रचार चीत्दे। 21 होरेक्यूत्देबे यहूदीयूदे ङैने मन्दिरने चूङ्देबे सेमेदे। 22 दीनीजे दिनसेमे परमेश्वरदे ङैने साक्तीमे ख्यङ्। होरेक्यूत्देबे केन् चीद क्वानेने गवाही पीने-पीने ङ अने मेर्न ख्यङ्। अगमवक्तायूदे मेस्ये मोशादे क्यम्कब वचन पक्कने पूरा क्यूक्क्य यब पोत्यामे यदे, ङैदे सूजो चैये अन्-येक- 23 थमयूदे य ख्य, यी ख्रीष्टदे छर्ङ् प्रेने पर्दे ख्यङ्, सीबदेबे सोम्बो क्यूरबयू नङ्ने पात्ता खूम् ङू क्यूत्दे, मेस्ये ङूदे रङ्से जात मेस्ये यहूदी तेब मीयूनेये ओथ्याङ् पीन्क्य।” 24 ङूदे रङ्से जूक्तेब पोयू क्यम्ब फेस्तसदे के केन् योन्देबे यदे, “या पावल, न पर क्यूरे औ,, नैजे कूम विद्यादे नने पर चीक्क ख्यङ्।” 25 तर पावलदे यदे, “गेसेन् चेपर्देब फेस्तस, ङ पर दी, तर ङ सत्य ख्यङ्, मेस्ये ज्य बुद्धिजे पोयू क्यम्क्य। 26 मूरुम् अग्रिपासने अम्ब साप्ता पो था ख्यङ्, ङूजे खूम्ने ङ अम्फलाबे य खूइय। ङूदे पक्कने अम्ब पोयूने चेलाबे ध्यान् पीन ख्यङ्, चेनेयलो अम्ब पोयू नङ्सूने चीक्क दी। 27 मूरुम् अग्रिपास, नदे अगमवक्तायू फ्याने विश्वास चीक्क्या? ङैने था ख्यङ्, नदे विश्वास चे ख्यङ्।” 28 अग्रिपासदे पावलने यदे, “खात्यात्याने नदे ङैने ख्रीष्टियान बन्देब सेम् चे औ?” 29 तर पावलदे जवाफ पीन्दे, “खात्याने या कूम बीलने अम्ब सङ्लोयू क्यादेबे, नत्या दीलाबे दीनी ङैजे पो ङ्यीनब मीयू क्वाने ङप्रने क्यूस्स्य यदेबे ङ परमेश्वरने प्रार्थना चीक्क्य।” 30 होर्दे मूरूम्, हाकिम, बरनिकीजे मेस्ये हैयाने टूङब मीयू क्वाने लङ्दे। 31 होर्दे थमयू योङ्रमेस्ये त्यात्याप्रे येरे यदेबे पो चीत्दे, “अम्ब मीदे प्राणजे दण्ड प्रे-पर्देब मेस्ये झ्यालखानने चङ्बे लायकजे काम चैत्याये अन्चीक्क।” 32 अग्रिपासदे फेस्तसने यदे, “ङूदे कैसर ट्याने बिन्ती अन्चीक्क ख्यङ्लो अम्ब मीने क्यापीलीने क्यूर ख्यङ्दे।” |
Ghale New Testament © Nepal Bible Society, 2011.
Nepal Bible Society