मूल स्यूस्स्यायूजे कामजे किताब 21 - घले नयाँ करारयरूशलेमने गीलेब 1 थमयूप्रे बीदा क्यूत्देबे क्यू जहाजने टदेबे ङी सीधा कोसने रदे, मेस्ये नैदेरेदे रोडसने मेस्ये हैयादे पटाराने फ्योरदे। 2 होर्दे फोनिकेने प्रब क्यू जहाज त्या तूदेबे ङी हम्बने टदेबे गीलीदे। 3 कन्छ्वाब साइप्रस तङ्रदे, हन्छ्वाब ङी हम्बजे योन्तेलेयोर् क्यूत्देबे सिरियातेले गीलीदेबे टुरोसने तल्दे। चेनेयलो जहाजजे सामानयू हैयाने तेलपर्ते ख्य। 4 होर्दे होने टूङब स्यूस्स्यायू त्वने गीलीदे मेस्ये सत त्यासेमे थमयूप्रे टूङ्दे। पवित्र आत्मादे च्योल्देबे थमयूदे पावलने यरूशलेम अम्प्रलाची यदेबे बिन्ती चीत्दे। 5 हैयादे ङी प्र बील क्यूरमेस्ये ङी बीदा क्यूत्देबे रङ्सेजे लम्ने गीलीदे। रङ्से कीम् म्हीत्ती पीचयूसजने थमयू क्वादेने सहरजे फीसेमेने ङीने सेबीरदे, मेस्ये ङीदे समुद्र नने पूजी चोदेबे प्रार्थना चीत्दे, होर्दे त्यादे त्याप्रे बिदा क्यूत्दे। 6 होर्दे ङीब क्यू-जहाजने टदे, मेस्ये थमयूब रङ्से कीम्ने ल्वाइदे। 7 टुरोसदे समुद्रजे लम् क्यूत्देबे रब, ङी टोलेमाइसने फ्योरदे। हैयाने अत-च्योन्यूने नमस्कार चीत्देबे थमयूप्रे तीया टूङ्दे। 8 नैदेरेदे ङी बीदा क्यूत्देबे कैसरियाने रदे, मेस्ये प्रचार चेब फिलिपजे कीम्ने टूङ्दे। ङू हम्ब मी ङ्यी नङ्जे त्या ख्य, मेस्ये ङी ङूप्रे टूङ्दे। 9 अगमवाणी क्यमब ङूजे चीमी स्यीमे ख्य, थमयूजे ङ्येन् अन्क्यूरे ख्य। 10 ङी हैयाने तेदिन टूङ्ब यहूदियादे अगमवाणी क्यमब अगाबस मीन् ख्यब मी त्या रदे। 11 ङूदे ङी ट्याने रदेबे पावलजे कूच्यू टेल्देबे रङ्से ला-तोप् ख्यादेबे यदे, “पवित्र आत्मादे येरे य-ख्यङ्, ‘यरूशलेम प्रदेयलो यहूदीयूदे अम्ब कूच्यूजे नोबोने येर्बेने ख्याय, मेस्ये यहूदी तेब मीयूजे लाने सूम्दीपीय’।” 12 अम्ब पो तदेबे, ङी मेस्ये हम्ब नेजे मीयू मील्लीदेबे ङूने यरूशलेमने अम्प्रलाची यदेबे बिन्ती चीत्दे। 13 तर पावलदे जवाफ पीन्दे, “नमयू येर्बे ङूदेबे ङैजे सेम् चैने ङूसे पीन स्व? चेनेयलो प्रभु येशूजे मीन्जे कारण कैद प्रपर्देत्या दी, तर यरूशलेमने सीबनेये ङ तयार ख्यङ्।” 14 ङूने रोक्ते अन्खूब “प्रभुजे इच्छा पूरा क्यूस्स्य” यदेबे ङी चैये अन्-यलाबे टूङ्दे। 15 हम्ब दिनङ्येदे ङी तयार क्यूत्देबे यरूशलेमतेले गीलीदे। 16 ङीप्रे कैसरियाजे कोइ-कोइ स्यूस्स्यायूये गीलीदे, मेस्ये थमयूदे ङीने साइप्रसजे स्यूस्स्या ङीङ् मनासोनजे कीम्ने रेत्दे। ङू ट्याने ङी टूङ पर्दे ख्य। पावल यरूशलेम फ्योयेब 17 होर्दे कन्छ्वाब ङी यरूशलेमने फ्योरदे, हन्छ्वाब च्योन्यूदे ङीने सोरो सूग्देबे स्वागत चीत्दे। 18 नैदेरेदे पावल ङीप्रे याकूब ट्याने गीलीदे। हैयाने एल्डरयू क्वाने ख्य। 19 थमयूने नमस्कार चेमेस्ये पावलदे यहूदी तेबयूजे अन्द्रने सेवा चीप्प परमेश्वरदे कर-कर कामयू चीत्दे, हम्ब क्वाने थमयूने स्योम्मीदे। 20 अम्ब तमेस्ये थमयूदे परमेश्वरजे महिमा चीत्दे। होर्दे ङूने यदे, “ओ च्योन्, यहूदीयूजे अन्द्रने विश्वास चेब मीयू हजारदे हजार ख्यङ्, मेस्ये नियमजे पोने थमयू क्वाने जोसीलो ख्यङ्। 21 थमयूदे नैजे बारेनेये पो त्या ङ्ही तख्यङ्, हम्ब च ख्यङ्यलो, यहूदी तेबयूजे अन्द्रने टूङब यहूदीयूने नदे ‘मोशाने क्यापी मेस्ये थमयूजे पीचयूजे खतना अन्चील्लाची मेस्ये पेकयू अम्मन्दीलाची’ यदेबे लोम्मे ख्यङ् ये। 22 जेम्से कर्चे स्व? न र ख्यङ् यदेबे थमयूदे केरेने यली तैय। 23 होरेक्यूत्देबे ङीदे च यीय नदे, अम्ब चीदो स्व, भाकल चेब मी स्यी ङीप्रे ख्यङ्। 24 अम्बयूने टेल्देबे नेये अम्बयूप्रेने शुद्ध ची, मेस्ये अम्बयूने चैदेब खर्चये नदे फामी, मेस्ये अम्बयूदे ट फू क्ल्यूस्य। येर्बे नदे नियम मन्देब तङ्देबे नैजे बारेने तब कम्ब पोये तम्दम् ते टोङ् यदेबे खोत्तादेने था प्रेक्क्य। 25 तर यहूदी तेब मीयू सूदे विश्वास चे ख्यङ्, थमयू मूर्तिने बलि चेर्देब से, का, नीजी चेर्देबे सेब रोलाजे स्य अन्चलाची मेस्ये वेश्य काम अन्चील्लाची यदेबे ङीदे पक्क चेब पो चिट्ठीने लिख्दीदेबे चङ्बे ख्यङ्।” 26 होर्दे पावलदे हम्ब मीयूने कूदीदेबे नैदेरेदे थमयूप्रे रङ्सेये शुद्ध चीत्दे, मेस्ये शुद्ध क्यूरब दिनयू कलङ् पूरा क्यूक्क्य, मेस्ये त्या त्याजे लागि पीनब भेटीजे सूचना पीनब दिन ङू मन्दिर नङ्ने क्योइदे। पावल मन्दिरने चूङ्गब 27 कन्छ्वाब ङ्यीर्या पूरा क्यूट्ट ख्य, हन्छ्वाब एशियाजे यहूदीयूदे पावल मन्दिरने तङ्देबे मी हुल क्वानेने उस्तीदे मेस्ये ङूने चूङ्दे। 28 थमयूदे येरे यदेबे पारा पूत्दे, “इस्राएलजे मीयू, तोङ्मी! मीयूने का-मुलुकने ङीनजे जात मेस्ये ङीनजे मोशाजे नियम मेस्ये अम्ब नेजे विरुद्धने शिक्षा पीन्देबे प्रब मी ङू ख्यङ्। अन्छ्वात्या दीलाबे, अम्बदे ग्रीकयूनेये मन्दिर नङ्ने रेत्देबे अम्ब पवित्र नेने अशुद्ध चीक्क ख्यङ्।” 29 चेनेयलो अम्बजे खूम्ने थमयूदे एफिससजे त्रोफिमस यब मी त्याने ङूप्रे सहरने तङ्देबे ङूनेये पावलदे मन्दिर नङ्ने रेख्यङ् यदेबे थमयूदे मन्दे। 30 होर्दे का-मुलुक सहरने ड्वाङ्गे क्यूत्देबे मीयू त्याफेने ग्येरदे। थमयूदे पावलने चूङ्दे मन्दिरदे फीने खोस्योस्यो स्येन्देबे रेत्दे, मेस्ये तुरुन्तै ख्योयू थाबीदे। 31 कन्छ्वाब थमयूदे ङूने से मे ख्य, हन्छ्वाब यरूशलेमजे का-मुलुकने खैलाबैला क्यून्न ख्यङ् यब पोजे खबर पल्टनजे पात्ता केन् मीदे तदे। 32 थमयू तुरुन्तै सिपाई मेस्ये कप्तानयूने प्रे-प्रे टेल्देबे थमयू ट्याने छ्योङ्रदे। थमयूदे सिपाईजे पात्ता केन् मी मेस्ये सिपाईयू तङ्दे, मेस्ये पावलने अन्ठरीदे। 33 होर्दे हम्ब सिपाईजे पात्ता केन् मी पावल ट्याने रदेबे चूङ्रदे मेस्ये सङ्लो ङ्हीदे ङूने ख्या यदेबे हुकुम पीन्दे। अम्ब सू टोङ् मेस्ये ङूदे च चीक्कदे यदेबे ङूदे लोत्दे। 34 तर हम्ब मीहुल नङ्ने कोइदे थर् त्या पो सूजोदे सूजो पो यदेबे पारा पूत्दे, मेस्ये ङूदे हम्ब पारा प्वेब घटना च ख्यङ् हम्ब था प्रे अन्खूदेबे पावलने सिपाईयू टूङब ब्यारेकने कूव यदेबे आज्ञा पीन्दे। 35 सिपाईयूदे पावलने टेल्देबे गीलीब मीयूजे हुल थमयूजे ङ्ये-ङ्ये लादीदे। खीर्कीदे तो प्रमल्नूब मीयू पावलने सेने हूर्रदे। होरेक्यूत्देबे मीयूप्रे चूक्तेमेने सिपाईयूदे ङूने प्लेत्देबे कूदीदे। 36 चेनेयलो मी हुलदे ‘ङूने सेपर्दीय’ यदेबे पारा पूदे-पूदे ङ्ये-ङ्ये लादे ख्य। मीहुलने रङ्सेजे बारेने स्योत्दे 37 ब्यारेक नङ्ने सब मेल्नूब पावलदे सिपाईजे पात्ता केन मीने यदे, “हजूर, नदे यसे पीन्लो, ङ पो त्या ङ्ही यीय।” ङूदे यदे, “ग्रीक के नदे क्यम्से रइर? 38 न हम्ब मिश्री ते, नदे चूजोकेला उल्क चीत्देबे हजार स्यी अन्ज्य मीयूने नाने कूते ते?” 39 तर पावलदे जवाफ पीन्दे, “ङब किलिकियाजे सहर टार्ससजे यहूदी मी ख्यङ्, चीदत्या सहरजे मी दी। बिन्ती ख्यङ्, अम्ब मीयूने पो त्या ङ्ही यब ङैने मन्जूरी पीनो।” 40 कन्छ्वाब ङूदे मन्जूरी पीन्दे, हन्छ्वाब खीर्कीने मेर्देबे पावलदे मीयूने लादे लतप् चीत्दे। मीयू पारा अम्प्वे क्यूरेमेस्ये, ङूदे थमयूने हिब्रू केने येरे यदे- |
Ghale New Testament © Nepal Bible Society, 2011.
Nepal Bible Society