मूल स्यूस्स्यायूजे कामजे किताब 19 - घले नयाँ करारपावल एफिससने 1 अपोल्लोस कोरिन्थने ख्यङ्ब नङ्जे नेयू योङ्देबे पावल एफिससने रदे। हैयाने ङूदे कोइ-कोइ स्यूस्स्यायूने तूदे। 2 ङूदे थमयूने यदे, “नमयूदे विश्वास चीत्देबे पवित्र आत्मा प्रेत्दा?” थमयूने ङूने यदे, “पवित्र आत्मा ख्यङ् यब पो ङीदे कलङ्बेये अन्त।” 3 होर्दे पावलदे थमयूने यदे, “नमयूदे कर बप्तिस्मा कीन्दे?” थमयूदे, “यूहन्नाजे बप्तिस्मा” यदे। 4 मेस्ये पावलदे यदे, “यूहन्नादे पीनब बप्तिस्माब पश्चात्तापजे बप्तिस्मा ख्य। ङूजे ङ्येदे रीय यब मी, या येशू फ्याने विश्वास ची यदेबे ङूदे मीयूने य ख्य।” 5 अम्ब पो ङ्यीन्देबे थमयूदे प्रभु येशूजे मीन्ने बप्तिस्मा कीन्दे। 6 कन्छ्वाब पावलदे थमयू फ्याने ला येत्दे, हन्छ्वाब पवित्र आत्मा थमयू फ्याने रदेबे थमयूदे सूजो केयूने क्यम्दे मेस्ये अगमवाणी क्यम्दे। 7 थमयू बाह्र जनालाप्र ख्य। 8 पावल सभा-कीम्ने गीलीदेबे ल सोम्सेमे अम्फलाबे मीयूने शिक्षा पीन्दे। ङूदे परमेश्वरजे राज्यजे बारेने अम्फलाबे सवाल-जवाफ चीत्दे मेस्ये मीयूने चेलाबे लोम्मीनूदे। 9 तर कन्छ्वाब कोइ-कोइदे सेम् कोङ क्यूत्देबे विश्वास अन्ची, अम्ब मीहुलजे विरुद्धने क्वाजे खूम्ने क्यम्दे, हन्छ्वाब पावल थमयूप्रे आलाक् क्यूत्दे, मेस्ये स्यूस्स्यायूने प्रेप्रे कूदीदेबे टुरान्नसजे स्कूलने येतार्ने सवाल-जवाफ चीत्दे। 10 अम्ब काम वर्ष ङ्हीसेमे चील्लीदे, मेस्ये एशियाने टूङब मीयू, यहूदी मेस्ये ग्रीक थर ङ्हीदेने प्रभुजे वचन ङ्यीन्दे। 11 परमेश्वरदे पावलजे लादे सोरो केन् केन् हार्मन्देब कामयू चीत्दे, 12 अन्छ्वासेमे क्यूत्दे यी रूमाल या टूकू पावलजे ङ्वने छूत्देबे नवयू ट्याने कूब ख्य, मेस्ये नवयूजे ङ्वदे बीद तम् क्यूर ख्य मेस्ये दुष्ट आत्माये योङ्ब ख्य। 13 तर कोइ-कोइ तीछो ट्वाब यहूदी ङा-थूक् चेबयूदे छेत्-आत्मा लादीकब मीयूने प्रभु येशूजे मीन् गोम्देबे येरे यदे, “पावलदे प्रचार चेब येशूजे मीन्ने ङ नने योङ्ब यदेबे आज्ञा चीक्क्य।” 14 हैयाने स्केवास मीन्जे केन् यहूदी पूस्र्याजे च ङ्यीदेये येरे चेख्य। 15 होर्दे छेत् आत्मादे जवाफ पीन्दे, “येशूने ङैदे स्ये ख्यङ्, मेस्ये पावलये स्ये ख्यङ्, तर नमयूब सू?” 16 हम्ब छेत् आत्मा ख्यब मी थमयू फ्याने थे-नेन्डदे, मेस्ये थमयू क्वानेने चूङ्देबे थमयूने चेने तप्पीदे, मेस्ये थमयू हम्ब कीम्दे च्यङ्ली मेस्ये घाइते क्यूत्देबे छ्योङ्गीदे। 17 अम्ब पो एफिससने टूङब यहूदी मेस्ये ग्रीकयूदे तदेबे क्वाने सोरो फदे, मेस्ये प्रभु येशूजे मीन्जे सार्या क्यूत्दे। 18 विश्वास चेब कूम मीयू रदेबे थमयूदे चीक्कब रङ्से-रङ्से दुष्ट कामयू ङैदे चीक्क ख्यङ् यदेबे स्वीकार चीत्दे मेस्ये हम्ब कामयू स्योत्दे। 19 थमयू नङ्जे कूम मी, सू-सूदे मोह्नी प्वेब काम चे ख्य, रङ्से-रङ्से किताबयू फूङ् पूत्देबे रेत्दे, मेस्ये क्वाजे खूम्ने मी-नेम्बीदे। थमयूदे हम्बजे लू ङ्यील्लङ्दे हजार च्यू चाँदीजे मन्द्रामूलीजे लू मूल्लीदे। 20 येर्बे प्रभुजे वचन शक्तिने फ्याइ मेस्ये थेप्थेप् क्यूरी। 21 अम्ब घटनायू क्यूर ङ्येदे, पवित्र आत्मादे च्योल्देबे पावल माकेडोनिया मेस्ये अखैयाजे लम् क्यूत्देबे यरूशलेम प्रब पक्क चीत्दे। ङूदे यदे, “हैयाने फ्योबमेस्ये ङ रोमनेये प्रने पर्दीय।” 22 होर्देङ्येदे पावलदे ङूने तोङ्मेब मी ङ्ही तिमोथी मेस्ये इरास्तसने माकेडोनियाने कूल्बीदे, तर ङू रङ्सेब तेदिन एशियानेने टूङ्दे। एफिससने हुलदङ्गा 23 हम्ब बीलतेले अम्ब शिक्षाजे बारेने सोरो फत्या हल्ला क्यूत्दे। 24 चेनेयलो डेमेत्रियस यब चाँदीजे काम चेब सोरो ज्य सीपालू मीत्यादे आर्तेमिस देवीजे चीद-चीद मन्दिरयू बन्दीदेबे कूम नोर् कमेदे ख्य। मेस्ये सूजो सीप ख्यब मीयूनेये कूम काम पीन ख्य। 25 होर्दे अम्बयूने मेस्ये येरप्रने काम फरबयूने फूङ् पूत्देबे यदे, “च्योन्यू, नमयूने थाने ख्यङ्, अम्ब छोङ्देने ङीनने र-लम् ज्य क्यूर ख्यङ्। 26 नमयूदे तङ्न ख्यङ्, मेस्ये तैन ख्यङ्, अम्ब एफिससने त्या दीलाबे एशियाजे का-मुलुकने लादे बन्देब देवदेवता चैये दी यदेबे पावलदे कूम मीयूजे हुलने होम्देबे रङ्सेतेले कूते ख्यङ्। 27 होरेक्यूत्देबे ङीनजे छोङ्जे न-मीन् प्रत्या दीलाबे देवी केन् आर्तेमिसजे मन्दिर सजने चेकम्ते क्यूप्पीय, मेस्ये एशियाजे होर्दे संसारजे का-मुलुकने मन्दीनब देवीजे पूजा अन्चे क्यूप्पीय।” 28 अम्ब तदेबे थमयू छीदे मूत्दे क्यूत्दे, मेस्ये “एफिससजे मीयूदे आर्तेमिस देवी पात्ता केन् ख्यङ्।” यदेबे बोङ्बे पारा प्वेमेदे। 29 सहरजे का-मुलुकने ड्वाङ्गे क्यूत्दे, मेस्ये थमयू क्वाने मील्लीदेबे माकेडोनियादे रब पावलजे ख्योन् गायस मेस्ये अरिस्तार्खस चूङ्देबे रङ्गशालाने खोस्योस्यो स्येन्देबे कूदीदे। 30 पावल मीहुल ट्याने प्रतीङ्रदे, तर स्यूस्स्यायूदे ङूने प्रस्ये अम्पीन्। 31 एशियाजे कोइ मूख्य मीयू पावलजे ख्योन् ख्य। थमयूदे पावलने रङ्गशाला नङ्ने अम्प्रलाची यदेबे खबर चङ्पीदे। 32 होर्दे थमयू थर-थरजे पो चीत्देबे पारा पूत्दे। चेनेयलो हम्ब पो मी हुल नङ्ने बेस्से ड्वाङ्गे क्यूत्दे, मेस्ये कूम मीयूदे थमयू चेने फूङ् क्यून्न हम्बये था त्व ख्य। 33 मीहुल नङ्जे यहूदीयूदे अलेक्जेन्डरने खूम्ने रेत्दे। मीहुलदे पारा पूत्देबे घटनाजे पोयू स्योत्दे, अलेक्जेन्डरदे लादे लतप् चीत्देबे मीयूजे खूम्ने बच्देजे लागि पो त्या ङ्ही यदे। 34 तर थमयूदे ङू यहूदी टूङ् यब पो था प्रेत्देबे क्वादेने के त्या योन्देबे धन्ने घण्टा ङ्हीलाप्र सेमे “एफिसीयूजे आर्तेमिस पात्ता केन् ख्यङ्” यदेबे पारा पूत्दे। 35 सहरजे हाकिमदे मीयूने पारा अम्प्वे चीक्क ङ्येदे यदे, “एफिससजे मीयू, एफिसीयूजे सहरब पात्ता केन् आर्तेमिसजे मन्दिर मेस्ये मूदे तल्लब ङूजे मूर्तिजे रक्षा चेब ख्यङ् यब पो सूने था त्व स्व? 36 नमयूने था ख्यङ् अम्ब पो सूदेये च अन्खू, होरेक्यूत्देबे नमयू पारा अम्पूल्लाबे टूङ पर्दीय मेस्ये उल्क काम चैये चे अन्क्यूर्। 37 चेनेयलो नमयूदे रेब मीयूदे ङीनजे मन्दिरजे सेये अन्खूक, मेस्ये देवीजे न-ये अम्प्वे ख्यङ्। 38 कादेये डेमोत्रियस मेस्ये ङूजे ख्योन् मर् थूङब मीयू कोइजे विरुद्धने उजूर चेपर्तीलो न्याय चेब अड्डयूजे ख्यो होङ्ने ख्यङ्, मेस्ये न्याय चेब मीयूये ख्यने ख्यङ्। थमयू त्यादे सूजोजे विरुद्धने मुद्धा जीङ्स्य। 39 तर अम्ब त्यामे दी सूजो पोयूये लङ्दीरलो हम्बजे फैसला येतार्ने क्यून्नब सभाने क्यूक्क्य, 40 दीनीजे अम्ब हुलदङ्गाजे गल् ङी फ्याने लादेब खतरा ख्यङ्। चेनेयलो अम्ब कारणने त्वब हुलदङ्गाजे चैये जवाफ ङी पीन अन्खू।” 41 अन्छ्वा यदेबे ङूदे सभाजे मीयूने सभा जेन्दे यदे। |
Ghale New Testament © Nepal Bible Society, 2011.
Nepal Bible Society