मूल स्यूस्स्यायूजे कामजे किताब 16 - घले नयाँ करारपावल, सिलास मेस्ये तिमोथी त्वब 1 पावल डर्बी मेस्ये लुस्त्रानेये रदे। हैयाने तिमोथी यब स्यूस्स्या त्या ख्य। ङू विश्वासी यहूदी मदी त्याजे च ख्य, तर ङूजे प ग्रीक ख्य। 2 लुस्त्रा मेस्ये आइकोनियनजे अत-च्योन्यू नङ्ने तिमोथीजे न-मीन् कूम चील्ले ख्य। 3 ङूने पावलदे प्रेप्रे टेल्केब सेम् चीत्दे। हम्ब नेयूने टूङब यहूदीयूजे कारण पावलदे ङूने कूदीदेबे खतना चीत्दे। चेनेयलो ङूजे प ग्रीक ख्य, यब पो थमयू टक्कदेने था ख्य। 4 जेम्से थमयू सहरयूजे लम् क्यूत्देबे प्रब थमयूदे यरूशलेमजे मूल स्यूस्स्यायू मेस्ये एल्डरयूदे चेब फैसला थमयूदे मन्दीस्य यदेबे स्योम्मीदे 5 येर्बे मण्डलीयू विश्वासने बोल्यो क्यूत्देबे दिनजेने विश्वासीयू कूम फ्यारदे। माकेडोनिया प्रब दर्शन 6 पवित्र आत्मादे एशियाने वचन स्य्वेस्ये अम्पीनबदे थमयू फ्रिगिया मेस्ये गलातिया नेतेले योङ्देबे गीलीदे। 7 माइसियाजे चूम्ने फ्योरमेस्ये थमयूदे बिथिनियातेले प्रब सेम् चीत्दे। तर येशूजे आत्मादे थमयूने प्रस्ये अम्पीन्। 8 होर्दे माइसिया योङ्देबे थमयू मो त्रोआसने गीलीदे। 9 मून्दे पावलदे दर्शनत्या तङ्दे-माकेडोनियाजे मी त्या मेर्देबे ङूने बिन्ती चीन्न ख्य, “माकेडोनियाने ख, मेस्ये ङीने तोङ्मी।” 10 कन्छ्वाब ङूदे अम्ब दर्शन तङ्दे, तुरुन्तै ङी माकेडोनिया प्रने छ्योत्दे। थमयूने सूगब खबर स्य्वेने परमेश्वरदे ङीने क्व ख्यङ् यब पो ङीदे पक्क रुप्दे था प्रेत्दे। फिलिप्पीने लिडियाजे विश्वास 11 होर्दे ङीयू त्रोआसदे क्यू जहाज टदेबे सूजो सामोथ्राकेतेले गीलीदेबे नैदेरेदे नियापोलिस फ्योरदे, 12 हैयादे फिलिप्पीने फ्योरदे, हम्ब माकेडोनियाजे मूख्य सहर ख्य। अम्ब सहर रोमीयूजे हुकुमने चील्लीन ख्य। ङी हम्ब सहरने तेदिन टूङ्दे। 13 जेम्से आराम टूङब दिनने सहरजे ख्योदे फीने होङ् नने गीलीदे, चेनेयलो हैयाने प्रार्थना चेब ने ख्यङ् मन्देबे ङी हैयाने टूङ्देबे फूङ् क्यूरब मदीयूप्रे बात् सेत्दे। 14 जेम्से थिआटीरा सहरने टूङब मदी, बैजनी कोलाजे छोङ् चेब लिडिया मीन् ख्यब ईश्वर मन्देब मदीत्यादे ङीजे वचन ङ्यीन्दे। पावलदे क्यमब पो ङूदे सेम् पीन्देबे ङ्यीन्स्य यदेबे प्रभुदे ङूजे सेम् पूक्मीदे। 15 कन्छ्वाब ङू मेस्ये ङूजे कीम्ने ख्यब क्वाजेने बप्तिस्मा क्यूत्दे, हन्छ्वाब ङूदे ङीने बिन्ती चीत्दे, “कादेये नमयूदे ङैने प्रभुने विश्वास चेब मदी मन्देयलो ङैजे कीम्ने रदेबे टूङ्ख।” मेस्ये ङूदे ङीने ख यदेबे कर्चङ्दे। पावल मेस्ये सिलास झ्यालखानने 16 त्याफे ङी प्रार्थना चे नेने प्रेनूब ङीयूदे त्वोम त्या तूदे। ङूने दुष्ट आत्मा लादीक ख्य मेस्ये हम्ब दुष्ट आत्माजे बोङ्दे ङूदे मीजे भाग्य स्योत्देबे रङ्से मालिकयूने कूम नोर् कम्तीदीदेबे पीन ख्य। 17 हम्ब मदी पावलप्रे ङीजे ङ्ये-ङ्ये रदे मेस्ये येरे यदेबे पारा पूत्दे, “अम्ब मीयू पात्ता केन् परमेश्वरजे सेवा चेबयू ख्यङ्। थमयूदे नमयूने मुक्तिजे बारेने स्योन्न ख्यङ्।” 18 ङूदे कूम दिनसेमे येरे चीत्दे। होर्दे पावलदे झेचेर् रदेबे ङ्येलम् ल्वादेबे हम्ब दुष्ट आत्माने यदे, “येशू ख्रीष्टजे मीन्ने ङ नने ङूजे ङ्वदे योङ्ब यदेबे आज्ञा चीक्क्य।” होर्दे हम्ब दुष्ट आत्मा हन्छ्वाबने योङ्गी। 19 जेम्से मालिकयूदे थमयूजे नोर् कमेदेबे लम् मलेब पो था प्रेत्देबे थमयूदे पावल मेस्ये सिलासने चूङ्देबे बजारजे चोक्ने न्याय चेने हुकुम चील्लेबयू ट्याने स्येङ्गीदे। 20 होर्दे थमयूने सहरजे हाकिमयू ट्याने रेत्देबे यदे, “अम्ब मीयू यहूदी ख्यङ्, थमयूदे ङीनजे सहरने उपद्रव चीत्देबे छरङ् पीन ख्यङ्। 21 थमयूदे ङीजे रोमजे ऐन कानूनने त्वब छ्यप् लोम्मीन ख्यङ्।” 22 मीहुलदे पावल मेस्ये सिलासने छी चीत्देबे सहरजे हाकिमयूदे थमयूजे होतेब कोला प्र्याङ्देबे थमयूने पीर्कदे ठरेब आज्ञा पीन्दे। 23 मीयूदे थमयूने पीर्कदे बेस्से ठरेमेस्ये झ्यालखानने स्योप्पीदे, मेस्ये झ्यालखानजे हाकिमने अम्ब कैदीयू योङ्बने चेलाबे ले यदेबे यदे। 24 यर हुकुम प्रेत्देबे ङूदे थमयूने झ्यालखाना नङ्ने कूदीदेबे थमयूजे तोप् स्यङ्जे फोङ्यूने च्वादेबे ख्यादे। 25 तर अध-मून्तेले पावल मेस्ये सिलास प्रार्थना चीदे-चीदे परमेश्वरजे भजन पून्न ख्य, मेस्ये सूजो कैदीयूदे हम्ब भजन ङ्यीन्न ख्य। 26 होर्दे त्याफेने सोरो केन् सूङ्गू गीली, मेस्ये झ्यालखानजे जायू लीङ्दे होर्दे तुरुन्तै हैयाने ख्यब ख्योयू क्वाने पूग्गी, मेस्ये कैदीयूने ख्यायेब सङ्लोयू क्वाने फाइ। 27 झ्यालखानजे हाकिम ङ्यूम्यादे थेल्रदे, मेस्ये झ्यालखानजे ख्योयू पूक्नब तङ्देबे कैदीयू क्वाने छ्योङ्क्यो मन्देबे ङूदे रङ्सेदे रङ्सेने सेस्स्ये मन्देबे पार्च्या स्वाटै थेन्दे। 28 तर पावलदे के केन् योन्देबे येरे यदेबे पारा पूत्दे, “नदे रङ्सेने चैये नाश अन्चील्लाची, चेनेयलो ङी क्वाने येनेने ख्यङ्।” 29 बत्ती स्यदेबे ङू थे-नेन्देबे नङ्ने रदे, मेस्ये फदेबे फ्रीके-फ्रीके पावलप्रे सिलासजे खूम्ने पून्छ्यल् क्यूत्दे। 30 थमयू फीने रेत्देबे ङूदे यदे, “उद्धार प्रेने ङैदे च चे पर्दीय?” 31 थमयूदे यदे, “प्रभु येशू ख्रीष्टने विश्वास ची, मेस्ये नदे उद्धार प्रेक्क्य-न मेस्ये नैजे म्हीत्तीदेये।” 32 थमयूदे ङूने मेस्ये ङूजे कीम्ने ख्यबयू क्वानेने प्रभुजे वचन स्योम्मीदे। 33 मून्दे हन्छ्वाबने ङूदे थमयूने कूदीदेबे म ठूमीदे। होर्दे ङूप्रे ङूजे कीम् म्हीत्तीदे खात्याने बप्तिस्मा कीन्दे। 34 होर्देङ्येदे थमयूने कीम्ने रेत्देबे थमयूजे खूम्ने चसे हीम्मीदे, मेस्ये परमेश्वरने विश्वास चीत्दे यब पोने थमयूजे कीम् म्हीत्ती क्वाप्रेने ङू सोरो सूग्दे। 35 तर म्या तङमेस्ये सहरजे हाकिमयूदे सिपाईयूने अम्ब हुकुम पीन्देबे कूल्बीदे, “हम्ब मीयूने क्यापी।” 36 होर्दे झ्यालखानजे हाकिमदे पावलने अम्ब पो स्योत्दे, “सहरजे हाकिमयूदे नमयूने क्यापी यदेबे हुकुम पीन् ख्यङ्। होरेक्यूत्देबे जेम्से योङ्देबे शान्तिप्रे प्र।” 37 तर पावलदे थमयूने यदे, “ङी रोमजे नागरिकयूने दोषी अन्ठरदीलाबेने थमयूदे मीयूजे खूम्ने ठरीदे, मेस्ये झ्यालखानने स्योप्दे, जेम्से ङीने नङ्सूने योम्बे मेऔ? अम्ब क्यूर अङ्खू। थमयू रस्य मेस्ये ङी योन्गीस्य।” 38 हम्ब सिपाईयूदे हाकिमयूने अम्ब पो स्योत्दे। थमयू रोमजे नागरिकयू टोङ् यब पो तदेबे थमयू फैगदे। 39 थमयूदे रदेबे पावल मेस्ये सिलासने क्षमा स्यदे, मेस्ये थमयूने फीने कूदीदेबे सहर क्यादेबे प्र यदेबे बिन्ती चीत्दे। 40 थमयू झ्यालखानदे फीने योङ्देबे लिडियाजे कीम्ने गीलीदे, मेस्ये अत-अची च्योन्यूप्रे तूदेबे थमयूने आँट पीन्देबे गीलीदे। |
Ghale New Testament © Nepal Bible Society, 2011.
Nepal Bible Society