मूल स्यूस्स्यायूजे कामजे किताब 15 - घले नयाँ करारयरूशलेमजे पात्ता केन् सभा 1 कोइ मीयूदे यहूदियादे एन्टिओखियाने रदेबे अत-च्योन्यूने येर शिक्षा पीनने सुरुचीत्दे, “नमयू मोशाजे पेग अनुसार खतना अन्चीत्दे यलो नमयूजे उद्धार क्यूर अन्खू।” 2 पावल होर्दे बारनाबास थमयूप्रे अम्मीलीदेबे च्य-फा मेस्ये सवाल-जवाफ क्यूर ङ्येदे, हैयाजे अत-च्योन्यूदे पावलप्रे बारनाबास मेस्ये सूजोयू कोलेने अम्ब पोजे फैसला चेने मूल स्यूस्स्यायू मेस्ये एल्डरयूट्याने यरूशलेमने प्रजे लागि सेल्दे। 3 मण्डलीजे सदस्ययूदे थमयूने हैयादे कूल्बीदे। थमयू फोनिके मेस्ये सामरिया क्यूत्देबे प्रेनूब यहूदी तेब मीयूदे प्रभुने ग्रहण चेब पो थमयूने छ्यीप्-छ्यीप् स्योम्मीदे। अम्ब खबरदे होनेजे अत-च्योन्यूने सोरो आनन्द क्यूत्दे। 4 कन्छ्वाब थमयू यरूशलेमने फ्योरदे, हन्छ्वाब थमयूने मण्डलीजे, मूल स्यूस्स्यायूदे मेस्ये एल्डरयूदे स्वागत चीत्दे। परमेश्वरदे थमयूने चीम्मेब साप्ता पोयूजे बयान थमयूदे हैयाने चीत्दे। 5 फरिसी हुलजे कोइ विश्वास चेब मीयूदे मेर्देबे यदे, “यहूदी तेब मीयूजे लागि खतना चे पर्दीय मेस्ये मोशाजे नियम मन्दे पर्तीय यब आज्ञा थमयूने पीन पर्दीय।” 6 अम्ब बारेने विचार चेने मूल स्यूस्स्यायू मेस्ये एल्डरयू फूङ् क्यूत्दे। 7 कूम सवाल-जवाफ क्यूर ङ्येदे पत्रुसदे मेर्देबे थमयूने यदे, “च्योन्यू, नमयूने थाने ख्यङ्, सुरुजे दिनयूने केर्बे परमेश्वरदे ङैजे ङूर्दे यहूदी तेब मीयूदेये सूगब-खबरजे वचन ङ्यीन्देबे विश्वास चीस्स्य यदेबे नमयूजे अन्द्रने ङैने सेल्दे। 8 सेम्जे पो था प्रेब परमेश्वरदे ङीनने पीनप्र पवित्र आत्मा यहूदी तेब मीयूनेये पीन्दे। ङूदे थमयूने रङ्से मी बन्तीदे। 9 परमेश्वरदे थमयू प्रे ङीनजे अन्द्रने क्वानेने सागपूजा अन्ची, तर थमयूजे सेम्जे विश्वास चेब क्यूत्देबे शुद्ध चीम्मीदे। 10 होरेक्यूत्देबे स्यूस्स्यायूजे पैङैने अम्ब जूवा प्लेस्स्ये पीन्देबे चेने परमेश्वरजे जाँच चे? अम्ब जूवा ङीनजे मेमेयूदे ये प्ले अन्खू होर्दे ङीनदेये प्ले अङ्खू। 11 तर ङी विश्वास चीक्क्य, प्रभु येशूजे दयादे ङीने मुक्ति पीन ख्यङ्, होरप्रने थमयूदेये प्रेख्य।” 12 होर्दे सभाने ख्यब क्वाने पारा अम्पूल्लाबे टूङ्दे, यहूदी तेब मीयूजे अन्द्रने परमेश्वर थमयूप्रे क्यूत्देबे कर च्यूनूयू मेस्ये हार्मन्देब कामयू चीत्दे हम्बजे बयान बारनाबास प्रे पावलदे स्योत्दे। थमयूदे अम्ब बयान ङ्यीन्दे। 13 थमयूदे क्यमजेन ङ्येदे याकूबदे येरे यदे, “च्योन्यू, ङैजे पो ङ्यीनो, 14 परमेश्वरदे रङ्से मीन्जे लागि यहूदी तेब मीयूट्यादे जातत्या सेलब कृपा चीत्दे यब पो सिमोन पत्रुसदे ङीनने स्योदे। 15 अम्ब पोप्रे अगमवक्तायूजे वचनये मील्ले ख्यङ्, यदेबे लिख्दीये ख्यङ्, 16 ‘अम्ब पो ङ्येदे ङ ल्वारीय, मेस्ये दाऊदजे हूलेब कीम् फेरि बन्दीय, हम्बजे रूलेब कीम् ङ फेरि बन्दीमीय, मेस्ये फेरि हम्ब बोल्यो बन्दीय, 17 मेस्ये बाँकी मीयू क्वादेने परमेश्वरने मल खूस्य, ङैजे मीन्ने क्वब यहूदी तेबमीयू क्वादेने ङूने मल खूस्य। 18 अम्ब पो परमप्रभुदे य ख्यङ्, सूदे तोङ्बोमेस्येने अम्ब पोयू स्येलाचीते ख्यङ्।’ 19 “होरेक्यूत्देबे ङैजे फैसला अम्ब ख्य, परमेश्वरतेले ल्वारब यहूदी तेब मीयूने ङीनदे छरङ् अम्पीन्लाचीदे, 20 तर थमयूने अम्ब पो लिख्दे पर्दीय, मूर्तिने चेर्दीदेबे अशुद्ध क्यूरेब चसे अन्चलाची, वेश्य क्यूर अन्क्यूर्, नीजी चेर्देबे सेब रोलाजे स्य मेस्ये का अन्चलाचीस्स्य। 21 चेनेयलो मीयूङ्जे पूस्तमेस्येने सहरजे पीछीने मोशाजे नियमजे प्रचार क्यून्न ख्यङ्, चेनेयलो अम्ब आराम टूङ्ब दिन सभा-कीम् क्वानेने येतार्ने छ्योन्न ख्य।” सभाजे फैसला 22 होर्दे मूल स्यूस्स्यायू, एल्डरयू मेस्ये मण्डलीजे कवादेने मील्लीदेबे पावल मेस्ये बारनाबासप्रे एन्टिओखियाने कूल्बेजे लागि कोइ मीयूने सेलब ज्य थेदे। थमयूदे मण्डलीजे मुख्य मीयू नङ्ने मी ङ्ही यहूदा यब बारसाबास मेस्ये सिलासने अम्ब कामजे लागि सेल्दे। 23 थमयूदे हम्बयूप्रेप्रे अम्ब चिट्ठी चङ्पीदे: ‘एन्टिओखिया, सिरिया प्रे किलिकियाने टूङब यहूदी तेब विश्वासीयूने, मूल स्यूस्स्यायू मेस्ये एल्डरयूजे नमस्कार ख्यङ्। 24 ङीदे त ख्यङ्, ङीजे अन्द्रदे गीलेब कोइ कोइयूदे बीयूङ् शिक्षा पीन्देबे नमयूने छरङ् पीन्दे यब पो ङीदे त ख्यङ्। तर ङीदे हम्ब मीयूने कूल्बे दी। 25 होरेक्यूत्देबे ङीदे सभाने क्वाजे मोतो क्यूर अनुसार कोइ मीयूने चून्दीदेबे थमयूने ङीनजे छेब बारनाबास मेस्ये पावलप्रेप्रेने नमयू ट्याने कूल्बेब ङीने ज्य थेको। 26 पावल मेस्ये बारनाबासदे प्रभु येशू ख्रीष्टजे लागि धेन्ने रङ्सेजे जीया प्रब कामये फर्दे। 27 होरेक्यूत्देबे ङीदे यहूदा प्रे सिलास कूल्बे ख्यङ्। ङीदे लिख्देब पो थमयूदे नमयूने ङूर्देये स्योक्क्य। 28 चेनेयलो पवित्र आत्मा मेस्ये ङीयूने अम्ब ठीक थेदे, यी अम्ब चैतेब पोयू यली सूजो थेप् क्वी नमयूने प्लेस्स्ये पीन अन्क्यूर्। 29 अम्ब मूख्य पोयू ख्यङ्- मूर्तिने बलि चेर्देब चसे अन्चलाची, का मेस्ये नीजी चेर्देबे सेब रोलाजे स्य अन्चलाची मेस्ये वेश्य काम अन्चील्लाची। अम्ब पोयू मन्दीदेयलो नमयूने ज्य क्यूक्य। बिदा।” 30 प्रने छूर्देमेस्ये थमयू एन्टिओखियाने रदे, मेस्ये सभाने मीयू फूङ् पूत्देबे हम्ब चिट्ठी पीन्दे। 31 चिट्ठीने लिख्दीयेब अर्तीजे पो छ्योत्देबे थमयू सूग्दे। 32 यहूदा मेस्ये सिलास रङ्सेयूये अगमवक्ता क्यूरबदे अत-च्योन्यूने वचनदे कूम अर्ती पीन्देबे थमयूने बोल्यो चीम्मीदे। 33 अम्बयूदे तेदिन हैयाने टूङमेस्ये, हैयाजे अत-च्योन्यूदे अम्बयूने कूल्बेब मीयू ट्याने असी पीन्देबे कूल्बीदे। 34 [तर सिलासने हैयानेने टूङब ज्य थेदे।] 35 पावल मेस्ये बारनाबासदे प्रभुजे वचनदे शिक्षा पीन्दे प्रचार चीदे-चीदे सूजो कूम मीयूप्रे एन्टिओखियाने टूङ्दे। पावल प्रचार चेने गीलेब 36 तेदिनङ्येदे पावलदे बारनाबासने यदे, “ख, कम्ब कम्ब सहरने प्रभुजे वचन ङीनदे प्रचार चे ख्य हम्ब सहरयूने ल्वाबदेबे अत-च्योन्यूने कर-क्यून्न टोङ् लेप्पे।” 37 बारनाबासदे मर्कूस यब यूहन्नाने थमयूप्रेप्रे टेल्गेब सेम् चीत्दे। 38 तर पावलदे मर्कूसप्रेप्रे टेल्केब ज्य अन्थे, चेनेयलो ङू पामफिलियादे थमयूप्रे छूर्दीदे गीले ख्य, मेस्ये थमयूप्रे कामने अङ्गीले ख्य। 39 थमयूजे अन्द्रने सेम् अम्मील्लीदेबे छूर्तीदे मेस्ये बारनाबासदे मर्कूने प्रे-टेल्देबे साइप्रस्तेले गीलीदे। 40 तर पावलदे सिलासने सेल्दे, होर्दे अत-च्योन्यूदे परमेश्वरजे अनुग्रहने सूम्दीपीदेबे हैयादे छूर्दीदे। 41 मण्डलीयूने बोल्यो चीत्देबे थमयू सिरिया मेस्ये किलिकियाजे नेयू ट्वादे। |
Ghale New Testament © Nepal Bible Society, 2011.
Nepal Bible Society