३ यूहन्ना 1 - घले नयाँ करार1 छेब ख्योन् गायस, ङ, एल्डरदे नने तम्दम् प्रेम चीक्क्य। 2 सोरो छेब ख्योन्, नैजे साप्ताकूरूने सोरो ज्य क्यूस्स्य यदेबे प्रार्थना चीक्क्य, मेस्ये नैजे आत्मा ज्य ख्यप्रने ङ्वनेये न-छ अन्क्यूस्स्य। 3 परमेश्वरदे केर्बे जीया चब सेम् पर्दे होरप्र जीया नदे चेन ख्यङ् यब पोजे गवाही विश्वास चेब अत-च्योन्यू रदेबे यब तदेबे ङैजे सेम् सोरो आनन्द क्यूर ख्यङ्। तम्दम्ने न परमेश्वरजे सत्य लम्ने प्र ख्यङ्। 4 ङैजे च-चीमीयू परमेश्वरजे सत्य लम्ने प्रेन ख्यङ् यब पो त-प्रेप्प अम्ब यली सूजो थेप् आनन्द क्यूरब पो ङैजे लागि सूजो चला क्यूर ख्व स्व? 5 छेब ख्योन्, नदे ईमानदार क्यूत्देबे चै काम चीत्दे, क्वाने विश्वास चेब च्योन्यूजे लागि सेवा चीत्दे, खास रुप्दे स्येने अन्स्येब मीयूजे लागि चीत्दे। 6 थमयूदे मण्डलीजे मीयू खूम्ने नैजे प्रेमजे बारेने गवाही पीन ख्यङ्। परमेश्वरने सेम् पर्तेब तर्तीप्दे थमयू लम् लादीदे प्रजे लागि ज्य सूबीस्त मील्लीमीदे यलो नदे सोरो ज्य काम फर्क्य। 7 चेनेयलो परमेश्वरने विश्वास अन्चेब मीयूजे चैत्याये अन्टेल्लाबे थमयू येशू ख्रीष्टजे लागि प्रने योङ्ये ख्यङ्। 8 येरेक्यूत्देबे सत्यजे लागि ङीनप्रे तोङ्देबे काम फरब क्यूर खूस्य यदेबे, येर मीयूने दोङ्मे पर्तीय। 9 ङैदे मण्डलीने पो त्या ङ्ही लिख्दीये ख्य, तर नमयू नङ्ने केन् क्यूत्दीङ्रब डियोत्रिफसदे ङैजे हक स्वीकार चीस्स्ये त्वो। 10 येरेक्यूत्देबे कन्छ्वाब ङ रीय, हम्बदे फर्नब कामयूजे पो योन्क्य। ङीनयूजे विरुद्धने कर अन्ज्य पोयू ङूदे ये-ये प्रख्यङ्। होरे चीत्देये सेम् अन्सेत्देबे ङूदे अत च्योन्यूने स्वागत चे अन्ङ्यीन्, मेस्ये थमयूदे स्वागत चीतीङ् रब मीयूनेये स्वागत चीस्स्ये अम्पीन ख्यङ्, मेस्ये थमयूने मण्डलीदे फीने योम्बे ख्यङ्। 11 छेब च्योन्, अन्ज्य पोजे के अन्थालाची, तर सोरो ज्य पोजे के था। सूदे ज्य चीक्क्य, हम्ब परमेश्वरजे ख्यङ्, सूदे अन्ज्य काम फर्क्य हम्बदे परमेश्वरने अन्तङ् ख्यङ्। 12 डेमेत्रियसजे बारेने मीयू क्वादेने ज्य य ख्यङ्, सत्यदेये होरप्रने गवाही पीन ख्यङ्। ङीदेये गवाही पीन्क्य, ङीयूजे गवाही तम्दम् ख्यङ् यदेबे नमयूदे स्ये ख्यङ्। 13 ङैदे कूम पोयू लिख्देपर्दे ख्य, तर मसी मेस्ये कलमदे नने हम्ब पोयू लिख्देस्ये अम्मन्। 14 नेप्रे छ्योटोने त्वब आशा चीन्न ख्यङ्, मेस्ये ङीन तूदेबे बात् सेस्स्ये। 15 नने शान्ति क्यूस्स्य। अने ख्यब ख्योन्यू क्वादेने नने नमस्कार य ख्यङ्। होने ख्यब ख्योन्यूने मीन् क्यूदेबे नमस्कार येमी। |
Ghale New Testament © Nepal Bible Society, 2011.
Nepal Bible Society