२ तिमोथी 4 - घले नयाँ करार1 परमेश्वरजे खूम्ने होर्दे सोम्बोयूजे मेस्ये सीयेबयूजे न्याय चेने रब ख्रीष्ट येशूजे खूम्ने, मेस्ये ङू रीय होर्दे राज्य चीट्टीय यब पोने ध्यान् पीन्देबे ङ नने बोङ्बे आज्ञा चीक्क्य, 2 परमेश्वरजे वचन स्य्वेने बील-अबील तयार क्यून्नू। धेरेन्बे शिक्षा पीन्देबे अर्ती पीन्, ङर्मी, आँट पीन्। 3 मीयूदे जेम्से तम्दम् शिक्षा सैदे अन्ख्वब बीलये रीय। थमयू रङ्सेने सेम् पर्देब पोयूत्या ङ्यीन्तीङ्रीय मेस्ये थमयू रङ्सेदे सेम् पर्देब पो लोम्मेबयू कूम फूङ् पूक्क्य। 4 थमयूदे सत्य पोयू अङ्-ङ्यीन्लाबे पार्त्या योर् प्रीय मेस्ये दन्त्य कथायूत्या ङ्यीनने सेम् पर्तीय। 5 तर साप्ता पोने न बोल्यो क्यूरो। छरङ् सैदी, वचन स्य्वेब काम ची, नदे चे पर्देब सेवाजे काम पूरा ची। 6 चेनेयलो ङब बलि क्यूर मल्न ख्यङ्। जेम्से नमयूप्रे छूर्दीदे प्रब ङैजे दिन ट्याराङ् फ्योर ख्यङ्। 7 ङैदे चेलाबे लडाइँ जीङ्क ख्यङ्, होर्दे ग्यब काम पूरा चीक्क ख्यङ्। ङैदे ङैजे विश्वासने चेलाबे जूक्तीदे हीते ख्यङ्। 8 जेम्सेमेस्ये ङैजे लागि धार्मिक्ताजे मुकुट तयार चीत्देबे हीते ख्यङ्। ठीक न्याय चेब प्रभुदे हम्ब दिनने ङैने अम्ब मुकुट कूमीय। ङैनेत्या दी, तर फेरि ङू रब लम् लेन्नब जीती क्वानेने पीन्क्य। रङ्सेजे नङ्सू पोयू 9 खूदासेमे छिट्टो ङैट्याने ख। 10 दीनीजे अम्ब संसारने प्रेम चीत्देबे डेमासदे ङैने पङ्गीदेबे थेसलोनिके गीली। क्रेसेन्स गलातियाने मेस्ये तीतस ब दलमातियाने गीले ख्यङ्। 11 लूकात्या ङैप्रे ख्यङ्। मर्कूस मल्देबे नेप्रेने सीक, चेनेयलो ङूदे ङैजे सेवा सोरो ज्य चे ख्यङ्। 12 तर ङैदे तुखियसब एफिससने कूल्बे ख्यङ्। 13 त्रोआसजे कार्पस ट्याने पोङ्येब ङैजे कोला न रब प्रे टेल्सी, ङैजे किताबयूये टेल्सी, मेस्ये मूख्य पोब खूस्स्यने लिख्दीयेब किताबयू टेल्सी। 14 तम्बजे काम चेब मी अलेक्जेन्डरदे ङैने सोरो अन्ज्य चीत्दे। ङूदे चेब कामजे फल प्रभुदेने ङूने पीन्क्य। 15 ङीनदे स्य्वेब पोने ङूदे सोरो विरोध चेख्यङ्, होरेक्यूत्देबे नमयूये ङूप्रे चङ्ख क्यूत्देबे टूङ्। 16 ङैजे पात्ता खूम्जे मुद्दा चीङ्ब सूदेये ङैने अन्तोङ्मी, तर क्वादेने ङैने पोङ्यीदे। अम्ब पोजे दोष थमयूने अन्लादीस्य। 17 तर यहूदी तेब मीयू क्वादेने ङ्यीन प्रेस्स्य यदेबे प्रभू ङैप्रे-प्रे क्यूत्दे, मेस्ये पूरा रूप्ने वचन प्रचार चेब शक्ति ङैने पीन्दे। येर्बे ङूदे ङैने डेन्याजे ङूरदे जूक्दीमीदे। 18 प्रभुदे ङैने साप्ता खराब थोकयू ट्यादे जूक्दीमीय, ङूजे स्वर्गजे राज्यने स्योल्गेजे लागि ङैने उद्धार चीम्मीय। ङूजे येतार्ने महिमा क्यूस्स्य। आमेन। आखिरीजे नमस्कार 19 प्रिस्किला, अकिलासने होर्दे ओनेसिफरसजे कीम् म्हीतीने नमस्कार येमी। 20 इरास्तस कोरिन्थने टून ख्यङ्। त्रोफिमस सोरो नेनब बीलने ङैदे मिलेटसने पोङ्ये ख्य। 21 खूदासेमे सर्क रयली खूम्ने रने बोङ् ची। युबुलसदे नने नमस्कार येबे ख्यङ्, पुडेस, लिनस, क्लौडिया मेस्ये होरप्रने अत-अची च्योन्यू क्वादेने नमस्कार येबे ख्यङ्। 22 प्रभु नैजे आत्माप्रे क्यूस्स्य। नमयू क्वाप्रेने परमेश्वरजे अनुग्रह क्यूस्स्य। |
Ghale New Testament © Nepal Bible Society, 2011.
Nepal Bible Society