२ तिमोथी 3 - घले नयाँ करारआखिरीजे दिनयूने परमेश्वर अम्मन्देब 1 तर आखिरीजे दिनने सोरो फत्या अन्ज्य सेमेयू रीय यदेबे नदे था प्रेन्नू। 2 चेनेयलो मीयू रङ्सेने-त्या माया चे, नोर्जे लोभ चे, केन् त्वे, ढीपी चे, मीजे न प्वे, प मजे आज्ञा अम्मन्दे, बैगुनी मेस्ये पवित्र त्वब, 3 सूनेये माया अन्चेब मेस्ये क्षमा अम्पीन, न प्वे, रङ्सेने काबूने येन अङ्ख्वब, ज्य पोने घिन चेब, 4 धोका पीनब, उत्ताउलो, केन् त्वोत्देबे प्रब मेस्ये परमेश्वरने अम्मन्दीलाबे मोज-मज्जा चेने सेम् पर्तेब क्यूक्क्य। 5 थमयू परमेश्वर मन्दे यदेबे ङूर्देत्या यीय, तर परमेश्वरजे शक्तिने अम्मन्देब क्यूक्क्य। यर मीयूप्रे आलाक् क्यूरो। 6 चेनेयलो थमयू नङ्ने कोइ-कोइ कीम् कीम्ने क्योदेबे पापने बेस्से फस्तीदेबे कूम थर्जे अन्ज्य पाप कामजे लागि सेम् चेब मदीयू रङ्सेजे लाने कीन्क्य। 7 हम्ब मदीयूदे लोमब येतार्ने लोम्क्य, तर सत्यजे ज्ञान यलो कलङ्बेये स्ये अन्खू। 8 यान्नेस मेस्ये याम्ब्रेसदे मोशाजे विरोध चेप्र, अम्ब मीयूदेये सत्यजे विरोध चीक्क्य। अम्ब मीयू बुद्धि नोङ्ये ख्यङ् होर्दे थमयूजे विश्वास लूच्च ख्यङ्। 9 तर थमयू कूम टीक्दे खूस्ये त्वो, चेनेयलो यान्नेस मेस्ये याम्ब्रेसजेप्र थमयूजे मुर्ख काम खोत्तादेने था प्रेक्क्य। तिमोथीने पावलजे आज्ञा 10 तर नदे ङैजे शिक्षा, आनि-बानी, ङैजे जीयाजे उदेश्य, ङैजे विश्वास, टेम ख्वब, ङैजे प्रेम, अन्-आतीलाबे रेन ख्वब नने था ख्यङ्, 11 एन्टिओखियाने, आइकोनियनने मेस्ये लुस्त्राने ङैदे प्रेब सतनम् मेस्ये सकस्यू नने था ख्यङ्, येरेक्यूल्लीने प्रभुदे अम्ब साप्ता सतनम् मेस्ये सकस्यूट्यादे ङैने जूक्तीमीदे। 12 ख्रीष्ट येशूने क्यूत्देबे परमेश्वरने सेम् पर्तेब जीया चब सेम् चेयू क्वादेने सतनम् प्रेने प्रेक्क्य। 13 तर दुष्ट मेस्ये ठग्दे मीयूदे सूजोने ठग्दीब रङ्सेये ठग्दीगीय, मेस्ये थमयू झन् थेप् दुष्ट क्यूप्पीय। 14 तर नदे लोम्कब मेस्ये चेलाबे विश्वास चीक्कब अम्ब सत्य पोयूने बूल्ल्यो क्यूत्देबे विश्वास चीन्नू। हम्ब सूप्रे लोम ख्य, नने थाने ख्यङ्, 15 मेस्ये नदे चीदमेस्येने पवित्र-धर्मशास्त्रजे पो स्ये ख्यङ्, अम्बदे ख्रीष्ट येशूने विश्वास चीप्प प्रेब मुक्तिजे लागि नने शिक्षा पीन खूइय। 16 साप्ता धर्मशास्त्र परमेश्वरजे आत्माजे शक्ति प्रेत्देबे र ख्यङ्, अम्ब शिक्षा पीनने, अर्ती पीनने, भुल सूधारदेने, मेस्ये ज्य जीयाजे तालिम पीनने कूम फाइदाजे क्यूक्य। 17 येर्बे परमेश्वरजे मीयू क्वादेने साप्ता ज्य कामयू चेलाबे चे ख्वब सिद्ध क्यूस्स्य। |
Ghale New Testament © Nepal Bible Society, 2011.
Nepal Bible Society