२ तिमोथी 2 - घले नयाँ करार1 येरेक्यूत्देबे, ङैजे च तिमोथी, ख्रीष्ट येशूने ख्यब अनुग्रहने बोल्यो क्यूरो। 2 नदे कूम साक्षीयूजे खूम्ने ङैदे यब चे पो तख्यङ्, हम्ब तब पोयू नदे सूजो मीयूनेये लोम्मे ख्वब भर्चे ख्वब मीयूने सूम्दीपी। 3 ख्रीष्ट येशूजे ज्य सिपाईप्र क्यूरने ङीप्रे छरङ् चेने तयार क्यूरो। 4 सेनाने भर्न क्यूक्कब सिपाई सूजो कामने अल्मल् अन्क्यूर्, चेनेयलो ङूने भर्न चेब मीने सूग्ला चेब ङूजे उदेश्य क्यूक्क्य। 5 खेल क्याब मीदे खेलजे नियम अनुसार अङ्-क्यालो ङूदे इनाम प्रे अन्खू। 6 छर्ङ चीत्देबे खेती फरब मीदेने बलीजे पात्ता खूम्जे भा प्रेपर्दीय। 7 ङैदे च यीय हम्ब विचार ची, चेनेयलो साप्ता पोने क्व ख्वब दीमाग प्रभुदे नने पीन्क्य। 8 सीइदेबे सोम्बो क्यूरेब दाऊद वंशजे येशू ख्रीष्टने ह्वे ची, ङैदे स्य्वेब सूगब खबर अम्बने ख्यङ्। 9 हम्ब सूगब खबरजे लागि ङैदे सकस् भोक्तीन ख्यङ् मेस्ये अपराध चीक्कब मीप्र सङ्लोदे ख्याये ख्यङ्। तर परमेश्वरजे वचन सङ्लोदे ख्या अन्खू। 10 येरेक्यूत्देबे सेल्कबयूजे लागिने ङ साप्ता पोने सैदीय, मेस्ये थमयूदेये कलङ्बेये अन्जेनब महिमा प्रेने ख्रीष्ट येशूने ख्यब मुक्ति प्रेखूस्य। 11 अम्ब पो पक्क ख्यङ्, कादेये ङीन ङूप्रे सीये ख्यङ् यलो, ङूप्रेने ङीनये सोम्बो क्यूक्क्य, 12 ङीनदे सैदीदेयलो, ङीनये येशूप्रेने राज्य चीक्क्य, ङीनदे ङूने स्वीकार अन्चीत्देयलो, ङूदेये ङीनने स्वीकार अन्ची। 13 ङीन भर्-पर्दे ख्वब त्वोलीने, ङू भर् पर्दे ख्वब क्यून्नीय, चेनेयलो ङूदे रङ्सेने अम्मन्दे चे अन्खू। परमेश्वरदे चून्तेब काम फरब मी 14 अम्ब पो थमयूने चेलाबे कोलाबे चीम्मी, पो त्या-त्या चूङ्देबे स्वाल्-जवाफ अन्चील्लाची यदेबे थमयूने परमेश्वरजे खूम्ने आज्ञा पीन्। येर स्वाल्-जवाफजे पोदे भलो अन्क्यूर्, तर पो तब मीयूने हानीत्या चीक्क्य। 15 त्वा अम्पर्देब तम्दम्जे वचनने चेलाबे चील्लीदेबे काम फरब मीप्र क्यूत्देबे रङ्सेदेने परमेश्वरजे मी क्यूर लायकजे क्यूरने खूदासेमे बोङ् ची। 16 परमेश्वर अम्मन्देब मूर्ख पोयू क्यापी, चेनेयलो अम्बदे मीयूने परमेश्वरट्यादे झन् थेप् चीन्तङ् चीक्कीय। 17 थमयूजे पो ओखन छ्यायेब म प्र झन् थेप्-थेप् नङ्ने गर्दीबीय। थमयू नङ्ने हुमेनियस मेस्ये फिलेतस ख्यङ्। 18 सीबदेबे फेरि सोम्बो क्यूरब काम मीयूङ्ने क्यूर जेङ्क ख्यङ् यदेबे थमयू तम्दम्जे पो क्यापीदेबे सूजो पार्त्यादे गीले ख्यङ्। कोला मीयूजे विश्वासने थमयूदे ढल्-पल् चीन्न ख्यङ्। 19 तर परमेश्वर रङ्सेदेने लैदेब जा बोल्योने टूनीय, मेस्ये हम्बने येर छाप लैदीये ख्यङ्, “प्रभुदे रङ्से मीयूने स्येय” मेस्ये “प्रभुजे मीन् कीनब मीयू क्वादेने धर्म प्वेब कामयू अन्चीस्स्य।” 20 फ्योबोजे कीम् केन्ने मर् मेस्ये चाँदीजे कूम थरजे तीयाँयू त्यामे अन्क्यूर् तर स्यङ् प्रे सजेये क्यूक्क्य, मेस्ये कोइ-कोइ तीयाँयू मान् गेसेन् चेब नेने चील्लीय यलो कोइ चीद कामयूजे लागित्या चील्लीय। 21 कादेये नदे रङ्सेने शुद्ध येल्लो परमेश्वरदे नने मान् गेसेन् चेब कामजे लागि चील्ले खूइय। नैजे जीया शुद्ध येन् मेस्ये कीम् नोबोजे लागि शुद्ध, काम लादेब, सूजो साप्ता ज्य कामजे लागिने तयार क्यूक्क्य। 22 येरेक्यूत्देबे चम्च-स्योर्बने रब अन्ज्य इच्छायू क्यापीदेबे शुद्ध सेम्दे प्रभुजे मीन् कीनयू प्रे-प्रे धार्मिकता, विश्वास, प्रेम मेस्ये शान्ति प्रेब उदेश्य टेल्। 23 तर स्येने अन्स्येब मूर्ख पोयूजे स्वाल्-जवाफ अन्चील्लाची। नने थाने ख्यङ्, हम्बदे स्वाल्-जवाफ चीक्क्य। 24 प्रभुजे सेवा चेब मीदे स्वाल्-जवाफ चे अन्क्यूर्, तर ङू क्वाप्रेने दयामाया चे ख्वब, ज्य शिक्षा लोम्मे ख्वब मेस्ये साप्ता पोयू सैदे ख्वब क्यूर पर्दीय। 25 रङ्सेजे विरोध चेयूप्रे चीद क्यूत्देबे ज्य लोम-तन ख्वब क्यूर पर्दीय। होरेक्यूल्लो कादेये परमेश्वरदे थमयूने पश्चात्ताप चीत्देबे ल्वारब सेम् होर्दे सत्य पो चेलाबे क्व ख्वब सेम् पीन्क्य। 26 थमयू चेत्तीदेबे शैतानजे यूयूदे प्ल्यीन्डीय। चेनेयलो शैतानदे थमयूने रङ्सेदे यप्र चेने कैदने येख्यङ्। |
Ghale New Testament © Nepal Bible Society, 2011.
Nepal Bible Society