२ थेसलोनिकी 2 - घले नयाँ करारमुख्य दुष्ट मी 1 अत-अची च्योन्यू, ङीनजे प्रभु येशू ख्रीष्ट फेरि ल्वारबजे बारेने मेस्ये ङूने त्वजे लागि ङीन क्वाने नेत्याने रूप् क्यूरबजे बारेने ङी नमयूने बिन्ती चीक्क्य, 2 यी कोइ अगमवाणी या वचन या चिट्ठीदे प्रभुजे दिन ट्यारङ्ने फ्योर ख्यङ् यदे यलो, हम्ब ङीतेलेदे रब मन्देबे नमयूजे सेम् छ्योटोने केर्चीदे केर्चीदे अन्क्यूल्लाची या नमयू अन्-आतीलाची। 3 नमयूने सूमीदेये कम्ब किसिम्देये धोका अम्पीन्स्य। चेनेयलो खूम् परमेश्वरजे विरोधने उल्क काम अन्क्यूत्दासेमे, मेस्ये या नाशजे लागि खेर्तीयेब मुख्य दुष्ट मी अन्रदासेमे प्रभुजे दिन रस्ये त्वो। 4 ङूदे ईश्वर यब क्वानेने या मीदे पूज्दीनब सेयूजे विरोध चीक्क्य, मेस्ये हम्ब यली रङ्सेने केन् मन्क्य, अन्छ्वासेमे यी परमेश्वरजे मन्दिर नङने टूङ्देबे रङ्सेने परमेश्वर यदेबे यीय। 5 ङ नमयूप्रे ख्यङ्बने अम्ब पोयू क्वाने नमयूने य ख्य, नमयूदे अन्ह्वेर? 6 हम्ब रङ्से बीलने तङ्रस्य यदेबे कम्ब पोदे हम्बने चूजोसेमे कान ख्यङ्, यब पो नमयूने थाने ख्य। 7 हम्ब मुख्य दुष्ट मीदे रङ्से कामयू नङ्सू नङ्सूने सुरु चीन्न ख्यङ्। तर हम्बने काम चीस्स्ये अम्पीनबब अन्हर्तीपीदासेमे अम्बजे दुष्ट कामयू फीने तङ्स्ये त्वो। 8 होर्दे ङ्येदे मुख्य दुष्ट मी योङ्रीय, तर प्रभु येशू रब रङ्सेजे ङूर्जे सदे हम्बने सेक्क्य मेस्ये ङू रब ङूजे महिमाजे ओथ्याङ्दे हम्बने नाश चीक्क्य। 9 हम्ब मूख्य दुष्ट मीदे शैतानजे शक्ति टेल्देबे रीय होर्दे साप्ता थरीजे लूच्च च्यूनूयू मेस्ये हार्मन्देब कामयू चीक्क्य। 10 नाश क्यूरपर्तेब जती क्वानेने हम्बदे दुष्ट किसिमदेने छाक्दीय, चेनेयलो थमयूदे मुक्ति पीनब तम्दम्जे पोने प्रेम चेने मेस्ये हम्बजे रूप्ने जीया चने सेम् अन्ची। 11 येरेक्यूत्देबे परमेश्वरदे थमयूजे लूच्च पोने विश्वास चीस्स्य यदेबे अल्मल् चीप्पेब केन् शक्ति त्या थमयू फ्याने कूल्बीय। 12 येर्बे तम्दम् पोने विश्वास अन्चेबयू, तर पापने आनन्द मन्देयू टक्कनेने दोषी ठर्दीस्य। धेरेन् क्यूत्देबे टूङ् 13 तर प्रभुदे प्रेम चेब अत-अची च्योन्यू नमयूजे लागि ङीयूदे परमेश्वरने येतार्ने धन्यवाद पीनने परदे ख्यङ्, चेनेयलो खूम्देमेस्येने पवित्र आत्मादे पवित्र चीत्देबे मेस्ये तम्दम् पोने विश्वास चीत्देबे मुक्ति प्रेने परमेश्वरदे नमयूने सेल ख्यङ्। 14 अम्बजे लागिने ङीयूदे स्य्वेब सूगब खबरजे लम् क्यूत्देबे नमयूदे ङीन्जे प्रभु येशू ख्रीष्टजे महिमा प्रेस्स्य यदेबे परमेश्वरदे नमयूने कोदे। 15 येरेक्यूत्देबे अत-अची च्योन्यू विश्वासने बोल्यो क्यून्नू, मेस्ये ङीदे क्यमब वचन या लिख्दीयेब चिट्ठीदे चे शिक्षा प्रेत्दे हम्ब अनुसार काम चीन्नू। 16 होर्दे ङ्येदे ङीनने प्रेम चेब मेस्ये अनुग्रह चीत्देबे कलङ्बेये अन्जेनब सान्त्वना मेस्ये सोरो ज्य आशा पीनब ङीन्जे प्रभु येशू ख्रीष्ट रङ्सेदेने मेस्ये परमेश्वर ङीनजे पदे, 17 नमयूजे सेम्ने सान्त्वना पीन्स्य मेस्ये साप्ता ज्य काम होर्दे वचनने नमयूजे सेम् बोल्यो चीम्मीस्य। |
Ghale New Testament © Nepal Bible Society, 2011.
Nepal Bible Society