२ थेसलोनिकी 1 - घले नयाँ करार1 पावल, सिलास मेस्ये तिमोथीदे, परमेश्वर ङीनजे प मेस्ये प्रभु येशू ख्रीष्टने ख्यब थेसलोनिकीयूजे मण्डलीने: 2 परमेश्वर प मेस्ये प्रभु येशू ख्रीष्टदे नमयूने अनुग्रह मेस्ये शान्ति पीन्स्य। धन्यवाद मेस्ये प्रार्थना 3 अत-अची च्योन्यू, नमयूजे विश्वास कूमने बढ्दीन ख्यङ्। त्यादे-सूजोने झन् थेप्थेप् प्रेम चीन्न ख्यङ्। अम्ब कारणदे नमयूजे बारेने येतार्ने ङीदे परमेश्वरने धन्यवाद पीनने पर्देख्यङ्। 4 येरप्रने नमयूजे सतनम् मेस्ये छरङ् सैदे ख्वब बोङ् मेस्ये विश्वासजे बारेने ङी परमेश्वर ख्रीष्टजे मण्डलीयू नङ्ने केन् क्यूत्देबे क्यम खूइय। 5 परमेश्वरजे धार्मिक न्यायजे साक्षी अम्बने ख्यङ्, यी नमयू परमेश्वरजे राज्यजे लागि लायकजे क्यूर खूस्य हम्बजे लागि नमयू छरङ् भोक्तीन ख्यङ्। 6 परमेश्वर न्याय चेब ख्यङ्, नमयूने छरङ् पीनबयूने ङूदे छरङ् पीन्क्य, 7 मेस्ये नम सकस् प्रेबयूने ङीयूप्रे आनन्द क्यूस्स्ये पीन्क्य। अम्ब हन्छ्वाब क्यूक्क्य, कन्छ्वाब प्रभु येशू रङ्सेजे शक्तिशाली स्वर्गदूतयूप्रे प्ल्याङ्नब मीने स्वर्गदे रब अम्ब टक्कने चीक्क्य। 8 परमेश्वरने अन्स्येबयूने मेस्ये ङीनजे प्रभु येशूजे सूगब खबर अम्मन्देबयूने ङूदे दण्ड पीन्क्य। 9 थमयूदे कलङ्बेये अन्जेनब नाशजे दण्ड मेस्ये प्रभुजे खूम्ने मेस्ये ङूजे शक्तिजे महिमादे अलग क्यूर पर्देब दण्ड प्रेक्क्य। 10 हम्ब दिनने प्रभु येशू पवित्र मीयूजे तर्फदे महिमा प्रेने मेस्ये ङूने विश्वास चेबयू क्वानेने हार्मन्दीलाबे चेने रीय, चेनेयलो ङीदे पीनब गवाहीने नमयूदे विश्वास चीत्दे। 11 अम्बकारणदे ङीन्जे परमेश्वरदे नमयूने ङूदे क्व अनुसारजे लायकजे जीया चस्य, होर्दे ङूजे शक्तिदे साप्ता ज्य उदेश्य मेस्ये विश्वासजे काम पूरा चीम्मीस्य यदेबे ङी नमयू क्वाजे लागि येतार्ने प्रार्थना चीन्न ख्यङ्। 12 चेनेयलो ङीनजे परमेश्वर मेस्ये प्रभु येशू ख्रीष्टजे अनुग्रह अनुसार ङीनजे प्रभु येशूजे मीन् नमयूने महिमीत क्यूस्स्य, मेस्ये होरप्रने नमयूये ङूने महिमीत क्यूस्स्य। |
Ghale New Testament © Nepal Bible Society, 2011.
Nepal Bible Society