२ पत्रुस 3 - घले नयाँ करारप्रभुजे दिन्ने 1 ङैजे छेब ख्योन्यू, अम्ब दोस्रो चिट्ठी ङैदे नमयूने लिख्दीन ख्यङ्, मेस्ये अम्ब चिट्ठी ह्ङीने थेप्प्र पोयूजे ह्वेरलाबे चीत्देबे नमयूजे ज्य सेम्ने बोल्यो चीम्मे ख्यङ्, 2 पवित्र अगमवक्तायूदे क्यमब अगमवाणीजे पो मेस्ये नमयूजे मूल स्यूस्स्यायूदे लोम्मेब ङीनजे प्रभु मेस्ये मुक्तिदाताजे आज्ञाने नमयूदे ह्वे चे पर्दीय। 3 पात्ता खूम् नमयूदे अम्ब पो क्व पर्दीय, आखिरीजे दिनने खिसी चेबयू रीय, थमयूदे खिसी चीक्क्य मेस्ये थमयूदे रङ्सेजे अन्ज्य इच्छा अनुसार येर पोयू यदेबे प्रीय, 4 “येशू ख्रीष्ट रीय यदेबे चेब कबुल खोइ कने गीली? चेनेयलो ङीनजे मेमेयू सीइदेबे गीली तर संसार सृष्टि क्यूरमेस्ये साप्ता सेयू खूम् कर ख्य होरप्रने दीनीये ख्यने ख्यङ्।” 5 परमेश्वरजे रङ्से वचनदेने स्वर्ग खूम्ने बन्दीदे, पृथ्वीने बन्दीदे, मेस्ये क्यूदे पृथ्वी बन्दीदे यब अम्ब पो थमयूदे स्येलीने अन्स्ये जूम् चीक्क्य। 6 हम्ब क्यूदेने हम्बसेमेजे संसार नाश क्यूत्दे। 7 तर चूजो ख्यब मू मेस्ये पृथ्वीये मीने भस्सम् चीप्पेने परमेश्वरजे हम्ब वचनदेने जूक्तीदे येन्न ख्यङ्। परमेश्वर अम्मन्देब मीयूने दोष लैदीदेबे नाश अन्चीत्दासेमे मू मेस्ये पृथ्वी टूनेनीय। 8 तर छेब ख्योन्यू, प्रभुजे लागि तीया यब हजार बर्षप्र मेस्ये हजार बर्ष यब तीयाप्र ख्यङ् यब पो अन्-येल्गलाची। 9 रङ्सेदे चेब कबुल पूरा चेने प्रभु ग-ख्यङ् यदेबे कोइ-कोइदे मन्लीने प्रभुदे गलाबे अन्ची, तर सूत्याये नाश अन्क्यूस्स्य, मेस्ये मी-क्वादेने पश्चात्ताप चीस्स्य यब सेम् क्यूत्देबे नमयूजे लागि प्रभु धेरेन् चीत्देबे टून ख्यङ्। 10 तर फेरि प्रभु रब दिन, थाने अम्प्रेल्लाबे खूमान् रप्र रीय, मूब केन् गर्जेदेब केप्रे सू-मल्बीय, मूने ख्यब सेयू क्वाने मीजे रप्दे ङ्योल्बीय, मेस्ये पृथ्वी होर्दे पृथ्वीने ख्यब साप्ताकूरूने भस्सम् चीक्कीय। 11 अम्ब साप्ता सेयू येर्बे ङ्योल्बीय यब पो स्येदेबे नमयू कर खल्जे मी क्यूर पर्दे? पवित्र क्यूरब मेस्ये परमेश्वरने मन्देब जीया च-पर्तीय। 12 परमेश्वर न्याय चेब दिनजे लम् नमयूदे लेन्न ख्यङ्, अम्ब दिन छ्योटो रस्य यदेबे नमयूदे चेपर्देब काम बेस्से ज्य ची। प्ल्याङ्नब मीदे हम्ब दिनने स्वर्गयू नाश क्यूक्क्य, मेस्ये साप्ताकूरूने प्ल्याङ्नब मीजे रप्दे ङ्योल्बीय। 13 तर ङीनदे परमेश्वरजे कबुल अनुसार सर् स्वर्ग मेस्ये सर् पृथ्वीजे लम् लेक्क्य, हैयाने परमेश्वजे धार्मिक्तादे बास टूङ्क्य। 14 येरेक्यूत्देबे ङैजे छेब ख्योन्यू, नमयू अम्ब पोजे लम् लेन्नबयू क्यूत्देबे परमेश्वरजे खूम्ने नमयू दाग या खोट् त्वबयू, होर्दे शान्तिने टूङबयू क्यूरने बोङ् ची। 15 ङीन प्रभुजे धीरेनदे मुक्तिजे लागि मीयूने मौका पीन ख्यङ् मन्। ङीनजे छेब च्योन् पावलदेये परमेश्वरदे ङूने पीनेब बुद्धि अनुसार अम्ब पो नमयूने लिख्दीदे। 16 पावलदे रङ्से चिट्ठीयू क्वानेनेये अम्ब पोयू लिख्दीये ख्यङ्। हम्ब पोयूजे कोइ पोब ते-क्व-अङ्ख्व ख्यङ्, अन्-छ्य्वेब मीयूदे, मेस्ये धेरेन् त्वब मीयूदे धर्मशास्त्रजे सूजो पोयूने पार्त्या अर्थ लैदेप्र अम्ब पोयूनेये पार्त्या अर्थ लैदीय, मेस्ये रङ्से फ्याने नाश रेक्क्य। 17 येरेक्यूत्देबे छेब ख्योन्यू, अम्ब पो खूम्ने चेलाबे कोदेबे होस्स्यार क्यूरो। दुष्ट मीयूजे लूच्च पोयूने तीप्लीङ्-छोप्लीङ् क्यूत्देबे रङ्सेदे चीन्नब बोल्यो विश्वासने अन्क्यापीलाची। 18 तर ङीन्जे प्रभु मेस्ये मुक्ति पीनब येशू ख्रीष्टजे अनुग्रह मेस्ये ज्ञानने नमयू थेप् बोल्यो क्यूप्पीनू। चूजो मेस्ये येतार्ने प्रभुजे महिमा क्यूस्स्य। आमेन। |
Ghale New Testament © Nepal Bible Society, 2011.
Nepal Bible Society