२ पत्रुस 1 - घले नयाँ करार1 येशू ख्रीष्टजे त्वो मेस्ये मूल स्यूस्स्या ङ सिमोन पत्रुसदे, ङीनजे परमेश्वर मेस्ये मुक्ति पीनब येशू ख्रीष्टजे धार्मिकतादे ङीनजेप्रने सोरो केन् विश्वास चेबयूने: 2 परमेश्वरजे मेस्ये येशू ङीन प्रभुजे ज्ञानने अनुग्रह मेस्ये शान्ति नमयू फ्याने बेस्से कूम क्यूप्पस्य। परमेश्वरदे क्वब मेस्ये सेलब 3 परमेश्वरने सेम् पर्तेब जीया चजे लागि चेतेब साप्ता पो ङूजे शक्तिट्यादे ङीनदे प्रे ख्यङ्, चेनेयलो रङ्से महिमा मेस्ये भलो चेब कामदे क्वब परमेश्वरने ङीदे स्ये ख्यङ्। 4 येरेक्यूत्देबे ङूदे ङीनने पात्ता केन् मेस्ये सोरो ज्य कबुल पीने ख्यङ्, चेनेयलो अम्ब संसारजे अन्ज्य इच्छायूदे चीत्देबे योङ्रब अन्ज्य विचारयू क्यापीदेबे नमयू परमेश्वरजे स्वभाव टेल्देबे जीया च। 5 येरेक्यूत्देबे खूदासेमे नमयूजे विश्वासने भोलो चेब काम थप्देने बोङ् ची। भलो चेब कामने ज्ञान थप्दी, 6 ज्ञानने रङ्सेदे रङ्सेने कबूने येनब, रङ्सेदे रङ्सेने कबूने येनब पोने धेरेन्, धेरेन्ने परमेश्वरजे डर येब पो, 7 परमेश्वरजे डर येनब पोने अत-अची च्योन्यू अन्द्रजे माया, अत-अची च्योन्जे अन्द्रजे मायाने प्रेम थप्दी। 8 चेनेयलो अम्ब गुणयू नमयूप्रे बेस्से कूम म्यूर्न ख्यङ् यलो ङीन्जे प्रभु येशू ख्रीष्टजे ज्ञानने अम्ब गुणयूदे नमयूने चैकम्ते मेस्ये फल पीन अङ्ख्व क्यूस्स्ये अम्पीन्। 9 चेनेयलो अम्ब गुणयू त्वब मीयूदे मीयूङ् रङ्सेदे चीक्कब पापयू क्षमा क्यूक्कब पो येलदेबे चीन्तङ्जे सेयू तङ अङ्ख्वब कन मीप्र क्यूक्क्य। 10 येरेक्यूत्देबे अत-अजी च्योन्यू, परमेश्वरदे नमयूने क्व ख्यङ् मेस्ये सेल ख्यङ् यब पो पक्क चेने बेस्से बोङ् ची। अम्ब पोयू चीत्देयलो नमयूदे रङ्से विश्वास कलङ्बेये क्यापीसे त्वो। 11 येर्बे ङीनजे प्रभु मेस्ये मुक्ति पीनब येशू ख्रीष्टजे येतार्ने टूनब राज्य नङ्ने परमेश्वरदे नमयूने बेस्से केन् चीत्देबे स्वागत चीक्क्य। धर्मशास्त्रजे अगमवाणी 12 येरेक्यूत्देबे अम्ब पोयू क्वाने नमयूदे स्येली मेस्ये नमयूदे लोम्कब तम्दम् पो सेम्ने बोल्यो चीत्देबे येन्नूलीने ङ नमयूने अम्ब पोयू येतार्ने ह्वेरलाबे चीम्मीय। 13 ङ अन्सीबदासेमे नमयूदे अम्ब पोयू अन्-येल्गस्य यदेबे ह्वे चीम्मीनब ङैदे ठीक थेको। 14 चेनेयलो ङ सीबब बील ट्याराङ्ने फ्योर ख्यङ् यदेबे ङीनजे प्रभु येशू ख्रीष्टदे ङैने तम्मीक ख्यङ् यब पो ङैदे स्येख्यङ्। 15 नमयूदे ङ सीब ङ्येदेये अम्ब पोयू येतार्ने ह्वेरीनूस्य यदेबे खूदासेमे ङ बोङ् चीन्नीय। 16 चेनेयलो ङीन प्रभु येशू ख्रीष्टजे केन् शक्ति मेस्ये ख्रीष्ट रब खबर ङीदे नमयूने स्योप्प, चलाख चीत्देबे बन्दीयेब मीयूङ्जे दन्त्य कथायूजे के अन्था, तर ङूजे महिमा रङ्से म्यादेने तङब साक्षी ङी ख्यङ्। 17 परमेश्वर पदे येशू ख्रीष्टने गेसेन् मेस्ये महिमा पीन्दे, हम्ब केन् महिमाजे परमेश्वरदे क्यम्ब येर पोत्या योङ्रदे, “अम्ब ङैजे छेब च ख्यङ्, ङ ङूप्रे सोरो सूग ख्यङ्।” 18 हम्ब पवित्र गङ्ने ङी ङूप्रे ख्यङ्ब स्वर्गदे योङ्रब हम्ब के ङी-रङ्सेदेये त-ख्य। 19 अगमवक्तायूजे पो ङीने थेप् पक्क क्यूर ख्यङ्। नमयूदे हम्ब पोने सेम् पर्तीदेयलो सोरो ज्य चीक्क्य, चेनेयलो थमयूजे पोब ख्रीष्ट फेरि अन्रदासेमे मून्दूङ्ने प्ल्याङ्नब बत्तीप्र होर्दे नमयूजे सेम्ने प्ल्यानब नप्जे कर्चेन्जे ओथ्याङ्प्र ख्यङ्। 20 तर नमयूदे पात्ता खूम् अम्ब पो तम्दम्ने क्व-पर्दीय, धर्मशास्त्रने लिख्दीयेब अगमवाणीयू रङ्से सेम्ने केरे थेको होरने अर्थ स्य्वे पो दी। 21 चेनेयलो अगमवाणीयू मीजे इच्छादे क्यम दी, तर पवित्र आत्मादे शक्ति प्रेत्देबे मीयूदे परमेश्वरजे इच्छा अनुसारजे पोयू क्यम ख्यङ्। |
Ghale New Testament © Nepal Bible Society, 2011.
Nepal Bible Society