२ कोरिन्थी 7 - घले नयाँ करार1 येरेक्यूत्देबे ङैजे छेब ख्योन्यू, ङीनदे अम्ब कबुलयू प्रेत्देबे ङीनजे ङ्व प्रे आत्माने अन्ज्य चेब साप्ता थर्जे सेयू चैये अन्चील्लाबे रङ्सेने शूद्ध चीदे, मेस्ये परमेश्वरजे डर येत्देबे पूरा रुप्दे पवित्र क्यूप्पे। पावलजे सेम् सूगब 2 नमयूजे सेम्ने ङीजे लागि ने-पीनो। ङीदे सूनेये अन्ज्य अन्चीक्क। ङीदे सूनेये अन्ज्य लम्ने अन्स्योल्गी। ङीदे लूच्च क्यम्देबे सूमीजेये फाइदा अन्कीन्। 3 नमयूजे गल्ती ख्यङ् यदेबे तनने ङैदे अम्ब य दी, चेनेयलो ङैदे मालाङ्ने येक ख्यङ्, ङीजे सेम्ने नमयूजे लागि अन्छ्वासेमे ने ख्यङ्, यी नमयूप्रे-प्रे सीबनेये मेस्ये जीया चनेये ङी तयार ख्यङ्। 4 ङैदे नमयू फ्याने सोरो भर्परते ख्यङ्। नमयूदे चीत्देबे ङ केन् त्वे प्रेख्यङ्। नमयूदे ङैजे सेम्ने कूम सान्त्वना पीन ख्यङ्। ङीदे कूम सकस्यू प्रेप्प ङैजे सेम् सोरो सूग ख्यङ्। 5 चेनेयलो ङी माकेडोनियाने फ्योर्ङ्येदेये ङीजे ङ्वदे खात्यात्याये गैन सङ अम्प्रे, तर का-मुलुकदेने ङी फ्याने सकस् पर्ती र ख्य, फीने च्य-फा चीन्नूली सेम् नङ्नेब फैन ख्य। 6 तर सेम् अन्सूग क्यून्नबयूजे सेम्ने परमेश्वरदे बोङ् पीन्क्य, तीतस ङी ट्याने फ्योरब परमेश्वरदे ङीजे सेम्ने बोङ् पीन्दे, 7 मेस्ये तितस फ्योरदेत्या दी, तर नमयूदे ङूजे सेम्ने पीनब सान्त्वनादेये ङैजे सेम्दे सान्त्वना प्रे ख्य। नमयूदे ङैने सोरो तूतीङ्रेनब पो, ङैजे लागि सोरो सूर्त चीन्नब मेस्ये सोरो कूम चीन्ता चीन्नब पोये ङूदे ङीने स्योत्दे, होरेक्यूत्देबे ङैजे सेम् सोरो थेप् सूग्दे। 8 ङैदे चङ्बेब चिट्ठीदे नमयूजे सेम् नसे पीन्ल्लीने, अम्ब पोने ङ पश्चात्ताप अन्ची, तर मालङ्ब ङैने पश्चात्ताप लादीन ख्य। हम्ब चिट्ठीदे नमयूने खात्यात्या यलीने सेम् नसे पीन्दे यब पो ङैदे था प्रेत्दे। 9 नमयूजे सेम् नसे पीन्दे यदेबे ङैजे सेम् सूग दी, तर नमयूजे नेकब सेम्दे नमयूने पश्चात्ताप चीस्से पीन्दे यदेबे सूग ख्यङ्, चेनेयलो परमेश्वरजे इच्छा अनुसार सेम् नब पो नमयूदे था प्रेत्दे, होरेक्यूत्देबे ङीजे तर्फदे नमयूने चैये नोक्सान अन्क्यूर्। 10 चेनेयलो परमेश्वरजे इच्छा अनुसार सेम् नब पोदे मुक्ति प्रेजे लागि पश्चात्तापजे सेम् पीन्क्य, अम्ब पोने पश्चात्ताप चीन्न अम्पर्ती, तर संसारजे इच्छा अनुसार सेम् नब पोदे सीब पर्ते चीक्क्य। 11 चेलाबे ङ्यीन्, अम्ब परमेश्वरजे इच्छा अनुसार सेम् नब पोदे नमयूने सोरो कूम आँट पीम्मे ख्यङ्: नमयू रङ्सेने चैये दोषत्वब क्यूरने सोरो आँट चीन्नब, सोरो छी चीन्नब, सोरो फैनब, सोरो क्यूफैप्र क्यून्नब, सोरो चेनब सेम्, सोरो न्याय क्यूस्स्य यब केन् इच्छा ख्यङ्। नमयूदे साप्ता पोने दोषत्वब ख्यङ् यदेबे गवाही पीन्दे। 12 येरेक्यूत्देबे ङैदे अम्ब चिट्ठी अन्-न्याय चेब मीजे कारणदे लिख्दे दी, मेस्ये अन्-न्यायने पर्तीनब मीदे चीत्देबेये दी, तर परमेश्वरजे खूम्ने नमयूदे ङीने कोला माया चीन्न टोङ्, यब पो नमयूदे था प्रेस्स्य यदेबे ख्यङ्। 13 येरेक्यूत्देबे ङीदे सान्त्वना प्रे-ख्यङ्, ङी रङ्से सेम्दे प्रेब बोङ्देत्यामे दी, तीतसजे सेम् सूग्ब ङी थेप् तङ्दे, चेनेयलो नमयूदे चीत्देबे ङूजे सेम् सोरो सूगप्रे ख्यङ्। 14 चेनेयलो नमयूजे पो स्योत्देबे तीतसजे खूम्ने ङ केन् त्वोक्कलीने, हम्ब पोने नमयूदे चीत्देबे ङ त्वा अम्पर्ती। तर ङीयूदे नमयूने यब साप्ता पो केर्बे तम्दम् ख्य, होर्बेने तीतसजे खूम्ने ङीदे केन् त्वेब पोये तम्दम् ठर्तीक ख्यङ्। 15 नमयू क्वादेने ङूजे पो मन्देब मेस्ये नमयू फदे स्यलूतूतू फ्रीक्दे ङूने स्वागत चेब पो ह्वे चीप्प ङूजे सेम् नङ्दे मेस्येने नमयूने सोरो माया चे ख्यङ्। 16 ङैजे सेम् सोरो सूग ख्यङ्, चेनेयलो ङ नमयू फ्याने पूरा भर् चे खूइय। |
Ghale New Testament © Nepal Bible Society, 2011.
Nepal Bible Society