२ कोरिन्थी 5 - घले नयाँ करारङीनजे टूङब ने स्वर्ग 1 चेनेयलो अने पृथ्वीने टूङब पल्जे कीम्प्र ङीजे अम्ब नाश क्यूप्पब ङ्व नाश क्यूत्देबे प्रलीने स्वर्गने कलङ्नेयली टूनब कीम् परमेश्वरदे ङीने पीन ख्यङ्, हम्बब मीजे लादे थ्यायेब कीम् दी यदेबे था ख्यङ्। 2 तम्दम्ने येयाने अम्ब नाश क्यूप्पब ङ्वने सोरो सूर्त क्यूक्क्य, मेस्ये सर् कोला होतीङ्रप्रने स्वर्गने टूङब ङ्व क्यूरने ङी सोरो सेम् चीक्क्य, 3 चेनेयलो हम्ब स्वर्गजे ङ्व क्यूप्पमेस्ये ङीनयू च्यङ्ली क्यूस्से त्वो। 4 अम्ब ङ्वने टूनूतासेमे केन् क्वीदे चीत्देबे ङीन ह्वीइ पूक्क्य। अम्ब ङ्वने क्याबेब सेम् क्यूत्देबे अतूर् क्यूर दी, तर स्वर्गजे ङ्व कलङ् प्रेयी यदेबे ख्यङ्। अम्ब नाश क्यूप्पब ङ्व हम्ब नाश अन्क्यूप्प जीयाने फेर्दीप्रीय। 5 होरदे परमेश्वरदेने अम्ब पोजे लागि ङीने तयारी चीम्मे ख्यङ्, ङूदे बैनाजे रूप्ने पवित्र आत्मा ङीने पीङ्क ख्यङ्। 6 येरेक्यूत्देबे येतार्ने ङी भरचीन्न ख्यङ्। कन्छ्वासेमे ङी अम्ब नाश क्यूप्पब ङ्वजे तेदिनत्या टूङब कीम्ने टूनीय, हन्छ्वासेमे प्रभुजे कीम्दे चीन्तङ् क्यूक्क्य यदेबे ङीने था ख्यङ्। 7 चेनेयलो ङी विश्वासजे भर्दे प्रीय, तर च तङ ख्व हम्बजे भर्दे दी। 8 ङीने पक्क ख्यङ्, क्यूत्देयलो ङी अम्ब नाश क्यूप्पब ङ्व पोङ्यीदेबे स्वर्गने प्रभुप्रे टूङ्बस्ये मन ख्यङ्। 9 येरेक्यूत्देबे ङी अम्ब नाश क्यूप्पब ङ्वने क्यूल्लीने या अन्क्यूल्लीने प्रभुने सूग्लाबे चेब ङीजे सेम् ख्यङ्। 10 चेनेयलो तीया ङीनयू क्वाने ख्रीष्टदे न्याय चेब नेजे खूम्ने मेर पर्दीय, येरे ङ्वने क्यूप्प मीयू क्वादेने रङ्सेदे चीक्कब ज्य या अन्ज्य काम अनुसारजे इनाम प्रेक्क्य। थून्लाबे चेब सेवा 11 येरेक्यूत्देबे प्रभुप्रे फ पर्दे ख्यङ् यब पो स्येदेबे ङीदे मीयूने प्रभुतेले ल्वाख यीय। तर ङीन कर ख्यङ् यब पो परमेश्वरदे स्येख्यङ्, मेस्ये अम्ब पो नमयूजे विवेकदेये चेलाबेने स्ये ख्यङ् यदेबे ङ आशा चीक्क्य। 12 नमयूजे खूम्ने ङी फेरि रङ्सेजे सार्या अन्ची, तर नमयूदे ङीजे पोने त्वे खूस्य यदेबे मौका पीन ख्यङ्, येरे सूदे मीजे सेम्ने ख्यब पोने दी, तर फीने तङब सेयूने त्वेक्क्य, होर मीयूने नमयूदे जवाफ पीन खूस्य। 13 कादेये ङीजे दीमाग ठेगन्ने त्वो यलो अम्ब परमेश्वरजे लागिने क्यूर ख्यङ्, होरदे कादेये ङीजे दीमाग ज्य क्यूल्लो अम्ब नमयूजे लागिने ख्यङ्। 14 ख्रीष्टदे चेब प्रेमदे ङीने सोरो कर्चङ ख्यङ्, चेनेयलो क्वाजे लागि मीत्या सीइदेबे ङीन क्वाने सीये ख्यङ्, यदेबे ङीने अम्ब पो पक्क ख्यङ्। 15 ख्रीष्ट क्वाजे लागि सीइदे, येरे जेम्सेमेस्ये सोम्बो ख्यबयू रङ्से लागि जीया च दी, तर थमयूजे लागि सीइदेबे फेरि सोम्बो चीक्कब ख्रीष्टजे लागि थमयू जीया चब क्यूस्स्य। 16 जेम्सेमेस्ये ङी मीजे त्वा लेत्देबे सूनेये न्याय अन्ची। ङीदे ख्रीष्टने त्याफे अम्ब संसारजे मीयूदे लेप्र ले ख्य, तर जेम्सेमेस्ये हम्ब रूप्दे ङूने अन्ले। 17 येरेक्यूत्देबे कोइदे ख्रीष्टने विश्वास चेख्यङ्लो हम्ब सर् सृष्टि ख्यङ्। मीयूङ्जे ङीङ् जीया मेले ख्यङ्, जेम्से सर् जीया सुरु क्यूर ख्यङ्। 18 अम्ब क्वाने परमेश्वरदे चीत्देबे क्यूर ख्यङ्, ङीन ख्रीष्टप्रे क्यूत्देबे परमेश्वरदे रङ्सेप्रे मिलापने रेत्दे, मेस्ये सूजो मीयूने ङूप्रे मिलापने रेब काम ङीने पीन्दे, 19 परमेश्वर ख्रीष्टप्रे क्यूत्देबे संसारजे मीयूने ङूदे रङ्सेप्रे मिलापने रेन्न ख्य। थमयूदे चीक्कब पापजे चैये हिसाब अन्चील्लाबे मिलापजे काम चेब पो स्य्वेब जिम्मा ङूदे ङीने पीन्दे। 20 येरेक्यूत्देबे ङी ख्रीष्टजे राजदूतयू ख्यङ्, मेस्ये परमेश्वर ङीप्रे क्यूत्देबे बिन्ती चीन्न ख्यङ्। परमेश्वरप्रे मिलापने ख यदेबे ख्रीष्टजे मीन्ने ङी नमयूने बिन्ती चीक्क्य। 21 चेनेयलो ङीन ख्रीष्टप्रे क्यूत्देबे परमेश्वरजे खूम्ने धर्मी ठर्ते खूस्य यदेबे पापने अन्स्येब ख्रीष्टने परमेश्वरदे ङीनजे पापजे बलि क्यूस्से पीन्दे। |
Ghale New Testament © Nepal Bible Society, 2011.
Nepal Bible Society