२ कोरिन्थी 11 - घले नयाँ करारपावल मेस्ये लूच्च मूल स्यूस्स्यायू 1 ङ तेतेत्या मूर्ख क्यूल्लीने नमयूदे सैदीमीय यदेबे आशा चीक्क्य; तर नमयूदे खूम्ने सैदीमीक ख्यङ्। 2 परमेश्वर ट्यादे रब ठेनब सेम्दे नमयूप्रे ङ ठेन ख्यङ्। ङैदे नमयूने तीत्यात्या पतीजे पवित्र पीर्मप्र ख्रीष्टजे खूम्ने तनजे लागि नमयूने ख्रीष्टप्रे ङ्येन् चेने पो पक्क चीम्मे ख्यङ्। 3 तर र्वेदे केरे लूच्च चीत्देबे हव्वाने छेल्लीपीदे, होरप्रने नमयूजे चैये छल् त्वब सेम् मेस्ये चोखो क्यूत्देबे ख्रीष्टने पूस्तेब ज्य सेम्नेये तीप्लीङ् छोप्लीङ् चीप्पीई च यदेबे ङ सोरो फैन ख्यङ्। 4 चेनेयलो कादेये कोइ मी रदेबे ङीदे स्य्वेब येशूजे पो यली सूजो येशूजे पो स्योट्टली नमयूदे ङ्यीन टोङ् या नमयूदे प्रेब आत्मायली सूजो आत्माजे पो, होर्दे नमयूदे विश्वास चेब सूगब खबर यली सूजो सूगब खबरये ङ्यीन टोङ्। 5 हम्ब पात्ता केन् मूल स्यूस्स्या ख्यङ् यब मीयू यली ङ चै पोनेये कमी-त्वो। 6 ङ सोरो ज्य क्यम्से रब मी दी, तर ङैप्रे ज्ञान ख्यङ्। अम्ब पो ङीदे नमयूने साप्ता तर्तीप्दे चेला तम्मीक ख्यङ्। 7 नमयूनेब केन् चेने ङ रङ्से चीद क्यूस्स्ये पीन्देबे परमेश्वरजे सूगब खबर ङैदे नमयूने चैये अन्कीन्लाबे स्योप्प ङैदे पाप चीक्कया? 8 नमयूजे सेवा चेने सूजो मण्डलीजे मीयूने नोर् स्यदेबे ङैदे हम्ब मण्डलीजे मीयूने लूर्तीदे। 9 मेस्ये कन्छ्वाब ङ नमयूप्रे ख्य हन्छ्वाब ङैने हर्जो क्यून्नूलीने ङैदे नमयू सूनेये चैये अन्स्य, चेनेयलो माकेडोनियादे रेकब च्योन्यूदे ङैजे हर्जोने पूरा चीम्मीदे। येरेक्यूत्देबे कम्ब तर्तीप्देये नमयूने ङ चैये अन्स्य मेस्ये ङ्येदेये स्यस्ये त्वो। 10 ख्रीष्टने ख्यप्र तम्दम् ङैप्रे ख्यङ्, मेस्ये अम्ब ङैदे त्वेब पोने अखैयाजे नेयूने ख्यब सूमीदेये थून्दे अङ्खू। 11 ङैदे चेने येरे य? ङैदे नमयूने प्रेम अन्ची यदेबे औ स्व? ङैदे नमयूने प्रेमचे ख्यङ् यब पो परमेश्वरदे स्ये ख्यङ्! 12 ङैदे चै काम फर्न ख्यङ् हम्ब अन्क्यालाबे फर्नीय, चेनेयलो मूल स्यूस्स्या ख्यङ् यब मीयूदे चीन्नब काम ङीजे सर्ने ख्यङ् यदेबे त्वेब पोने भार्- चैबे खूस्य। 13 चेनेयलो होर मीयू लूच्च मूल स्यूस्स्या, मेस्ये छल् चेबयू ख्यङ्, मेस्ये ख्रीष्टजे मूल स्यूस्स्यायूप्र क्यूत्देबे प्रेनबयू ख्यङ्। 14 मेस्ये अम्ब हार्मन्देब पो दी, चेनेयलो ओथ्याङ् स्वर्गदूतजेप्र रुप् शैतानदेये कीन खूइय। 15 येरेक्यूत्देबे धर्म चे-सेम् ख्यब त्वोयूजे रुप्प्र हम्बजे त्वोयूदेये कीनब पो नौङ्ल्या दी, थमयूजे नाश थमयूदे चेब काम अनुसार क्यूक्क्य। पावलजे सकस् 16 ङ फेरि यीय, सूमीदेये ङैने मूर्ख मी अम्मन्स्य। तर नमयूदे ङैने मूर्ख मी मन्क्य यलीने मूर्ख मीप्र मन्देबे ङैने ग्रहण ची, चेनेयलो ङैदेये छीत्या त्वे प्रेक्क्य। 17 तम्दम्ने ङ येरे ल-तप्देब क्यमब पो परमेश्वरजे इच्छा अनुसार दी, तर मूर्खदेप्र ङ क्यम्न ख्यङ्। 18 अम्ब संसारजे कूम मीयूदे केन् त्वोन्नप्रने ङैये होरप्रने केन् त्वोन्न ख्यङ्। 19 मूर्ख मीयूने सूस्योलोने सैदीदेबे नमयू तामा बुद्धि ख्यब क्यूर्यो। 20 चेनेयलो कोइ मीदे नमयूने त्वो-त्वोमप्र चील्लीने, यूयू पूत्देबे ङ्येप्कलीने, नमयूने लूर्तीकलीने, नमयू फ्याने हैकम् चील्लीलीने, नमयूजे ङूर्ने ठरीलीने नमयूदे अम्ब साप्ताने सैदीन टोङ्। 21 येर पोयू यने ङ सोरो त्वा ख्यङ्, चेनेयलो येर पोयू ङीदे सैदीन अङ्खू। तर कोइमीदे चत्या पोने केन् त्वोक्क्य यलो, ङैये हम्ब पोयूने केन् त्वोक्क्य, मूर्ख मीदे क्यमप्रने ङ क्यम्न ख्यङ्। 22 थमयू हिब्रू मी यीर? ङैये हिब्रू मी ख्यङ्। थमयू अब्राहामजे छगूम्-पूर्गूम् यीर? ङैये अब्राहामजे छगूम्-पूर्गूम् ख्यङ्। 23 थमयू ख्रीष्टजे सेवा चेब मी औ? ङ हम्ब यली सोरो ज्य सेवा चेब मी ख्यङ्- सेम् नोङ्ये मीप्र ङ क्यम्न ख्यङ्। ङैदे कूम छेम्प्रे चीत्दे। कूमफे झ्यालखानने पर्तीदे। कूमफे कोर्रादे ठरीकदे। कूमफे कालजे ङूर्ने फ्योइदे। 24 यहूदीयूजे लादे ङ-फेसेमेने सूम्च्यूदे गूफे ङ कोर्रादे ठरीकदे। 25 ङ सोम्फे पीर्कदे ठरीदे। त्याफे लूङ्दे ठरीकदे। सोम्फे ङ टदेबे प्रेनूब क्यू जहाज नोङ्गी। ङैदे समुद्र फ्यानेने नोत्या मून्त्या चदे। 26 ङ कूमफे लम् लादीदे प्रब क्यू-गन्दी बोङ्देबे स्योर्गीलो खदे, डाँकूयूजे लाने पर्तीदे, रङ्से यहूदी मीयूदे मस्ये यहूदीतेब मीयूदे ङैने सेमेदे, सहरने, मी अन्टोङब चनमन नेने, समुद्रने सोरो फत्या सकस् क्यूत्दे, लूच्च अत-अची च्योन्यूदे रेब सकस्ने पर्तीदे। 27 ङैदे येरे छेम्प्रे चीत्दे मेस्ये सकस् भोक्तीदे, अन्-ङ्यूम्लाबे कोला मून् चदे, ठीले-ठीले मेस्ये क्यू फै-फै टूङ्दे, कूमफे चैये अन्चलाबे टूङ्दे, ड्वे रब कोला ह्वेअम्प्रे क्यूत्देबे सोरो खङ्दे। 28 होरदे अन्छूत्या पो दी, तर मण्डलीयू क्वाजे सूर्त ङै फ्याने पर्ती रख्यङ्। 29 कोइ कम्जोर क्यूक्देयलो, ङैये कम्जोर अन्क्यूर-या? कोइ पापने फस्तीपीदेयलो, ङैजे सेम् अन्ठ्व या? 30 कादेये ङैदे ल-तप पर्तीलीने, ङैजे बोङ् त्व तङब पोयूने ल तप्क्य। 31 प्रभु येशूजे प-परमेश्वरने येतार्ने जै-जै क्यून्नूस्य। ङूदे ङ लूच्च अन्क्यम् यदेबे स्ये ख्यङ्। 32 दमस्कसने अरितस मूरुम्जे नङ्ने टूङ्देबे हक चील्लेब हाकिमदे ङ ङ्येबजे लागि दमस्कस सहरने सीन्त्रीयू खर्तीये ख्य। 33 तर सहरजे पूङ्रीजे झ्याल त्यादे टासेने येत्देबे मो तल्पीदे, मेस्ये ङूदे ङ ङ्येबने अम्प्रे छ्योङ्ये प्रेत्दे। |
Ghale New Testament © Nepal Bible Society, 2011.
Nepal Bible Society