१ तिमोथी 6 - घले नयाँ करार1 त्वो-त्वोमयू क्वादेने रङ्से मालिकजे साप्ता पोने मन्दे पर्दे ख्यङ् यदेबे मन्। हम्बदे परमेश्वरजे मीन् मेस्ये ङीनदे पीनब शिक्षाजे बदनाम क्यूस्स्ये त्वो। 2 विश्वास चेब मालिकयूने त्वो-त्वोमयूदे रङ्से विश्वासने अत-च्योन् यदेबे गेसेन् अन्चे अन्चीस्स्य। बरू थमयूदे थमयूजे झन् थेप् सेवा चीस्स्य, चेनेयलो थमयूजे सेवादे फाइदा क्यूरब मालिकयूब रङ्सेदे माया चेब विश्वासीयूने ख्यङ्। नोर्जे लोभ 3 कादेये सूजो मीदे सूजो शिक्षा लोम्मीदे यलो ङीनजे प्रभु येशू ख्रीष्टजे तम्दम्जे वचन मेस्ये ङीनदे चेपर्देब परमेश्वरने मन्देब खाल्जे शिक्षाप्रे अम्मील्लीदे यलो, 4 ङूदे चैये अन्स्येली केन् त्वोत्देबे फूल्लीनीय। ङूदे काम अन्लादेब सीती-सीतीजे स्वाल्-जवाफ चीक्क्य, मेस्ये च्य-जीङ चेमेय येर पोयूदे म्यातब, च्य, न प्वेब मेस्ये अन्ज्य शङ्कायू चेब काम त्या चीक्क्य, 5 मेस्ये बुद्धि नोङ्येब मेस्ये सत्यदे आलाक्के क्यूरेब मीयूजे अन्द्रने कचेला चीक्क्य, होर्दे परमेश्वरने मन्दे यब फाइदा लङ काम त्या ख्यङ् यदेबे थमयूदे मन्क्य। 6 सून्ताकी क्यूत्देबे परमेश्वरने मन्दीलो थेप् फाइदा ख्यङ्। 7 चेनेयलो ङीन अम्ब संसारने रब चैये अन्टेल्ली मेस्ये अयादे प्रबये चैत्याये टेल्के अन्खू। 8 तर च प्रे ह्वेत्या पूक्तीलो अम्बनेने ङीन सून्ताकी क्यूक्क्य। 9 तर फ्योबो क्यूत्दीङ्रब सेम् चेयू पापने फस्तीप्रीय, यूयूने पर्दीप्रीय मेस्ये अर्थ चैये त्वब मेस्ये हानी क्यूरब काम चीत्तीङ् रीय, अम्बदे मीयूने बरबाद चीत्देबे साप्ताकूरूने नोक्सान चीप्पीय। 10 चेनेयलो साप्ता थर्जे खराबजे छ ब नोर्ने माया चेब ख्यङ्। कोइ-कोइ नोर्जे लोभने पर्दीदे विश्वास चेब क्यापीदेबे अन्ज्य लम्तेले लादीये ख्यङ्, मेस्ये कूम पीर्दे थमयूजे सेम् ठ्व ख्यङ्। तिमोथीने पावलजे आज्ञा 11 तर परमेश्वरने मन्देब मी, नदे येर कामयू क्वाने क्यापी, मेस्ये धर्मी, परमेश्वरने मन्देब, विश्वास, प्रेम, अङ्-आतीलाबे रेन ख्वब सेम् मेस्ये चीद क्यूरब सेम्जे उदेश्य कीन्। 12 विश्वासजे सोरो ज्य लडाइँ चीङ्। कलङ्बेये अन्सीबब जीयाने ङ्येप्नू। अम्बजे लागि नने कोक ख्य, नदे कूम मीयूजे खूम्दे नैजे विश्वासजे सोरो ज्य साक्षी पीन्क ख्य। 13 साप्ता थोकने जीया पीनब परमेश्वर मेस्ये पन्तियस पिलातसजे खूम्ने तम्दम्जे ज्य गवाही पीनब ख्रीष्ट येशूजे खूम्ने, 14 ङ नने आज्ञा पीन्क्य, प्रभु येशू ख्रीष्ट अन्रदासेमे अम्ब आज्ञा चेलाबे मन्दी मेस्ये सूदेये गल् लैदे अम्प्रेब क्यूस्स्य। 15 असी पीनब पात्ता केन् परमेश्वर, मूरूम्यूजे पात्ता केन् मूरूम्, प्रभुयूजे पात्ता केन् प्रभुदे फेरि ठीकबील रमेस्ये येशू ख्रीष्टने कूल्बीय। 16 ङूनेत्या कलङ्बेये अन्सीब जीया ख्यङ्। ङू ओथ्याङ्ने टून ख्यङ् अम्ब ओथ्याङ् ट्याने सूत्याये र अङ्खू। ङूने कम्ब मीदेये कलङ्बेये अन्तङ् मेस्ये तङये अन्खू। ङूनेने गेसेन् मेस्ये शक्ति येतार्ने क्यून्नूस्य। आमेन। 17 केन् अन्त्वोल्लाची यदेबे अम्ब संसारजे फ्योबोयूने आज्ञा पीन्, मेस्ये येतार्ने अन्टूनब सीर-सम्पत्तिने दी तर ङीनने साप्ता थोकने बेस्से पीनब परमेश्वर फ्याने थमयूदे आशा चीस्स्य। 18 थमयूदे ज्य काम चीस्स्य, मेस्ये ज्य कामयू चीत्देबे फ्योबो क्यूस्स्य, सेम् यङ्लाबे हर्जो क्यून्नबयूने पीनजे लागि येतार्ने तयार क्यूरो। 19 येरेने नङ्ग रङ्सेजे लागि स्वर्गने धन रुप् प्वेब ज्य जा प्वे खूस्य। होर्दे थमयूदे तम्दम् जीयाने जूक्तीन खूइय। 20 तिमोथी, नैजे जिम्माने चैसे पीने ख्य, हम्ब चेलाबे चीम्। परमेश्वर अम्मन्देब कन्थनयू मेस्ये बिरोध चेब पोयू ब लूच्च ज्ञान ख्यङ्। येर पोयू क्वाने क्यापी। 21 येर पोयूजे ङ्येदे प्रदेबे कोला मीदे विश्वास चेने क्याबे ख्यङ्। नैप्रे परमेश्वरजे अनुग्रह क्यूस्स्य। |
Ghale New Testament © Nepal Bible Society, 2011.
Nepal Bible Society