१ तिमोथी 5 - घले नयाँ करारप्ल्यङ् सीयेब मदी, एल्डर मेस्ये त्वोयूजे बारे मोतो 1 रङ्से यली केन्-ता मीयूने अङ्-ङर्-लाची, तर ङूने पप्र चीत्देबे सम्झीदी। रङ्से यली चीदयूने रङ्सेजे च्योन्नेप्र ची। 2 रङ्सेयली केन्-ता मदीयूने रङ्से म-नेप्र, मेस्ये रङ्से यली चीद चम्चयूनेब पूरा ज्य सेम्दे रङ्से स्यङ्नेप्र ची। 3 प्ल्यङ् सीयेब मदीयूजे सूत्याये त्वोलो थमयूने ज्य गेसेन् ची। 4 तर प्ल्यङ् सीयेब कोइ मदीयूजे च-चीमी मेस्ये कून-कूमी ख्यङ्लो थमयूदे खूम् ङूने लेब काम चीस्स्य। पात्ता खूम् कीम् म्हीतीदेने परमेश्वरजे नियम मन्देने लोम्स्य, होर्दे प-मजे लोन् फामीस्य चेनेयलो अम्ब कामदे परमेश्वर सूग्क्य। 5 तर सूजे तम्दम्ने प्ल्यङ् सीये ख्यङ्, होर्दे ङूजे सूये त्वोलो, ङूदे परमेश्वरजे आशा चीक्क्य, मेस्ये नो-मून् परमेश्वरदे तोङ्मीस्य यदेबे प्रार्थना चीन्नीय। 6 तर हम्ब मदी आराम मोज मजाने टूङ्देयलो ङू सोम्बोनेने सीयेसरी ख्यङ्। 7 थमयूने अम्ब पोजे आज्ञा पीन्, होर्देमेस्ये थमयू दोष त्वब क्यूस्स्य। 8 सूदेये रङ्से मीयूजे मेस्ये थेप् रङ्से म्हीतीजे सुसार अन्चीत्देयलो ङूदे विश्वास चेने क्याबेब क्यूक्क्य, मेस्ये विश्वास अन्चेबयू यली थेप् अन्ज्य क्यूक्क्य। 9 कोइजे तीत्यात्या पतीप्रे ङ्येन् चीत्देबे प्ल्यङ् सीयेयलो, हम्ब मदीने सोम्लङ् वर्षदे तो क्यूरेब ख्यङ्लो त्यामे प्ल्यङ् सीयेब सूचीने मीन् थादेबे येन्। 10 अम्ब प्रेने ङूदे ज्य काम चेब, च-चीमीने चेलाबे छर्कब, ङ्योव-डोम्बयूने गेसेन् चीस्से रब, होर्दे परमेश्वरजे पवित्र मीयूजे तोप् ठूदेबे सेवा चीक्कब मेस्ये दूख्प्रेयूने तोङ्मीकब मेस्ये येरप्रने ज्य कामयू चेने सेम् चीन्नब यदेबे गवाही क्यूर पर्दीय। 11 तर चम्च ख्यङ्बने प्ल्यङ् सीयेब मदीयूजे मीन् प्ल्यङ् सीयेबयूजे सूचीने अन्-लिख्दीला ची, चेनेयलो कन्छ्वाब थमयूजे ङ्येन् चीत्तीङ्रब सेम्दे ख्रीष्टने चीन्नब विश्वासदे थमयू चीन्तङ् क्यूप्पीय, हन्छ्वाब थमयू फेरि ङ्येन् चेब सेम् चीक्क्य। 12 येरेने रङ्सेदे चेब खूम्जे कबुल अनुसार काम अन्चेब कारण थमयूदे दण्ड प्रेक्क्य। 13 हम्बयली सूजो थमयू कीम् कीम्ने ट्वाब क्यूत्देबे म्यास्सी त्या क्यून्न दी, तर कन्थनत्या चूमब, सूजो मीजे कामने ला च्वाब मेस्ये क्यम अन्क्यूरब पोयू क्यमब क्यूक्क्य। 14 होरेक्यूत्देबे चम्च ख्यङ्बने प्ल्यङ् सीयेब मदीयूदे ङ्येन् चीस्स्य, च-चीमीयू प्रेस्स्य, कीम्-नम् लेस्स्य मेस्ये फूतूर् चेयूने ङीनजे न प्वेब मौका अम्पीन्लाचीदे यदेबे मन्न ख्यङ्, 15 चेनेयलो कोइ-कोइ मालाङ्ने शैतान तेलेयोर् गीले ख्यङ्। 16 कादेये विश्वासी ख्यब मदीजे कोइ रङ्से मीयू प्ल्यङ् सीयेब ख्यङ्देयलो ङूदे थमयूने तोङ्मी, मेस्ये मण्डलीदे ङूने ले अम्पर्दीस्य, मण्डलीदे हम्ब प्ल्यङ् सीयेब मदीजे सूत्याये त्वोदेयलो होरयूने तोङ्मे खूस्य। 17 मण्डलीने चेलाबे ले ख्वब एल्डरयू दोब्बर गेसेन् प्रेब लायकजे क्यूक्क्य, खास रूप्ने थमयूदे परमेश्वरजे वचन स्य्वेने मेस्ये लोम्मेने छेम्प्रे चीक्क्य। 18 चेनेयलो धर्मशास्त्रदे येरे यीय, “दाइँ प्वेने रेब लप्जे ङूर्ने पूत्रू अम्पूल्लाची”, मेस्ये “काम चेब मीदे रङ्से कामजे मेला प्रे-पर्दीय।” 19 मी ङ्ही या सोम्जे साक्षी तोदा सेमे मण्डलीजे एल्डरजे विरुद्धने लैदेब दोष कलङ्बेये अन्ङ्यीन्लाची। 20 क्वाजे खूम्ने, पाप चेजे चे चीन्न मीयूने ङर्मी, मेस्ये होरे चीत्देयलो सूजोये फैय। 21 परमेश्वर मेस्ये येशू ख्रीष्ट मेस्ये चून्दीयेब स्वर्गदूतयूजे खूम्ने ङ नने बोङ्बे आज्ञा पीन्क्य, चैसेनेये साक्पूजा अन्चील्लाबे अम्ब नियमयू नदे मन्दी। 22 अतूर् चीत्देबे कोइ मी-फ्याने ला येत्देबे मण्डलीजे कामने अन्लैदीलाची। सूजो मीजे पाप प्रेये सामेल् अन्क्यूल्लाची। रङ्सेने पवित्र येन्। 23 मालाङ् खूम्प्र न क्यूत्या अन्थूङ्लाची, तर नैजे ख्वाजेजे लागि मेस्ये घीरी-घीरी नवदे तेते अङ्गुरजे ची थूङ्लीम् ची। 24 कोइ-कोइ मीयूजे पापब चेलाबे तङब क्यूक्क्य मेस्ये थमयू खूम्ने गल्ती चेब ठर्दीय। तर कोइजे पाप ङ्येदेम तङ्क्य। 25 हेरप्रने ज्य कामयू चेलाबेने तङ्क्य, कम्ब तङ अङ्ख्व ख्यङ्, हम्बये नङ्सू चे अन्खू। |
Ghale New Testament © Nepal Bible Society, 2011.
Nepal Bible Society