१ तिमोथी 4 - घले नयाँ करारतिमोथीने शिक्षा 1 पवित्र आत्मादे चेलाबे य ख्यङ्, यी नङ्ग छेल्लेब आत्मा मेस्ये छेत् प्रेतजे शिक्षातेले सेम् पीन्देबे कोइदे विश्वास चेने क्यापीय। 2 लूच्च क्यमब मीयूजे छल्दे येर पोयू क्यूस्से पीन्क्य, येर मीयूजे विवेक जङ् लूम्दे डम्दीकब-प्र क्यूक्क्य। 3 थमयूदे ङ्येन् चे अन्क्यूर्, कोइ सेयू च अन्क्यूर् यदेबे मीयूने लोम्मे ख्यङ्। तर विश्वास चेबयू मेस्ये सत्य स्येबयूदे धन्यवाद पीन्देबे अम्ब चसेयू च क्यूक्क्य, चेनेयलो परमेश्वरदेने अम्ब साप्ता थोकने बन्दीये ख्यङ्। 4 परमेश्वरदे बन्दीयेब साप्ता थोकने ज्य ख्यङ्, मेस्ये परमेश्वरने धन्यवाद पीन्देबे साप्ता सेने च क्यूक्क्य, कम्ब सेये अन्च य अन्क्यूर्। 5 चेनेयलो परमेश्वरजे वचन मेस्ये प्रार्थनादे हम्ब पवित्र बन्दीय। 6 कादेये नदे अत-अची च्योन्यूजे खूम्ने येर पो लोम्मीदे यलो नदे मन्दीनब ज्य शिक्षा मेस्ये विश्वासजे वचनने बोल्यो क्यूत्देबे न ख्रीष्ट येशूजे लागि ज्य सेवा चेब क्यूक्क्य। 7 परमेश्वरने विश्वास अन्चेब मेस्ये सीतीजे कथायूने अम्मन्दीलाची तर परमेश्वरने मन्दीदेबे जीया चने तालिम पीन्। 8 चेनेयलो ङीन ङ्वजे तालिम तेदिनजे लागित्या फाइदा क्यूक्क्य, तर परमेश्वरने मन्दीलो कलङ्ने यली फाइदा क्यूक्क्य, चेनेयलो अम्बदे जूचोजे जीया मेस्ये ङ्येजे जीया ङ्हीजेने फाइदाजे लागि कबुल चे ख्यङ्। 9 अम्ब येकब पो पक्क पूरा रूप्देने मन्दे पर्देब खालजे तम्दम् पो ख्यङ्। 10 अम्ब उदेश्यदे ङी धम चीत्देबे काम फर ख्यङ्। चेनेयलो ङीनजे आशा सोम्बो परमेश्वर फ्याने ये-ख्यङ्, ङू मीयू क्वाजे लागि मेस्ये खास रूप्ने ङू फ्याने विश्वास चेयूजे मुक्ति पीनब ख्यङ्। 11 अम्ब पोजे आज्ञा पीन् मेस्ये लोम्मी। 12 स्योर्ब क्यूरब कारणदे नने सूदेये ह्यल चे अम्प्रेस्स्य, तर विश्वासीयूजे खूम्ने बोली वचन, आनि-बानी मेस्ये प्रेमने, विश्वासने बोल्यो, शुद्ध सेम् क्यूत्देबे नदे नमूना तन्। 13 ङ अन्रदासेमे धर्मशास्त्र छ्योत्देबे स्य्वेने, प्रचार चेने मेस्ये लोम्मेब कामने ध्यान् पीन्। 14 नैप्रे ख्यब बरजे ह्यल अन्चील्लाची। हम्ब बर एल्डरयूदे नैफ्याने ला येप्प अगमवाणी क्यम्देबे नदे प्रे ख्य। 15 अम्ब चे पर्देब कामयूने पूरा सेम् पीन्देबे येतार्ने चीन्नू, मेस्ये नैजे उन्नती मी क्वादेने तङ्स्य। 16 रङ्सेजे बारेने मेस्ये रङ्सेदे लोम्मेब पोजे बारेने ज्य चङ्ख क्यूर्। अम्ब काम चीन्नूलो रङ्सेये मेस्ये रङ्सेजे पो ङ्यीनबयूनेये न्यायदे बच्दीय। |
Ghale New Testament © Nepal Bible Society, 2011.
Nepal Bible Society