१ तिमोथी 3 - घले नयाँ करारबिशप मेस्ये डिकनयू 1 अम्ब यब पो विश्वास चे लायकजे ख्यङ्, कोइ मीदे बिशपजे काम चेब सेम् चीक्क्य यलो, ङूदे ज्य काम चेब सेम् चीक्क्य। 2 होरेक्यूत्देबे बिशपने सूदेये दोष लैदे अन्ख्वब, मज तीत्या ख्यब पती, रङ्सेदे रङ्सेने काबूने येनब, बुद्धिदे काम चे ख्वब, कीम्ने रब ङ्योवयूने गेसेन् चीस्स्ये रब, सोरो चेलाबे लोम्मीसे रब क्यूर पर्दीय, 3 च्यी-नादूदे स्य्वब मेस्ये छी लङब मी दी, तर ङू चीद क्यूत्देबे च्य-फा अन्चे, नोर्जे लोभ अन्चेब क्यूर पर्तीय। 4 ङू रङ्सेजे कीम् चेलाबे चील्ले ख्वब मेस्ये रङ्सेजे च-चीमीने चेलाबे तह लैदीदे आज्ञा मन्दीस्ये पीन ख्वब क्यूर पर्तीय। 5 या कोइ मीदे रङ्सेजे कीम् म्हीतीने तहने लैदे अन्खूलो, ङूदे परमेश्वरजे मण्डलीने केर्बे ले खूइय? 6 ङू चूजोकेला विश्वास चेब सर् मी अन्क्यूस्स्य, नत्रलो त्वोत्देबे मख्खै क्यूत्देबे ङू शैतानदे प्रेब दण्डने पर्दी प्रीय। 7 फेरि, फी मीयूजे खूम्नेये ङू ज्य ठर्देपर्दीय, नत्र ङूब बदनाम क्यूत्देबे शैतानजे यूयूने पर्दी प्रीय। 8 हेरप्रने डिकनयूये गेसेन् प्रेब लायकजे मी क्यूर पर्दीय, तम्दम् पो क्यमब, ची-नादू थूङ्देबे स्य्वोनब दी मेस्ये नोर्जे लोभ चेब दी, 9 तर थमयू रङ्सेदे प्रेब विश्वासजे नङ्जे पो शुद्ध विवेकदे जूक्तीदे येनब क्यूर पर्दीय। 10 खूम् थमयूजे जाँच क्यूस्स्य होर्दे ङ्येदे थमयूदे रङ्सेने दोष त्वब गवाही पीन खूदे यलो थमयूदे डिकनजे सेवा चीस्स्य। 11 मदीयूये हम्बप्रने गेसेन् प्रेब लायकजे, मीयूजे न अम्प्वेब, तर साप्ता पोने सैदे ख्वब मेस्ये विश्वास चे ख्वब क्यूरपर्तीय। 12 डिकनजे मज तीत्यात्या क्यूस्स्य। रङ्सेजे च-चीमीयू मेस्ये कीम्-नम् चेलाबे चील्ले ख्वब क्यूस्स्य। 13 चेनेयलो डिकनदे चेपर्देब सेवा मेस्ये काम सूदे चेलाबे चीक्क्य, थमयूदेने रङ्से रङ्सेजे लागि इज्जत मेस्ये ख्रीष्ट येशूने ख्यब विश्वासजे बारेने मीयूने बोङ्बे स्य्वे खूइय। 14 नैट्याने छ्योटोने रसे मन ख्यङ्, येरेक्यूल्लीने ङ नने अम्ब लिख्दीय, 15 कादेये ङ रने गेबदेयलो परमेश्वरजे कीम् म्हीतीने मीयू केरे प्र पर्तीय, अम्ब चिट्ठी छ्योत्देबे लोम्नू। अम्ब कीम् म्हीतीब सोम्बो परमेश्वरजे मण्डली ख्यङ्, होर्दे तम्दम्जे थम् मेस्ये आठे ख्यङ्। 16 ङी मन्दीय, ङीनजे विश्वासजे नङ्सू क्व अन्ख्वब पो सोरो फत्या केन् ख्यङ्: ङू रङ्सेने ङ्वजे रुप्ने तङ्रदे, पवित्र आत्मादे धर्मी ठर्दीदे, स्वर्गदूतयूदे ङूने तङ्दे, देश देशने ङूजे प्रचार क्यूत्दे, संसार भरीने मीयूदे ङूने विश्वास चीत्दे, होर्दे ङू महिमाने तो स्वर्गने लङ्कीदे। |
Ghale New Testament © Nepal Bible Society, 2011.
Nepal Bible Society