१ तिमोथी 2 - घले नयाँ करारपरमेश्वरने पूस्तेबजे बारेने लोम्मेब 1 पात्ता खूम् ङ बिन्ती चीक्क्य, मीयू क्वाजे लागि चीद क्यूत्देबे प्रार्थना मेस्ये बिन्ती ची होर्दे धन्यवाद पीन्स्य, 2 मूरुम्यू मेस्ये केन् पदने टूङब मीयूजे लागिये प्रार्थना ची, मेस्ये येरक्यूस्स्य यी ङीन सेम् ढूक्क मेस्ये शान्ति क्यूत्देबे साप्ता तर्तीप्देने धर्मी मेस्ये मीदे ज्य गेसेन् चेब जीया च खूस्य। 3 ङीनजे मुक्ति पीनब परमेश्वरजे खूम्ने अम्ब ज्य मन्दे खल्जे ख्यङ्। 4 मीयू क्वादेने मुक्ति प्रेस्स्य मेस्ये थमयूदे तम्दम्जे ज्ञान क्व खूस्य यदेबे परमेश्वरदे सेम् चे ख्यङ्। 5 चेनेयलो परमेश्वर तीत्यात्या ख्यङ्, परमेश्वर प्रे मीयूजे अन्द्रने मीलाप चेने पो मील्लेब मीये तीत्यात्याने ख्यङ्-हम्ब मी, ख्रीष्ट येशू ख्यङ्। 6 येशू ख्रीष्टदे मीयू क्वानेने पापदे छूर्दीमेने लूजे रूप्ने रङ्सेजे प्राण पीन्दे, हम्ब पोजे प्रमाण ठीक बीलने पीन्दे। 7 अम्बजे लागि ङ प्रचार चेब मी मेस्ये मूल स्यूस्स्याजे रूप्ने चून्दीदे, विश्वास मेस्ये तम्दम्जे पोने यहूदी तेब मीयूजे लागि लोम्मेब मी क्यूत्दे। ङ तम्दम्ने यीय, लूच्च अन्क्यम्। 8 येरेक्यूत्देबे पतीयूदे का-मुलुकनेने पवित्र ला लङ्देबे छी अन्चील्लाबे मेस्ये स्वाल्-जवाफ अन्चील्लाबे प्रार्थना चीस्स्य यब ङ सेम् चीक्क्य। 9 येरप्रने मदीयूदे कोला होब्ब मील्लेब या प्वब कोला होस्स्य यब ङ सेम् चीक्क्य, ट फू कूम सिङ्गार चीत्देबे, मर, मोती मेस्ये कूम मङ्गो पर्देब कोलायू होत्देबे दी, 10 तर सोरो ज्य काम चीत्देबे ज्य तङब क्यूरो, हम्ब परमेश्वरने मन्देब मदीयूने पोय। 11 मदीदे चीद क्यूत्देबे पारा अम्पूल्ला टूङ्देबे लोम्स्य। 12 तर मदीदे पतीने लोम-तन मेस्ये पती फ्याने हुकुम चेब कामने ङ हक अम्पीन्, तर ङू पारा अम्पूल्लाबे टूङ्स्य। 13 चेनेयलो पात्ता खूम आदमजे सृष्टि क्यूत्दे, होर्देङ्येदेम हव्वाजे सृष्टि चीत्दे। 14 आदम छेल्लीक दी, तर मदीब छेल्लीकदेबे अपराधने फस्तीक ख्यङ्। 15 होरनेयलीने, ङू ज्य बनी व्यवहारप्रे विश्वास, प्रेम मेस्ये पवित्र क्यूत्देबे टूनूलो, पीच जन्मीदीब ङूने बच्दीमीय। |
Ghale New Testament © Nepal Bible Society, 2011.
Nepal Bible Society