१ तिमोथी 1 - घले नयाँ करार1 ङीनने मुक्ति पीनब परमेश्वर मेस्ये ङीनने आशा पीनब येशू ख्रीष्टजे आज्ञा अनुसार ख्रीष्ट येशूजे मूल स्यूस्स्या, ङ पावलदे अम्ब लिख्दीन ख्यङ्, 2 विश्वासने ङैजे तम्दम् च तिमोथीने: प परमेश्वर मेस्ये ङीनजे ख्रीष्ट येशू प्रभुट्यादे अनुग्रह, कृपा मेस्ये शान्ति प्रेस्स्य। लूच्च पो लोम्मेबयूजे विरुद्धने बोङ्बे आर्तेब 3 ङ माकेडोनिया प्रब ङैदे कर् चङ प्र न एफिससने टूङ्, मेस्ये लूच्च पो लोम्मेब मीयूने होर कामयू अन्लोम्मीला ची यदेबे बोङ्बे आज्ञा पीन्। 4 नदे थमयूने दन्त्य कथायू मेस्ये कलङ्बेये जेन-अन्ख्वब वंशयू तेलेजे पोयूने अल्मल् क्यूस्स्ये अम्पीन्लाची। अम्ब पोयूदे अर्थ त्वब च्य-फाने थेप् चीक्क्य मेस्ये परमेश्वरने विश्वास चीत्देबे जीया चने साक्तीस्ये त्वो। 5 अम्ब आज्ञाजे मूल पो प्रेम ख्यङ्, हम्ब शुद्ध सेम्, ज्य विवेक मेस्ये तम्दम् विश्वासदे योङ्रीय। 6 कोइ मीयू अम्ब पोयूने येल्देबे सीत्तीने काम अन्लादेब पोयूने अल्मल् क्यून्न ख्यङ्। 7 थमयू मोशाजे नियमजे गुरु क्यूरब सेम् चीक्क्य, तर रङ्सेदे क्यमब पो या रङ्सेदे पक्क चीत्देबे यब पो थमयू रङ्सेदेने अङ्को। 8 ङीनने थाने ख्यङ्, मोशाजे नियमने चेलाबे मन्दीलो अम्ब नियम सोरो ज्य ख्यङ्। 9 ङीनदे अम्बये स्ये ख्यङ् यी मोशाजे नियम ज्य मीयूजे लागि दी, तर अम्ब नियम अम्मन्देयू मेस्ये आज्ञा अन्ङ्यीनयूजे लागि, परमेश्वर अम्मन्दे, पापीयू, पवित्र त्वब, धर्म अम्मन्देयू मेस्ये प-मने सेबयूजे लागि, मी सेबयूजे लागि, 10 वेश्य काम चेयू, छाडा काम चेबयूजे लागि, मीदे मीने सोङबयूजे लागि, लूच्च क्यमप्रे लूच्च गवाही पीनब तम्दम् शिक्षाजे विरोधने काम चेयूजे लागि ख्यङ्। 11 अम्ब तम्दम्जे शिक्षाब स्वर्गजे परमेश्वरदे ङैने सूम्दीयेब महिमा पीनब सूगब खबर अनुसार ख्यङ्। पावलने प्रभुजे अनुग्रह 12 ख्रीष्ट येशू ङीनजे प्रभुने ङ धन्यवाद पीन्क्य, ङूदे ङैने आँट पीन्दे, चेनेयलो विश्वास चे ख्वब ठर्दीदे रङ्सेजे सेवाने ङैने चून्तीदे। 13 खूम् ङैदे न-पूत्दे, छरङ् पीन्दे मेस्ये लेत्तीङ् अन्डदेबे ङूजे बेइजत चीत्दे, तर ङैदे अम्ब कामयू क्वाने अन्स्येदेबे मेस्ये प्रभुने अम्मन्देब बीलने चेब कारण ङैदे कृपा प्रेत्दे। 14 ख्रीष्ट येशूने ख्यब विश्वास मेस्ये माया प्रे-प्रे ङीन प्रभुजे अनुग्रह ङैजे लागि बेस्से कूम फैम्मीदे। 15 अम्ब वचन केर्बेनेयली मन्देब खल्जे ख्यङ्, यी येशू ख्रीष्ट पापीयूने उद्धार चेजे लागि संसारने रदे, मेस्ये पापीयू नङ्ने ङ मूख्य पापी ख्यङ्। 16 तर अम्ब कारणदेने ङूदे ङैने कृपा चीत्दे। ङप्र पात्ता मूख्या पापीनेये येशू ख्रीष्टदे पूरा धेरेन् तनने ङूदे ङैने नमूना बन्तीदे। ङैदे येशू ख्रीष्ट फ्याने विश्वास चीत्देबे कलङ्बेये अन्सीबब जीया प्रेयूजे लागि ङ नमूना त्याक्यूर खूस्य। 17 जूग्-जूग्जे मूरुम्, कलङ्बेये अन्सीबब मेस्ये तङ अन्ख्वब तीत्या त्या परमेश्वरने येतार्ने गेसेन् मेस्ये महिमा क्यून्नूस्य। आमेन। 18 च तिमोथी, ङ नने अम्ब आज्ञा पीन्न ख्यङ्, यी नैजे बारेने खूम् येयेब अगमवाणी अनुसार विश्वास प्रे ज्य विवेक येत्देबे न प्रभुजे लागि चेलाबे जीङ खूला ची। 19 विश्वास मेस्ये सोरो ज्य विवेक येन्नेनू। कोइ मीयूदे विवेक अनुसार अन्चील्लीदेबे रङ्सेजे विश्वासजे जहाज डूब्दीबे ख्यङ्। 20 हम्ब नङ्ने हूमेनियस मेस्ये अलेक्जेन्डर ख्यङ्, थम ङ्हीदे न प्वेब काम चे अन्क्यूर् यब पो लोम्स्य यदेबे ङैदे थमयूने शैतानजे लाने सूम्दीबे ख्यङ्। |
Ghale New Testament © Nepal Bible Society, 2011.
Nepal Bible Society