Biblia Todo Logo
Bìoball air-loidhne

- Sanasan -

१ थेसलोनिकी 5 - घले नयाँ करार

1 तर अत-अची च्योन्‌यू, सेमे मेस्‍ये बीलजे बारेने नमयूने चैये लिख्दीन अम्‍पर्‌दी।

2 चेनेयलो प्रभु रब दिन ब मून्‍दे खूमान् र प्र रीय यदेबे नमयू रङ्सेदेने चेलाबे स्‍ये ख्यङ्।

3 कन्‍छ्वाब मीयू साप्‍ताने “शान्ति मेस्ये सुरक्षा” ख्यङ् यदेबे येनीय, हन्‍छ्वाब पीच रब मदीने थाने अम्‍प्रेल्‍लाबे बीद लादेप्र थमयू फ्‍याने आपद् पर्‌दीरीय, मेस्‍ये थमयू कम्‍ब तर्‌तीप्देये प्‍लीम्‍ब प्रेस्‍स्‍ये त्‍वो।

4 तर अत-अची च्योन्‌यू नमयू मून्‍दूङने त्‍वो, होरेक्‍यूत्‍देबे हम्‍ब दिनदे नमयूने खूमान्दे चेप्र हार्‌मन्‍दीलाबे चीस्‍स्‍ये त्‍वो।

5 चेनेयलो नमयू क्‍वाने ओथ्याङ्जे छगूम्-पूर्‌गूम् मेस्‍ये नोजे छगूम्-पूर्‌गूम् ख्यङ्। ङीन मून्जे मेस्‍ये मून्‍दूङ्जे छगूम्-पूर्‌गूम् दी।

6 अम्‍ब कारणदे सूजोयूप्र ङीन अन्‍ङ्यूम्‍लाचीदे, तर चङ्‍ख टूङ्देबे होस्स्यार क्‍यूरे।

7 चेनेयलो ङ्यूमयू मून्‍देने ङ्यूम्‍क्‍य, मेस्‍ये स्‍य्‍वसेयू थूङ्देबे स्‍य्‍वयूये मून्‍देने स्‍योय।

8 तर ङीनब नोजे क्‍यूरबदे चङ्‍ख क्‍यूरे, मेस्‍ये गूने ह्‍वेब विश्‍वास मेस्‍ये प्रेमजे पाता प्रे मुक्तिजे आशाजे मूल्‍कू कूये।

9 चेनेयलो परमेश्‍वरदे ङूजे छी फैनजे लागि ङीनने सेल दी, तर ङीनजे प्रभु येशू ख्रीष्‍टने विश्‍वास चीत्‍देबे मुक्ति प्रेस्‍य यदेबे खूम्देमेस्येने सेल ख्यङ्।

10 ङीन सोम्‍बो क्‍यून्‍नूलीने या सीबलीने ङीन क्‍वाने ङू प्रेने जीया च खूस्‍य यदेबे ङू ङीनजे लागि सीये ख्यङ्।

11 येरेक्‍यूत्‍देबे नमयूदे चीन्‍नप्रने त्‍यादे त्‍याने आँट पीन्, मेस्‍ये त्‍यादे सूजोने बोल्यो बन्‍देब काम चीन्‍नू।


आखिरीजे शिक्षा

12 तर अत-अची च्योन्‌यू, नमयूजे अन्‍द्रने सोरो छेम्‍प्रे चीत्‍देबे प्रभुजे काम चेबयू, लम् तनबयू मेस्‍ये नमयूने चेलाबे बोङ्बे आर्‌तेबयूने गेसेन् चीत्‍देबे मन्‍दी यदेबे ङी नमयूने बिन्‍ती चीक्‍क्‍य,

13 मेस्‍ये थमयूदे चेब काम‍जे लागि थमयूने प्रेम चीत्‍देबे बेस्से गेसेन् ची। नमयू रङ्सेये क्वाप्रेने थून्देबे टूङ्।

14 अत अची च्योन्‌यू, काम चेने छरबयूने बोङ्बे अर्ती मेस्‍ये सेम् चीद चेयूने आँट पीन्। बोङ् त्‍वयूने तोङ्मी। क्‍वाप्रेने स्यूलूक्कै क्‍यूरब स्वभाव तन्।

15 सूमीदेये अन्ज्‍य चेब मीने खी फाने अन्ज्‍य अन्‍चीस्‍स्‍य, तर येतार्‌ने त्‍यादे सूजोने मेस्‍ये क्‍वाप्रेने भलो चेपर्‌दीय यदेबे ह्‍वेची।

16 येतार्‌ने आनन्द चीन्‍नू।

17 येतार्‌ने प्रार्थना चीन्‍नू।

18 कर बील रलीने धन्‍यवाद पीनब क्‍यूर्, चेनेयलो ख्रीष्‍ट येशूने विश्‍वास चेब नमयूजे लागि परमेश्‍वरजे इच्‍छा अम्‍बने ख्यङ्।

19 पवित्र आत्मादे चेब काम‍ने अङ्‍कालाची।

20 अगमवाणीने ह्‍यल अन्‍चील्‍लाची।

21 तर साप्‍ता पोजे जाँच ची। कम्‍ब पो ज्‍य ख्यङ् हम्‍ब पोयू सेम्‍ने हीन्‍नू।

22 अन्ज्‍य काम जती अन्चील्‍लाची।

23 शान्ति पीनब परमेश्‍वर रङ्सेदेने पूरा रूप्‍दे नमयूने पवित्र चीम्‍मीस्‍य, मेस्‍ये नमयूजे पूरा आत्मा, प्राण मेस्‍ये ङ्व ङीनजे प्रभु येशू फेरि ल्‍वारब खोट् त्‍वब क्‍यूस्‍स्‍य।

24 नमयूने क्वब परमेश्‍वर सोरो भर्‌पदेब ख्यङ्। ङूदे नमयूजे साप्‍ता पोयू पूरा चीम्‍मीय।

25 अत-अची च्योन्‌यू ङीजे लागिये प्रार्थना ची।

26 अत-अची च्योन्‌यू खोत्‍तानेने ख्रीष्‍टजे प्रेमने नमस्‍कार ख्यङ् यदेबे स्‍योम्‍मी।

27 ङ प्रभुजे खूम्‍ने नमयूने बिन्‍ती चीक्‍क्‍य यी अम्‍ब चिट्ठी छ्‌योत्‍देबे अत-अची च्योन्‌यू खोत्‍तानेने स्‍योम्‍मी।

28 ङीनजे प्रभु येशू ख्रीष्‍टजे अनुग्रह नमयूप्रे क्यूस्स्‍य।

Ghale New Testament © Nepal Bible Society, 2011.

Nepal Bible Society
Lean sinn:



Sanasan