१ थेसलोनिकी 3 - घले नयाँ करार1 नमयू ट्यादे छूर्तीदे टूङने ज्य अन्थेदेबे ङीदे एथेन्सने तिमोथी त्वोलीने टूङब ज्य क्यूक्की च मन्दे, 2 मेस्ये नमयूजे विश्वास बूल्ल्यो चेने होर्दे अर्ती-बुद्धि पीनने, ङीदे तिमोथीने नमयूट्याने कूल्बीदे। ङू ङीनजे च्योन् होर्दे परमेश्वरने ख्रीष्टजे सूगब खबरजे सेवा चेब मी ख्यङ्। 3 होर्दे अम्ब सकस्यूदे चीत्देबे सूजेये सेम् अन्सीस्य। नमयू रङ्सेने थाने ख्यङ्, यी अम्बजे लागि ङीन खर्दीये ख्यङ्। 4 चेनेयलो कन्छ्वाब ङी नमयूप्रे ख्य, हन्छ्वाब नमयूदे सकस् भोक्ते पर्दीय यदेबे ङीदे खूम्ने येक ख्यङ्। अम्ब पो तम्दम्ने क्यूट्टदे, हम्ब नमयूने था ख्यङ्। 5 अम्ब कारणदे ङैदे कूम टेम अङ्ख्व क्यूत्देबे नमयूजे विश्वास था प्रेने तिमोथीने कूल्बे ख्य। मीने परिक्षा चेब शैतानदे नमयूने फस्तीबीदेबे ङीदे चीदेब छरङ्, काम अन्लादे क्यूप्पीयीच मन्देबे ङीयू सोरो फैन ख्य। तिमोथीदे रेब खबर 6 तर चूजो तिमोथी नमयूट्यादे ङीट्याने फ्योरदेबे नमयूजे विश्वास मेस्ये प्रेमजे सोरो ज्य-खबर ङीने स्योक्को। नमयूदे ङीने सोरो तूतीङ्रब सेम् चीत्देबे येतार्ने मायाने ङी ह्वेचीन्नटोङ् यब खबर ङूदे पीन्दे। ङीये होरप्रने नमयूने त्वस्ये मन्न ख्यङ्। 7 अम्ब कारणदे अत-अची च्योन्यू, नमयूदे चेब विश्वासजे खबर ङ्यीन्देबे ङीजे अन्सूगब बील मेस्ये साप्ता छरङ् प्रे-बीलनेये ङीदे सान्त्वना प्रेख्यङ्। 8 चेनेयलो नमयू प्रभुने बोल्यो क्यून्नूलो त्यामे ङी तम्दम्ने सोम्बो क्यून्नूय। 9 ङी नमयूजे कारणदे ङीन परमेश्वरजे खूम्ने सोरो आनन्द मन्दीय। अम्बजे लागि परमेश्वरने ङीदे कोलाने धन्यवाद पीन्लीने अम्पूक्तेने क्यूक्क्य। 10 नमयूप्रे आम्ने-साम्ने तूदेबे नमयूजे विश्वासने च अम्पूक्ते क्यून्न ख्य हम्ब पूरा चेब विचारदे ङी नो-मून् बेस्से बोङ् चीत्देबे प्रार्थना चीन्न ख्यङ्। 11 जेम्से ङीनजे प परमेश्वर रङ्सेदेने मेस्ये ङीन प्रभु येशूदे नमयूट्याने रब लम् पूक्मीस्य। 12 ङीदे केर्बे नमयूने प्रेम चीत्दे, होर्प्रेने प्रभुदे नमयूने त्यादे त्याप्रे मेस्ये मीयू क्वाप्रेने बेस्से प्रेम चे ख्वब बन्दीस्य, 13 अम्बदे चीत्देबे ङूजे पवित्र मीयू क्वाप्रे ङीनजे प्रभु येशू ख्रीष्ट फेरि ल्वारब ङूदे ङीनजे परमेश्वर पजे खूम्ने नमयूजे सेम् पवित्र होर्दे चैये खोट् त्वब चेने बोङ् पीन्स्य। |
Ghale New Testament © Nepal Bible Society, 2011.
Nepal Bible Society