१ पत्रुस 5 - घले नयाँ करारएल्डरयू मेस्ये स्योर्ब चम्चयूने 1 ख्रीष्टदे भोक्तेब सकस्यूजे साक्षी मेस्ये ङ्येदे तङ्रब महिमाने सामेल् क्यूर प्रेब एल्डर त्याजे नातादे नमयूजे नङ्ने ख्यब एल्डर ख्योन्यूने ङ बिन्ती चीक्क्य। 2 परमेश्वरदे नमयूजे जिम्माने पीनेब बगलने प्रङ्बप्र क्यूत्देबे चेलाबे ले। कोइजे कर्दे दी, तर नैजे रङ्से इच्छादे फरब क्यूस्स्य, नोर्जे लोभने दी तर सेवा चेब सेम् टेल्देबे अम्ब काम ची। 3 नमयूजे जिम्माने पीनेब मीयू फ्याने हुकुम चील्लीदेबे ची, तर थमयूजे लागि ज्य काम फर्देबे नमूना तनब क्यूरो। 4 मेस्ये कन्छ्वाब प्रङ्बयूजे मूली तङ्रीय, हन्छ्वाब नमयूदे कलङ्बेये अन्रूल्बब महिमाजे पक्रीप्र मुकुट प्रेक्क्य। 5 येरप्रने चम्च-स्योर्बयू, रङ्से यली केन् मीयूजे हक नङ्ने टूङ्। त्यादे त्याजे हक नङ्ने टूङ्दे नमयू क्वाने स्यूलूक्कै क्यूत्देबे टोङ्। चेनेयलो, “परमेश्वरदे केन्-त्वेब मीयूजे विरोध चीक्क्य, तर स्यूलूक्कै क्यूरब मीयूने अनुग्रह चीक्क्य।” 6 येरेक्यूत्देबे शक्तिशाली ख्यब परमेश्वरजे खूम्ने नमयूदे रङ्सेने स्यूलूक्कै ची, मेस्ये ङूने ठीक थेब बील फ्योरब नमयूने केन् चीक्क्य। 7 नमयूजे सूर्तयू क्वाने ङूजे लाने सूम्दीपी, चेनेयलो ङूदे नमयूजे ख्याल चीक्क्य। 8 चङ्ख क्यूत्देबे होस् ची। नमयूजे शत्रु शैतानदे सू-तूको हम्बने सेत्देबे चस्ये यदेबे गेर्जेदेब डेन्यादेप्र मल्न ख्यङ्। 9 विश्वासने बोल्यो क्यूत्देबे शैतानजे विरुद्ध ची चेनेयलो संसारभरीने नमयूजे अत-अची च्योन्यूदेये येरप्र सकस् भोक्तीदे प्रेन ख्यङ्। 10 साप्ता अनुग्रह चेब परमेश्वरदे कलङ्बेये अन्जेनब रङ्से महिमाजे लागि ख्रीष्टप्रे क्यूत्देबे नमयूने क्व ख्यङ्। नमयूदे तेदिनत्या सकस् भोक्तेमेस्ये ङूदेने फेरि नमयूने ज्य सर्, बोल्यो मेस्ये शक्तिशाली चीम्मीय। 11 परमेश्वरने शक्ति येतार्ने क्यून्नूस्य! आमेन। आखिरीजे नमस्कार 12 ङैजे भर्पर्तेब च्योन् सिलासदे अम्ब ठून्यात्या चिट्ठी लिख्देने साक्तीमे ख्यङ्। अम्बने परमेश्वरजे तम्दम् अनुग्रह ख्यङ् यदेबे आँट पीनने मेस्ये गवाही पीनने अम्ब पो यीय। अम्ब अनुग्रहने नमयू बोल्यो क्यूत्देबे टूनू। 13 परमेश्वरदे सेलब बेबिलोन मण्डलीने ख्यब नमयूजे ख्योन्यूदे मेस्ये ङैजे च मर्कूसदेये नमयूने नमस्कार येबे ख्यङ्। 14 त्यादे त्याने ख्रीष्टजे प्रेमदे नमस्कार ची। ख्रीष्टने विश्वास चेब नमयू क्वानेने शान्ति क्यूस्स्य। |
Ghale New Testament © Nepal Bible Society, 2011.
Nepal Bible Society