१ पत्रुस 4 - घले नयाँ करारपरमेश्वरजे लागि जीया चब 1 ख्रीष्टदे रङ्से ङ्वने केर्बे सकस् भोक्तीदे होरप्रने नमयूदेये दु:ख भोक्तेब सेम् ची, चेनेयलो सूदे रङ्से ङ्वने दु:ख भोक्तीक ख्यङ्, हम्बदे पापजे कामयू चेने क्याबेब क्यूक्क्य। 2 येर्बे हम्ब मीदे रङ्से ङ्वने जीया चेनूतासेमे फेरि मीजे अन्ज्य इच्छाने दी, तर परमेश्वरजे इच्छाने जीया चैय। 3 गीलेब दिनयूने यहूदी तेब मीयूदे चेप्रने नमयूदे वेश्य कामयू, सोरो वेश्यजे सेम् टेब, ची-नादूदे स्य्वब, मोज-मज्जा चेब, ची-नादूदे स्य्वोदे भात्यार् चब, ङ्येब मूर्तिने सोरो पूस्तीनब ख्यङ्। 4 थमयूप्रे-प्रे अन्ज्य लम्ने नमयू अम्प्र तङ्देबे थमयू हार्मन्दीय, मेस्ये नमयूजे न-पूक्क्य। 5 तर सोम्बो ख्यब मेस्ये सीयेबयूजे न्याय चेने तयार क्यून्नब परमेश्वरने थमयूदे रङ्से कामजे हिसाब पीन पर्दीय। 6 येरेक्यूत्देबे मीयूदेप्र ङ्वने थमयूदे न्याय प्रेल्लीने आत्मानेब थमयू परमेश्वरप्रने जीया चस्य यदेबे सीयेबयूनेये सूगब खबर स्योत्दे। 7 अम्ब संसार जेन्टबसेमे फ्योर ख्यङ्। होरेक्यूत्देबे नमयू रङ्से शुद्ध सेम् मेस्ये होस्स्यार क्यूत्देबे प्रार्थना चे खूइय। 8 पात्ता नङ्ने केन् पोब त्यादे त्याने सेम् नङ्देमेस्येने प्रेम चीन्नू। चेनेयलो प्रेमदेने बेस्से कूम पापयूने उप्क्य। 9 गन्गन् अन्चील्लाबे त्यादे त्याने रङ्से कीम्ने रब स्वागत चीत्देबे को। 10 परमेश्वरजे अनुग्रह अनुसार क्वादेने थर्-थर्जे बर प्रेख्यङ्। रङ्सेदे प्रेब बर त्यादे-त्याजे भलोजे लागि चील्ली। 11 कादेये क्यम ख्वब बर कोइदे प्रेख्यङ्यलो हम्ब मीदे परमेश्वरजे वचन क्यमप्रने क्यम्स्य। कादेये सेवा चेब बर कोइदे प्रेख्यङ्यलो हम्ब मीदे परमेश्वरजे शक्तिने क्यूत्देबे सेवा चीस्स्य। येरे साप्ता पोयूने येशू ख्रीष्ट क्यूत्देबे परमेश्वरजे सार्या क्यूस्स्य। परमेश्वरने महिमा मेस्ये शक्ति येतार्ने क्यून्नूस्य! आमेन। ख्रीष्टियन क्यूप्प रब सकस् 12 छेब ख्योन्यू, सोरो सेम् ठ्वब दु:ख सकस्जे जाँच नमयू फ्याने रब चत्या नोङ्ल्या पो क्यूरप्र नमयू हार्मन्दीन अम्पर्दी। 13 तर ख्रीष्टजे सकस् भोक्तेबने सामेल् क्यूत्देबे नमयूदे सकस् भोक्ते पर्तीब तङ्, येरे ङूजे महिमा तङ्रब नमयूये आनन्द मेस्ये सूग खूस्य। 14 कादेये ख्रीष्टजे मीन्ने नमयूदे विश्वास चेब क्यूत्देबे मीयूदे न-पूक्ययलो नमयूदे असी प्रेक्क्य, चेनेयलो महिमा ख्यब परमेश्वरजे आत्मा नमयूप्रे टूङ्क्य। 15 तर नमयू नङ्ने सूदेये मी सेब, ख्वब, अन्ज्य चेब, या मीदे चीन्नब कामने ला च्वाब मीप्र क्यूत्देबे दु:ख अम्भोक्दीलाची। 16 तर कोइदे ख्रीष्टने विश्वास चेब क्यूत्देबे सकस्यू भोक्तीय यलो ङूदे त्वा अम्पर्दी, तर ङूदे ख्रीष्टजे मीन् गोम्देबे परमेश्वरने महिमा पीन्स्य। 17 चेनेयलो परमेश्वरजे रङ्से मीयूदेमेस्ये न्याय शुरु क्यूरब बील फ्योर ख्यङ्, कादेये अम्ब न्याय ङीनदेमेस्ये सुरु क्यूक्क्य यलो परमेश्वरजे सूगब खबरने विश्वास अन्चेबयूजे झन् कर न्याय क्यूक्क्य? 18 होर्दे, “धर्मी मीजे उद्धार क्यूरने मूस्यूल् क्यूक्क्य-यलो धर्म त्वब, पापी मीजे गतीब झन् करम क्यूक्क्य?” 19 येरेक्यूत्देबे परमेश्वरजे इच्छा अनुसार सकस् भोक्तेबयूदे भलो क्यूरब ज्य काम फर्स्य मेस्ये थमयूजे सृष्टि चेब परमेश्वरजे लाने रङ्से आत्मा सूम्दीस्य, ङूदे रङ्सेजे कबुल येतार्ने पूरा चीक्क्य। |
Ghale New Testament © Nepal Bible Society, 2011.
Nepal Bible Society