१ पत्रुस 3 - घले नयाँ करारप्ल्यङ् मेस्ये मज 1 मजयू, रङ्से प्ल्यङ्यूजे हक नङ्ने टूङ्, मेस्ये येरे थमयूदे परमेश्वरजे वचन अम्मन्दीलीने रङ्से मजजे ज्य आनिबानि क्यूत्देबे चै पोये यने अम्पर्तीलाबे थमयूदे विश्वास चे खूइय। 2 चेनेयलो नमयूजे जीया कोला शुद्ध मेस्ये गेसेन् प्रेब लायकजे ख्यङ् यदेबे प्ल्यङ्यूदे तङ्क्य। 3 नमयूजे टने सोरो नाकाल्या अन्चील्लाची, मर्जे गनयू, कूम लू पर्तेब कोलायू होत्देबे नमयू फीने सोरो नाकाल्या अन्तङ्स्य। 4 तर नमयूजे सेम् नङ्ने भलो चेब मेस्ये सोरो तम् आत्माजे कलङ्बेये नाश अन्क्यूप्पब गन होत्देबे टूङ, अम्बने परमेश्वरजे खूम्ने सोरो कूम लू पर्तेब ख्यङ्। 5 परमेश्वरने विश्वास चेब मीयूङ् खूम्जे मदीयूदेये येर तर्तीप्देने रङ्सेने ज्य चे ख्य, मेस्ये रङ्से प्ल्यङ्जे हक नङ्ने टूङ ख्य। 6 होरप्रने अब्राहामजे मज सारादेये चे ख्य। ङूदे अब्राहामने ङैजे नोबो यदेबे ङूजे आज्ञा मन्दे ख्य। कादेये नमयूदे चैपोनेये अम्फलाबे ज्य काम चीत्देयलो नमयू साराजे चीमीयू ठर्तीय। 7 प्ल्यङ्यूदे होरप्रने रङ्से मजयूजैये विचार ची, मेस्ये मदीयू कमजोर ख्यङ् यदेबे गेसेन् चीन्नू, चेनेयलो नमयूने परमेश्वरदे पीनब जीयाजे अनुग्रह प्रेब गोसारी ख्योन् थमयूये ख्यङ्, येरे नमयूदे चेब प्रार्थनाने बाधा अम्पर्तीस्य। ज्य काम फर्ब रब सकस् 8 आखिरीने, नमयू क्वाने सेम् त्या क्यूत्देबे दु:ख पर्तीब त्यादे त्याने सान्त्वना पीन्, अत-अजी-च्योनने चेप्र माया त्यादे त्याने ची, दया चेब सेम्, मेस्ये चीद स्यूलूक्कै क्यूरो। 9 कोइ मीदे अन्ज्य चीत्देयलो ङूने अन्ज्य अन्चील्लाची, या ह्यल चीत्देयलो ङूने ह्यल अन्चील्लाची, तर हम्बजे सट्टने असी पीनब क्यूरो, चेनेयलो नमयूदे असी प्रेखूस्य यदेबे अम्ब कामजे लागिने परमेश्वरदे नमयूने क्व ख्यङ्। 10 धर्मशास्त्रदे य ख्यङ्, “जीया सुखी येत्तीङ्रब मेस्ये आनन्द क्यूरब दिन मलब मीदे रङ्से लीने अन्ज्य पो क्यमने मेस्ये ङूर्ने लूच्च पो क्यम्से पीन अन्क्यूर्।” 11 ङूदे अन्ज्य काम क्यापीस्य मेस्ये सोरो ज्य काम चीस्स्य, हम्बदे शान्ति प्रेब लम् मल्स्य मेस्ये हम्ब शान्तिजे लम्ने प्रस्य। 12 चेनेयलो परमप्रभुजे म्यादे धर्मी मीयूने लेन्नीय, मेस्ये थमयूजे प्रार्थना ङूदे ङ्यीन्नीय, तर परमप्रभुदे अन्ज्य काम फरब मीयूजे येतार्ने विरुद्ध चीन्नीय।” 13 कादेये नमयूदे ज्य कामत्यामे चेब सेम् चीत्देयलो, सूदे नमयूजे हानी चीक्क्य? 14 तर कादेये ज्य काम चेजे लागि दु:ख भोक्ते पर्तीलीने परमेश्वरदे नमयूने असी पीन्क्य। हम्बयूदे धम्की पीन्ब फ अम्पर्ती, मेस्ये सूर्त चीन्न अम्पर्ती। 15 तर येशू ख्रीष्टब प्रभु ख्यङ् यदेबे नमयूजे सेम्दे ङूने पूस्ती। नमयूप्रे ख्यब आशाजे पो कोइदे लोत्देयलो हम्बजे जवाफ पीनजे लागि येतार्ने तयार क्यूत्देबे टूङ्, तर चीद स्यूलूक्कै मेस्ये गेसेन् चीत्देबे हम्ब काम चीदो। 16 नमयूजे विवेक शुद्ध यी, येरेक्यूल्लो नमयूने क्वा क्यमबयू मेस्ये ख्रीष्टने नमयूजे आनिबानि ज्य तङ्देबे न-प्वेब मीयू त्वा पर्तीस्य। 17 कादेये नदे सकस् भोक्तीस्य यब परमेश्वरजे इच्छा ख्यङ्देयलो, अन्ज्य काम चीत्देबे सकस् भोक्ते यली ज्य काम चीत्देबे दु:ख भोक्तेब सोरो ज्य ख्यङ्। 18 चेनेयलो ख्रीष्टदे ङीनजे पापयू प्लेत्देबे येतार्जे लागि त्याफेने सीइदे। ङूदे कलङ्बेये पाप अन्चे ख्य, तर नमयूने परमेश्वर ट्याने कूबने पाप चेयूजे लागि सीइदे। ङू ङ्वने सीइदे, तर आत्माजे शक्तिने ङू फेरि सोम्बो क्यूत्दे। 19 ङू अम्ब आत्माने गीलीदेबे कैदने पर्दीनब आत्मायूनेये प्रचार चीत्दे। 20 हम्ब आत्मायूब तोङ्बोजूग्ने परमेश्वरजे आज्ञा अम्मन्देबयू ख्य। नोआदे क्यू जहाज बन्देब बीलने परमेश्वर हम्ब आत्मायूप्रे धेरेन् क्यूत्देबे रेन्न ख्य। हम्ब क्यू जहाजने मी-येत्-त्यामे परमेश्वरदे क्यूदे बच्दीमीदे। 21 अम्ब क्यूजे बप्तिस्मा कीनब च्यूनूप्रत्या ख्यङ्, अम्बदे नमयूने बच्दीमीय। अम्ब ङ्वजे मैल स्येल्बेप्र दी, तर अम्ब शुद्ध विवेक क्यूरजे लागि परमेश्वरप्रे चेब कबुल ख्यङ्। अम्ब बप्तिस्मादे सीइदेबे सोम्बो क्यूरब येशू ख्रीष्टजे कारण नमयूने बच्दीमीय। 22 ङू स्वर्गने गीलीदेबे परमेश्वरजे स्येत्तेयोर् देन् छ्यान ख्यङ्, होर्दे स्वर्गदूतयू, हुकुम चेबयू मेस्ये शक्तियू फ्याने ङूदे हुकुम चेख्यङ्। |
Ghale New Testament © Nepal Bible Society, 2011.
Nepal Bible Society