१ पत्रुस 2 - घले नयाँ करार1 येरेक्यूत्देबे साप्ता दुष्ट पोयू, छल्जे पोयू, कप्टी, ठेनब, मेस्ये मीजे न प्वेब पोयू क्वाने क्यापी। 2 चूजोकेला प्रेब पीचयूप्र शुद्ध आत्माजे ङ्यलमजे तीर्सन ची, मेस्ये हम्ब तीर्सन चीत्देबे नमयू रङ्सेदे प्रेब मुक्तिने ठोङ्बीन खूइय। 3 चेनेयलो प्रभूदे कृपा चे ख्यङ् यब पो नमयू रङ्सेने था ख्यङ्। 4 मीयूदे अन्क्यूर् यदेबे छाबेब, तर परमेश्वरदे चून्तेब मेस्ये सोरो कूम लू पर्देब सोम्बो पत्थर ङू ख्यङ्, ङू ट्याने प्रे। 5 येशू ख्रीष्टने क्यूत्देबे नमयूये परमेश्वरजे खूम्ने सेम् पर्तेब आत्माजे बलि पीनब पवित्र पूस्र्या क्यूरने नमयू सोम्बो पत्थर्यूप्र क्यूत्देबे आत्माजे मन्दिर बन्दीलीम् चीक्की। 6 चेनेयलो धर्मशास्त्रने येये ख्यङ्, “ले! सेलेब मेस्ये कूम लूजे सूर् लूङ् त्या सियोनने येक्क्य। सूदे ङू फ्याने विश्वास चीक्क्य हम्बदे कलङ्बेये त्वा अम्पर्ती।” 7 येरेक्यूत्देबे नमयू सू-सूदे विश्वास चे ख्यङ् हम्बयूजे लागि ङू कूम लूजे ख्यङ्, तर ङूने विश्वास अन्चेयूजे लागि ब, “कीम् थ्याब मीयूदे कम्ब लूङ्ने छाबीदे, हम्ब लूङ् ब जाने प्वे सूर् लूङ् क्यूत्दे।” 8 मेस्ये, “लूङ्त्या ख्यङ्, हम्ब लूङ्दे मीयूजे तोप् च्या-थूङ्बस्ये पीन्क्य, पोलोम्त्या ख्यङ् हम्बदे थमयूने ग्यर्बस्ये पीन्क्य।” चेनेयलो थमयूदे परमेश्वरजे वचन अम्मन्दी मेस्ये ग्यर्बीय। येर क्यूरजे लागि थमयूने सेल्देबे हीते ख्य। 9 तर नमयूब सेल्देबे हीतेब वंश, मूरुम्जे पूस्र्या, पवित्र मीयू, मेस्ये परमेश्वरजे रङ्से मीयू ख्यङ्। ङूजे हार्मन्देब कामयूजे पो नमयूदे बोङ्बे स्य्वे खूस्य यदेबे ङूदे नमयूने मून्दूङ् ख्यनेदे सोरो हार्मन्देब ज्य ओथ्याङ् ख्यनेने रेत्दे। 10 त्याफे नमयू परमेश्वरजे मी ते ख्य, तर जेम्से नमयू परमेश्वरजे मी क्यूर ख्यङ्। त्याफे नमयूदे परमेश्वरजे कृपा अम्प्रे ख्य, तर जेम्से नमयूदे परमेश्वरजे कृपा प्रे ख्यङ्। 11 ङैजे ख्योन्यू, ङ नमयूने बिन्ती चीक्क्य, फीदेशने गीलीदेबे टुनब अन्स्येब मीयूप्र ख्यङ् यब पो स्येदेबे नमयूजे आत्माजे विरुद्धने जीङब अम्ब ङ्वजे अन्ज्य इच्छायूत्यादे आलाक् क्यूत्देबे टूङ्। 12 यहूदी तेब मीयूजे अन्द्रने नमयूजे आनि-बानी सोरो ज्य क्यूस्स्य। कोइदे नमयूने अन्ज्य काम फरब मीयू यदेबे नमयूजे विरुद्ध चीत्देबे क्यम्लीने, थमयूदे नमयूजे सोरो ज्य कामयू तङ्स्य, मेस्ये परमेश्वर न्याय चेने रब दिनने थमयूदे परमेश्वरजे महिमा चीस्स्य। हक चील्लेबयू मेस्ये नोबोयूजे नङ्ने टूङब 13 प्रभुने गेसेन् चेजे लागि हक चील्लेब मीयूजे नङ्ने टूङ्, हम्ब पात्ता नङ्ने केन् मूरुम् क्यूल्लीने, 14 या हाकिमयू क्यूल्लीने, थमयूदे अन्ज्य काम चेयूने सजाइ पीनने मेस्ये सोरो ज्य काम चेब मीयूजे सार्या चेने परमेश्वरदे खर्दीयेब क्यूक्क्य। 15 मूर्ख मीयूदे पो अन्कोलाने क्यमब पोयू नमयूजे सोरो ज्य कामदे ङूर् ल्वा अङ्ख्व चीप्पी, परमेश्वरजे इच्छा अम्बने ख्यङ्। 16 स्वतन्त्र मीयूप्र जीया च। स्वतन्त्र ख्यङ् यब ङ्यूङ्ने अन्ज्य काम अन्चील्लाची, तर परमेश्वरजे त्वो-त्वोमयूप्र क्यूत्देबे जीया च। 17 मीयू क्वानेने गेसेन् ची। रङ्से अत-अजी-च्योन्यूने प्रेम ची। परमेश्वरप्रे फ पर्तीय। मूरुम्ने गेसेन् ची। 18 त्वो-त्वोमयू, रङ्से नोबोयूजे हक नङ्ने टूङ् मेस्ये थमयूजे गेसेन् ची। नमयूने दया चेब मेस्ये ज्य चेब नोबोयूजेत्या हक नङ्ने टूङ दी, सोरो क्वा नोबोयूजे हक नङ्नेये टूङ्। 19 नदे ज्य काम फर्लीने अन्याय क्यूरब सकस् प्रेप्प परमेश्वरजे इच्छा मन्देबे सैदीदे-यलो परमेश्वरदे नने असी पीन्क्य। 20 चेनेयलो नमयूदे अन्ज्य काम फर्कदेबे ठरीब धेरेन् क्यूत्देबे सैदीय-यलो नमयूने चे फाइदा क्यूक्क्य स्व? तर नमयूदे सोरो ज्य काम फर्देबेये सकस् भोक्ते पर्तीब धेरेन् क्यूत्देबे सैदीलो परमेश्वरदे अम्बजे लागि असी पीन्क्य, 21 चेनेयलो अम्ब काम फरने परमेश्वरदे नमयूने क्व ख्यङ्। ख्रीष्टदेये नमयूजे लागि सकस् भोक्तीदे, होर्दे नमयूजे लागि नमूनात्या पीने ख्यङ्, मेस्ये नमयू ङूदे तनब लम्ने प्र पर्दीय। 22 “ङूदे कलङ्बेये पाप अन्चीक्क, मेस्ये ङूजे ङूर्दे कलङ्बेये लूच्च अन्क्यम्क।” 23 थमयूदे ङूजे न पूल्लीने ङूदे खी अम्फा। कष्ट भोक्ते पर्दीलीने ङूदे सूनेये धम्की अम्पीन्। तर ठीक न्याय चेब परमेश्वरने भर् चीत्दे। 24 पापजे लागि ङीन सीबदेबे धार्मिकताजे लागि जीया चखूस्य यदेबे ख्रीष्टदे ङीनजे पाप रङ्से ङ्वने प्लेत्देबे क्रूसने पील्दे। ङूदे प्रेब कष्टजे मयूदे नमयू तम् क्यूत्दे। 25 चेनेयलो नमयू लम् येल्गब स्वान्यूप्र ख्य, तर जेम्से नमयू रङ्से आत्माजे सोम्प्रङ्ब मेस्ये सुरक्षा पीनब ट्याने ल्वार ख्यङ्। |
Ghale New Testament © Nepal Bible Society, 2011.
Nepal Bible Society