१ यूहन्ना 5 - घले नयाँ करारपरमेश्वरजे च फ्याने चेब विश्वास 1 येशूने परमेश्वरदे सेलब ख्रीष्ट ख्यङ् यदेबे विश्वास चेबयू क्वाने परमेश्वरजे च-चीमी ख्यङ्। सूदे पने प्रेम चीक्क्य ङूदे पजे चनेये प्रेम चीक्क्य। 2 परमेश्वरने प्रेम चीत्देबे ङूजे आज्ञायू मन्दीलो अम्ब पोदेने ङीनदे परमेश्वरजे छगूम्-पूर्गूम्ने प्रेम चेब था प्रेक्क्य। 3 परमेश्वरजे आज्ञायू ङीनदे मन्दीलो ङूने प्रेम चेब क्यूक्क्य। ङूजे आज्ञायू सोरो गरो त्वो। 4 चेनेयलो परमेश्वरजे च-चीमीयू क्वादेने संसार फ्याने ट्याय, मेस्ये ङीनजे विश्वासदे संसारने ट्याय। 5 संसार फ्याने सूदे ट्या खूइय? सूदे येशू ख्रीष्ट परमेश्वरजे च ख्यङ् यदेबे विश्वास चीक्क्य हम्बदेने संसार ट्या खूइय। 6 येशू ख्रीष्ट क्यू प्रे कादे रदे, या येशू ख्रीष्ट क्यूदे बप्तिस्मा क्यूत्देबेत्या र दी, तर क्यूप्रे काने क्यूत्देबे र ख्यङ्। अम्ब सत्य ख्यङ् यदेबे गवाही पीनब पवित्र आत्मा ख्यङ्, चेनेयलो पवित्र आत्मा सत्य ख्यङ् 7 थर् सोम् गवाहीयू ख्यङ्: 8 पवित्र आत्मा, क्यू प्रे का ख्यङ्, होर्दे अम्ब सोम्देने त्याप्र गवाही पीन्क्य। 9 कादेये मीदे पीनब गवाही ङीन मन्दीय यलो परमेश्वरदे पीनब गवाही झन् थेप् बोल्यो क्यूक्क्य। चेनेयलो परमेश्वरदे रङ्से चजे बारेने पीनब रङ्सेजे गवाही अम्ब ख्यङ्। 10 सूदे परमेश्वरजे चने विश्वास चीक्क्य, हम्बजे सेम्ने अम्ब पोजे गवाही क्यूक्क्य। परमेश्वरने विश्वास अन्चेबदे परमेश्वरदे पीनब गवाही लूच्च ख्यङ् यीय, चेनेयलो परमेश्वरदे रङ्से चजे बारेने पीनब गवाहीने हम्बदे विश्वास अन्ची। 11 परमेश्वरदे ङीनने कलङ्बेये अन्सीबब जीया पीन्दे, मेस्ये अम्ब जीयाजे मूल ङूजे चने ख्यङ् यब पोजे प्रमाण अम्बने ख्यङ्। 12 सूप्रे परमेश्वरजे च क्यूक्क्य हम्बप्रे जीया क्यूक्क्य, सूप्रे परमेश्वरजे च क्यूस्स्ये त्वो, हम्बप्रे जीया अन्क्यूर्। आखिरी खबर 13 चेनेयलो नमयूदे कलङ्बेये अन्सीबब जीया प्रेक्क ख्यङ् यब पो था क्यूस्स्य यदेबे अम्ब चिट्ठी परमेश्वरजे चजे मीन्ने विश्वास चेब नमयूने लिख्दीन ख्यङ्। 14 परमेश्वरजे इच्छा अनुसार चनेस्यली ङूदे ङीनजे पो ङ्यीन्क्य यदेबे ङीनदे परमेश्वरने पूरा रूप्दे भर् चीक्क्य। 15 ङीनदे प्रार्थना चीत्देबे चनेस्यलीने परमेश्वरदे ङ्यीन्क्य यदेबे ङीनने था ख्यङ् यलो, ङीनदे परमेश्वरने चस्य ख्य हम्ब ङीनदे प्रेक्क ख्यङ् यदेबेये ङीनने था ख्यङ्। 16 कादेये रङ्से अत-अची च्योन्दे कालजे ङूर्ने अन्सबब पाप चीन्नब कोइदे तङ्दे यलो, ङूदे हम्ब अत-अची च्योन्जे लागि परमेश्वरने प्रार्थना चीम्मे पर्तीय, मेस्ये सूदे चीन्नब पाप कालजे ङूर्ने अन्सबब खल्जे ख्यङ्, हम्बने परमेश्वरदे जीया पीन्क्य। तर येर पापये क्यूक्क्य, हम्बदे कालजे ङूर्ने सबीय, हम्बजे लागि कोइदे परमेश्वरने प्रार्थना चीम्मे पर्तीय यदेबे ङ अन्-य 17 अन्ज्य चेब साप्ताने पाप ख्यङ्, तर येर पापये ख्यङ् हम्बदे कालजे ङूर्ने अन्सब। 18 परमेश्वरजे छगूम्-पूर्गूम् सूदेये पाप चीन्नूस्ये त्वो, तर परमेश्वरजे च-येशू ख्रीष्टदे हम्बने जूक्तीदेबे येक्क्य, मेस्ये दुष्ट शैतानदे हम्बने चैये हनी चे-अङ्खू। 19 ङीन परमेश्वरजे ख्यङ्, मेस्ये अम्ब पूरा संसार हम्ब दुष्ट शैतानजे लाने पर्तीक ख्यङ् यदेबे ङीनने था ख्यङ्। 20 परमेश्वरजे च रेक ख्यङ् यदेबे ङीनने था ख्यङ्, मेस्ये सत्य परमेश्वरने स्ये खूस्य यदेबे ङूदे ङीनने ज्ञान पीन ख्यङ्। ङी ङूजे च येशू ख्रीष्टप्रे क्यूत्देबे सत्य परमेश्वरप्रे ख्यङ्। ङू सत्य परमेश्वर मेस्ये कलङ्बेये अन्सीबब जीया ख्यङ्। 21 चीद पीचयू, नमयू मूर्तिट्यादे आलाक्के जूक्तीदेबे टूङ्। |
Ghale New Testament © Nepal Bible Society, 2011.
Nepal Bible Society