१ यूहन्ना 4 - घले नयाँ करारआत्मायूजे जाँच 1 छेब ख्योन्यू, कम्ब क्यूक्को हम्ब आत्माने विश्वास अन्चील्लाची, तर आत्मायू परमेश्वरदे पीनब टोङ् यी सूजो टोङ् यदेबे हम्बजे जाँच ची। चेनेयलो कूम लूच्च अगमवक्तायू अम्ब संसारने योङ्र ख्यङ्। 2 परमेश्वरजे आत्माने नमयूदे येर्बे चीन्तीय: येशू ख्रीष्ट ङ्वजे रूप्ने रेक ख्यङ् यदेबे स्वीकार चेब आत्मायू क्वाने परमेश्वरजे ख्यङ्। 3 येशूने स्वीकार अन्चेब आत्मायू क्वाने परमेश्वरजे दी, तर हम्ब ख्रीष्टजे विरोध चेब आत्मा ख्यङ्, अम्बजे बारेने “हम्ब ख्रीष्टजे विरोध चेब आत्मा रीय” यब पो नमयूदे तैक ख्यङ्। जेम्से अम्ब संसारने हम्ब आत्मा रेक जेन ख्यङ्। 4 ङैजे पीचयू, नमयूब परमेश्वरजे ख्यङ्, मेस्ये नमयूदे थमयू फ्याने ट्याक ख्यङ्। चेनेयलो सू नमयूप्रे ख्यङ्, ङू संसारने ख्यबयली पात्ता केन् ख्यङ्। 5 हम्बयू संसारजे ख्यङ् येरेक्यूत्देबे थमयूदे संसारजे पोत्या चीक्क्य, मेस्ये संसारजे मीयूदे थमयूजे पो ङ्यीन्क्य। 6 ङीनब परमेश्वरजे मी ख्यङ्। सूदे परमेश्वरने चीन्तीय ङूदे ङीजे पो ङ्यीन्क्य, मेस्ये सू परमेश्वरजे दी, हम्बदे ङीजे पो ङ्यीन्स्ये त्वो। येर्बेने ङीनदे सत्यजे आत्मा प्रे लूच्चजे आत्माने चीन्तीय। परमेश्वरजे प्रेम मेस्ये ङीनजे प्रेम 7 ङैजे छेब ख्योन्यू, ङीन त्यादे त्याने प्रेम चीदे, चेनेयलो परमेश्वरदे प्रेम चीक्क्य। सूदे प्रेम चीक्क्य हम्ब परमेश्वरजे छगूम्-पूर्गूम् क्यूक्क्य, मेस्ये ङूदे परमेश्वरने चीन्तीय। 8 प्रेम अन्चेब मीदे परमेश्वरने स्येस्ये त्वो, चेनेयलो परमेश्वर प्रेम ख्यङ्। 9 परमेश्वरजे प्रेम ङीन अन्द्रने येर्बे तङ्रदे, ङूजे चने क्यूत्देबे ङीनदे कलङ्बेये अन्जेनब जीया प्रेस्स्य यदेबे ङूदे रङ्सेजे तीत्यात्या च अम्ब संसारने कूल्पीदे। 10 ङीनदे परमेश्वरने प्रेम अन्ची तर परमेश्वरदे ङीनने प्रेम चीत्दे, मेस्ये ङीनजे पाप मेर्देजे लागि बलि क्यूरने रङ्सेजे च कूल्पीदे, प्रेम यब अम्ब ख्यङ्। 11 ङैजे छेब ख्योन्यू, कादेये परमेश्वरदे ङीनने येर्बे प्रेम चे ख्यङ् यलो, ङीनदे त्यादे त्याने प्रेम चे पर्तीय। 12 परमेश्वरने सूदेये कलङ्बेये अन्तङ्। कादेये ङीनदे त्यादे त्याने प्रेम चीत्दे यलो परमेश्वर ङीनप्रे क्यूक्क्य, मेस्ये ङूजे प्रेम ङीन फ्याने पूरा क्यूक्क्य। 13 ङूदे रङ्सेजे आत्मा ङीनने पीन्क ख्यङ्, येरेक्यूत्देबे ङीन ङूप्रे क्यूक्क्य मेस्ये ङू ङीनप्रे क्यूक्क्य यदेबे ङीनदे था प्रेक्क्य। 14 प परमेश्वरदे अम्ब संसारजे मुक्ति पीनब क्यूरने रङ्सेजे च कूल्बे ख्यङ् यदेबे ङीदे तङ ख्यङ्, मेस्ये अम्बजे गवाही पीन्क्य। 15 सू-सूदे परमेश्वरजे च येशू ख्यङ् यदेबे स्वीकार चीक्क्य, हम्बप्रे परमेश्वर टूङ्क्य मेस्ये हम्बब परमेश्वरप्रे टूङ्क्य। 16 परमेश्वरदे ङीनने चेब प्रेम ङीनदे येर्बे था प्रेक्क्य मेस्ये विश्वास चीक्क्य। परमेश्वर प्रेम ख्यङ्, प्रेमने टूनब मी परमेश्वरप्रे टूङ्क्य, मेस्ये परमेश्वर हम्बप्रे टूङ्क्य। 17 येर्बेने ङीन पूरा रूप्दे परमेश्वर मेस्ये मीयूने प्रेम चेब क्यूत्देबे परमेश्वरजे न्यायजे दिनने ङीन फ-अम्पर्ती। चेनेयलो ख्रीष्ट कर ख्य ङीनये अम्ब संसारने होरप्रने ख्यङ्। 18 प्रेमने फ यब पो अन्क्यूर्, तर सिद्ध प्रेमदे फब पोयू मल्पीय। चेनेयलो फजे सम्बन्ध दण्डप्रे क्यूक्क्य यदेबे यीय, होर्दे सू फ हम्बप्रे सिद्ध प्रेम क्यूस्स्ये त्वो। 19 परमेश्वरदे ङीनने खूम् प्रेम चीत्दे होरेक्यूत्देबे ङीनदेये ङूने प्रेम चीक्क्य। 20 सूदे परमेश्वरने प्रेम चीक्क्य यीय, तर रङ्से अत-अची च्योन्ने ह्यल चीक्क्य यलो हम्ब लूच्च क्यूक्क्य, चेनेयलो रङ्सेदे तङब रङ्सेजे अत-अची च्योन्ने प्रेम अन्चेबदे अन्तङब परमेश्वरने प्रेम चे अङ्खू। 21 परमेश्वरदे पीन्देबे ङीनदे अम्ब आज्ञा प्रे ख्यङ्, सूदे परमेश्वरने प्रेम चीक्क्य हम्बदे रङ्सेजे अत-अची च्योन्नेये प्रेम चे पर्तीय। |
Ghale New Testament © Nepal Bible Society, 2011.
Nepal Bible Society