१ यूहन्ना 3 - घले नयाँ करार1 ले, प परमेश्वरदे ङीनने कर फत्या माया चे ख्यङ्, परमेश्वरदे ङीनने ङैजे छगूम्-पूर्गूम् यदेबे य ख्यङ्, मेस्ये तम्दम्ने ङीन ङूजे छगूम्-पूर्गूम् ख्यङ्। येरेक्यूत्देबे संसारजे मीयूदे ङीनने अन्स्ये, चेनेयलो थमयूदे परमेश्वरने अन्स्ये। 2 ङैजे छेब ख्योन्यू, चूजो ङीन परमेश्वरजे छगूम्-पूर्गूम् क्यूर ख्यङ्, मेस्ये ङ्येदे ङीनने च क्यूक्क्य यदेबे ङीनने चूजोसेमेने अन्तम्मे ख्यङ्। कन्छ्वाब ङू तङ्रीय हन्छ्वाब ङीनये ङूप्रने क्यूक्क्य चेनेयलो ङू करप्र ख्य ङीनदे ङूने होरप्रने तङ्क्य यदेबे स्ये ख्यङ्। 3 होर्दे ङू पवित्र ख्यङ्, सूदे रङ्सेने ङूप्र पवित्र क्यूरने आशा चीक्क्य हम्ब मीयू क्वादेने रङ्सेने पवित्र चीक्क्य। 4 पाप चेब क्वादेने परमेश्वरजे नियम अम्मन्देब क्यूक्क्य। परमेश्वरजे नियम अम्मन्देब पाप ख्यङ्। 5 मीयूजे पाप लङ्केने ङू र-ख्यङ् यब पो नमयूदे स्ये ख्यङ्। मेस्ये ङूने चै पापये त्वो। 6 ङूप्रे क्यूरब सूमीदेये पाप चीन्नूस्ये त्वो। पाप चीन्नब सूमीदेये ङूने तङ्स्येये त्वो, स्येसेये त्वो। 7 सूमीदेये नम चीद पीचयूने छल्ले अङ्खूस्य। सूदे ठीक काम फर्क्य, ख्रीष्ट धर्मी ख्यप्रने हम्बये धर्मी क्यूक्क्य। 8 सूदे पाप चीक्क्य हम्ब शैतानजे मी क्यूक्क्य। चेनेयलो शैतानदेब अम्ब संसार सुरुक्यूरमेस्येने पाप चीन्नने ख्यङ्। शैतानजे कामयू नाश चेने परमेश्वरजे च रदे। 9 परमेश्वरजे छगूम्-पूर्गूम् सूदेये पाप चीन्नूस्ये त्वो, चेनेयलो परमेश्वरजे स्वभाव हम्बप्रे क्यूक्क्य, मेस्ये हम्ब मीदे पाप चीन्न खूस्ये त्वो, चेनेयलो हम्ब परमेश्वरजे छगूम्-पूर्गूम् ख्यङ्। 10 परमेश्वरजे छगूम्-पूर्गूम् सू ख्यङ् मेस्ये शैतान छगूम्-पूर्गूम् सू ख्यङ्, यदेबे येरे चेलाबे स्ये खूइय: ज्य काम अम्फरब मेस्ये रङ्सेजे अत-अची च्योन्ने माया अन्चेब मी परमेश्वरजे छगूम्-पूर्गूम् दी। त्यादे त्याने चेब प्रेम 11 नमयूदे खूम्मेस्येने तब खबर अम्ब ख्यङ्, “ङीनदे त्यादे त्याने प्रेम चे पर्दीय।” 12 ङीन कयिनप्र क्यूर अन्क्यूर्, ङू दुष्ट शैतानजे मी क्यूत्देबे रङ्से च्योन्ने सेत्दे। ङूदे रङ्से च्योन् चेने सेत्दे? चेनेयलो ङूजे रङ्सेजे कामयू दुष्ट ख्य, होर्दे ङूजे च्योन्जे कामयूब परमेश्वरने सेम् पर्देब ख्य। 13 अत-अची च्योन्यू, संसारजे मीयूदे ह्यल चीप्प हार्मन्दे अम्पर्ती। 14 ङीन रङ्सेजे अत-अची च्योन्ने प्रेम चीक्क्य, होरेक्यूत्देबे ङीन सीबब जीयाने ट्यादेबे कलङ्बेये अन्जेनब जीयाने क्योर ख्यङ् यदेबे ङीनदे स्ये ख्यङ्। सूदे प्रेम अन्ची, हम्ब सीबब जीयानेने टूनीय। 15 रङ्से अत-अची च्योन्ने ह्यल चेब मी क्वाने ज्यान्मारा क्यूक्क्य, मेस्ये कम्ब ज्यान्माराप्रेये कलङ्बेये अन्सीबब जीया अन्क्यूर् यब पो नमयूदे स्ये ख्यङ्। 16 ख्रीष्टदे ङीनजे लागि रङ्से प्राण पीन्दे, अम्बदेने प्रेम यब च यदेबे ङीनदे कोय। ङीनदेये रङ्से अत-अची च्योन्यूजे लागि रङ्से प्राण पीन पर्तीय। 17 कोइ मीप्रे संसारजे सीर् सम्पत्ति कूम ख्यङ्लीने रङ्से अत-अची च्योन्ने सोरो हर्जो पर्तीन तङ्ब थमयूजे लागि ङूजे सेम्दे पीन्दीङ् अन्डलो, होर मीने परमेश्वरदे केरे प्रेम चीक्क्य? 18 ङैजे पीच चीदयू, ङीन वचन मेस्ये ङूर्देत्या प्रेम अन्चील्लाचीदे, तर त्यादे त्याने साक्तीमेब काम चीदे मेस्ये तम्दम् प्रेम चीदे। 19 ङीन सत्य परमेश्वरजे ख्यङ् यदेबे अम्बदेने थाप्रे खूइय, मेस्ये येर्बेने परमेश्वरजे खूम्ने ङीन सेम् बोल्यो चीत्देबे मेर खूइय। 20 ङीनजे सेम्दे ङीनने पापचेब मी यदेबे दोष पीन्क्य-यलो ङीनजे सेम्यली परमेश्वर सोरो केन् ख्यङ् मेस्ये ङूदे साप्ताने स्ये ख्यङ् यदेबे ङीनने था ख्यङ्। 21 छेब ख्योन्यू, ङीनजे सेम्दे ङीनने पापचेब मी यदेबे दोष अम्पीन्लो परमेश्वरजे खूम्ने ङीन सेम् केन् चीत्देबे मेर्बब बोङ् प्रेक्क्य, 22 मेस्ये ङीनदे च स्य, हम्ब ङूदे पीन्क्य चेनेयलो ङीनदे ङूजे आज्ञायू मन्दीय, मेस्ये ङूने सेम् पर्तेब कामयू चीक्क्य। 23 ङीनदे ङूजे च येशू ख्रीष्टजे मीन्ने विश्वास चे पर्तीय, मेस्ये ख्रीष्टदे ङीनने आज्ञा पीन अनुसार त्यादे त्याने प्रेम चे पर्तीय यब अम्ब परमेश्वरजे आज्ञा ख्यङ्। 24 परमेश्वरजे आज्ञायू मन्देब क्वाने परमेश्वरप्रे क्यूक्क्य, मेस्ये परमेश्वर थमयूप्रे क्यूक्क्य। परमेश्वर ङीनप्रे क्यूक्क्य यदेबे परमेश्वरदे पीनब पवित्र आत्मादे ङीनने स्योत्देबे था प्रेक्क्य। |
Ghale New Testament © Nepal Bible Society, 2011.
Nepal Bible Society