१ यूहन्ना 2 - घले नयाँ करारख्रीष्टदे ङीनने साक्तीमीय 1 ङैजे छेब पीचयू, नमयूदे पाप अन्चील्लाची यदेबे ङ अम्ब चिट्ठी लिख्दीन ख्यङ्। तर कोइ मीदे पाप चीत्दे यलीने ङीनजे पक्षने प परमेश्वरप्रे क्यम्मेब ङू त्या धर्मी ख्यङ् हम्बब येशू ख्रीष्ट ख्यङ्। 2 ङीनजे पाप क्षमा चेजे लागि येशू ख्रीष्ट बलि क्यूत्दे, मेस्ये ङीनजे लागित्या दी, तर मुलुकभरी ख्यब मीयूजे लागिये पापजे बलि क्यूत्दे। 3 कादेये ङीनदे परमेश्वरजे आज्ञायू मन्दीदेयलो तम्दम्ने ङीनदे ङूने स्ये ख्यङ् यदेबे था क्यूक्क्य। 4 सूदे “ङैदे ङू स्ये ख्यङ्” यीय तर ङूजे आज्ञायू मन्दे अन्ङ्यीन्लो हम्ब लूच्च क्यूक्क्य, मेस्ये हम्बजे सेम्ने सत्य अन्क्यूर्। 5 तर सूदे परमेश्वरजे वचन मन्दीय, तम्दम्ने हम्ब मीने ङूजे प्रेम पूरा क्यूक्क्य। ङीन ङूप्रे ख्यङ् यब पो अम्बदेने पक्क था प्रेक्क्य। 6 परमेश्वरप्रे ख्यङ् यब मीजे आनिबानि ख्रीष्टजेप्रने क्यूर पर्दीय। सर् आज्ञा 7 छेब ख्योन्यू, ङ नमयूने सर् आज्ञा दी, तर हम्ब मीयूङ्मेस्येने चील्लीनब ङीङ् आज्ञा नमयूने लिख्दीन ख्यङ्, हम्ब शुरुमेस्येने नमयूप्रे ख्यङ्। अम्ब ङीङ् आज्ञा नमयूदे तब वचन ख्यङ्। 8 होरेक्यूल्लीने ङ नमयूने सर् आज्ञा तीत्या लिख्दीन ख्यङ्, हम्बजे सत्य येशू ख्रीष्ट मेस्ये नमयूने तङ ख्यङ्, चेनेयलो मून्दूङ् जेङ्कमेल्न ख्यङ् मेस्ये तम्दम्जे ओथ्याङ् तरने छालाला प्ल्यान ख्यङ्। 9 सूदे “परमेश्वरजे ओथ्याङ्ने ख्यङ्” यदेबे यीय, तर रङ्से अत-अची च्योन्यूने ह्यल चीक्क्य, हम्ब मून्दूङ्नेने टूनब क्यूक्क्य। 10 सूदे रङ्से अत-अची च्योन्ने प्रेम चीक्क्य, हम्ब परमेश्वरजे ओथ्याङ्ने क्यूक्क्य, ङूने चैसेदेये भार्-च खूस्ये त्वो। 11 तर सूदे रङ्से च्योन्ने ह्यल चीक्क्य, हम्ब मून्दूङ्ने क्यूक्क्य मेस्ये मून्दून्ने प्रीय, होर्दे केने प्रेन ख्यङ् यदेबे स्येसे त्वो, चेनेयलो मून्दूङ्दे हम्बने म्या अन्तङ चीक्कब क्यूक्क्य। 12 ङैजे छेब पीचयू, ङ नमयूने अम्ब लिख्दीन ख्यङ्, चेनेयलो ख्रीष्टजे मीन्जे लागि नमयूजे पाप क्षमा क्यूक्क ख्यङ्। 13 नम, पयूने ङ लिख्दीन ख्यङ्, चेनेयलो सुरुमेस्येने ख्यब ख्रीष्टने नमयूदे स्ये ख्यङ्। नम, स्योर्बयूने ङ लिख्दीन ख्यङ्, चेनेयलो नमयूदे हम्ब दुष्ट शैतान फ्याने ट्याक ख्यङ्। ङैजे चीद पीचयू, ङ नमयूने लिख्दीन ख्यङ्, चेनेयलो नमयूदे ङीनजे प परमेश्वरने स्ये ख्यङ्। 14 नम, पयूने ङ लिख्दीन ख्यङ्, चेनेयलो मूरू संसार सुरु क्यूर यली खूम् ख्यबने नमयूदे स्ये ख्यङ्, स्योर्बयू, ङ नमयूने लिख्दीन ख्यङ्, चेनेयलो नमयू बोल्यो ख्यङ्, मेस्ये परमेश्वरजे वचन नमयूदे बोङ्बे सेम्ने येन ख्यङ्, मेस्ये नमयूदे हम्ब दुष्ट शैतानने ट्या ख्यङ्। अम्ब संसारने प्रेम अन्चील्लाची 15 संसार या संसारजे सेयूने प्रेम अन्चील्लाची कादेये कोइमीदे अम्ब संसारजे सेयूने प्रेम चीत्दे यलो परमेश्वर पजे प्रेम ङूप्रे क्यूस्से त्वो। 16 चेनेयलो संसारने ख्यब साप्ता सेयू, या ङ्वजे इच्छायू, म्याजे लोभ, अम्ब जीयाने रङ्से केन् त्वेब सेम् प परमेश्वर ट्यादे रब दी, तर संसारदे रब ख्यङ्। 17 संसार नाश क्यूप्पीय मेस्ये हम्बजे अन्ज्य इच्छाये नाश क्यूप्पीय, तर परमेश्वरजे इच्छा पूरा चेब मी येतार्ने टूनीय। ख्रीष्टजे विरोध चेबयूजे बारेने बोङ्बे आर्तेब 18 ङैजे पीचयू, अम्ब आखिरी सेमे ख्यङ्। ख्रीष्टजे विरोध चेब रेन ख्यङ् यब पो नमयूदे त ख्यङ्। होरेक्यूत्देबे ङीनदे स्ये ख्यङ्, अम्ब आखिरीजेसेमे ख्यङ्। 19 थमयू ङीनट्यादे योङ्देबे गीली, चेनेयलो थमयू ङीनजे ते ख्य। कादेये थमयू ङीनजे यलो थमयू ङीनप्रेने टूङख्यङ्दे, तर थमयू क्वाने ङीनजे ते टूङ् यब पो तम्मेने थमयू योङ्देबे गीले ख्यङ्। 20 तर पवित्र परमेश्वरदे नमयूने पवित्र आत्मा पीन्क ख्यङ्, मेस्ये नमयू क्वादेने सत्य च ख्यङ् यदेबे स्येय। 21 नमयूदे सत्य अन्स्ये ख्यङ् यदेबे ङैदे अम्ब लिख्दे दी, तर सत्यदे लूच्च चैत्याये योङ्रस्ये त्वो यब पो नमयूदे स्येक ख्यङ् यदेबे ङैदे नमयूने लिख्दे ख्यङ्। 22 लूच्च सू ख्यङ्? सूदे येशूने मुक्ति पीनब ख्रीष्ट ख्यङ् यब पोने अम्मन्दी हम्ब लूच्च ख्यङ्। परमेश्वर प प्रे च येशूने सूदे अम्मन्दी हम्बने ख्रीष्टजे विरोध चेब ख्यङ्। 23 चने अम्मन्देब सूमीप्रेये प क्यूस्से त्वो। सूदे चने मन्दीय हम्बप्रे प क्यूक्क्य। 24 कम्ब पो नमयूदे सुरुमेस्येने त ख्य हम्ब पो नमयूप्रे क्यून्नूस्य। कादेये सुरुमेस्येने तब हम्ब पो नमयूजे सेम्ने येन्नूदे यलो नमयूप्रे प मेस्ये च क्यूक्क्य। 25 ङूदे ङीनने पीन्क्य यदेबे कबुल चेब कलङ्बेये अन्सीबब जीया अम्ब ख्यङ्। 26 नमयूने छल् चेबयूजे अम्ब पोयू ङ नमयूने लिख्दीन ख्यङ्। 27 ख्रीष्टदे नमयूने पीनब पवित्र आत्मा नमयूप्रे क्यून्नीय, मेस्ये सूदेये नमयूने लोम-तन चे अम्पर्ती। पवित्र आत्मादे नमयूने साप्ता पोजे बारेने लोम-तन चीक्क्य। ङूदे लोम्मेब पो सत्य ख्यङ्, लूच्च अन्क्यूर्। अम्ब पवित्र आत्मादे लोम-तन चेप्रने नमयू ख्रीष्टप्रे क्यून्नू। परमेश्वरजे पीचयू 28 पीच चीदयू, जेम्से ख्रीष्टप्रे क्यून्नू चेनेयलो ङू अने रब ङीनदे आँट प्रेक्क्य, मेस्ये ङू रब बीलने ङूजे खूम्ने ङीन त्वा अम्पर्ती। 29 ख्रीष्टदे ठीक न्याय चेख्यङ् यब पो कादेये नमयूदे स्येदे यलो ठीक काम फरब क्वाने परमेश्वरजे छगूम्-पूर्गूम् क्यूक्क्य यब पो नमयूने पक्क क्यूस्स्य। |
Ghale New Testament © Nepal Bible Society, 2011.
Nepal Bible Society