१ यूहन्ना 1 - घले नयाँ करारजीया पीनब वचन 1 हम्ब जीया पीनब वचन सुरुमेस्येने ख्य, हम्ब वचन ङीदे तैक ख्यङ्, ङीजे रङ्से म्यादेने तङ्क ख्यङ्, ङीदे लेत्दे मेस्ये ङीजे लादे छूत्दे, 2 अम्ब जीया तङ्रदे, ङीदे तङ्दे मेस्ये ङी गवाही पीन्क्य, होर्दे कलङ्बेये अन्सीबब जीयाजे पो नमयूने स्योक्क्य। अम्ब जीया पप्रे ख्य, मेस्ये ङीन ट्याने तङ्रदे। 3 ङीदे च तङ्दे मेस्ये तदे, हम्ब नमयूने स्योक्क्य येरे ङीप्रे नमयूजे सङ्गति क्यूस्स्य। ङीजे सङ्गतिब परमेश्वर प मेस्ये च येशू ख्रीष्टप्रे ख्यङ्। 4 ङीजे आनन्द पूरा क्यूस्स्य यदेबे ङी अम्ब पो लिख्दीन ख्यङ्। परमेश्वरजे ओथ्याङ् 5 ङीदे प्रभु येशू ट्यादे तब मेस्ये नमयूने स्य्वेब वचन अम्बने ख्यङ्: परमेश्वर ओथ्याङ् ख्यङ् मेस्ये ङूने मून्दूङ् छीत्याये त्वो। 6 कादेये ङीनजे सङ्गति परमेश्वरप्रे ख्यङ् यदेबे ङीन यीय, मेस्ये मून्दूङ्नेने प्रेनूदे यलो, ङीन लूच्च क्यमब क्यूक्क्य मेस्ये सत्य अन्चेब क्यूक्क्य। 7 तर परमेश्वर ओथ्याङ् क्यूरप्रने ङीनये ओथ्याङ्ने प्रदेयलो, ङीनजे सङ्गति त्या त्याप्रे क्यूक्क्य, मेस्ये परमेश्वरजे च येशूजे कादे ङीनजे साप्ता पापने ठूदेबे शुद्ध चीक्क्य। 8 कादेये ङीनदे रङ्सेने पाप त्वो यदेबे यलो ङीनदे रङ्सेने धोका पीनब क्यूक्क्य, मेस्ये ङीनने सत्य अन्क्यूर्। 9 कादेये ङीनदे परमेश्वरजे खूम्ने रङ्से पापजे पश्चाताप चीत्देबे परमेश्वरदेले ल्वारदेयलो, ङूदे ङीनजे पाप क्षमा चीम्मीय, मेस्ये अन्ज्य कामयू साप्ताने चीस्स्ये अम्पीन्लाबे शुद्ध चीम्मीय, चेनेयलो परमेश्वर भर् पर्दे ख्वब मेस्ये धर्मी ख्यङ्। 10 कादेये ङीनदे पाप अन्चीक्क यदेबे क्यम्क्य यलो अम्ब पोने ङीनदे परमेश्वरने लूच्च चेब ठर्तीय, मेस्ये ङूजे वचन ङीनजे सेम्ने अन्क्यूर्। |
Ghale New Testament © Nepal Bible Society, 2011.
Nepal Bible Society