१ कोरिन्थी 9 - घले नयाँ करारमूल स्यूस्स्याजे हक 1 च ङ स्वतन्त्र त्वया? ङ मूल स्यूस्स्या तेया? च ङैदे ङीनजे प्रभु येशूने अन्तङया? च प्रभुजे लागि ङैदे चेब कामजे फल नमयू तेया? 2 ङ सूजो मीयूजे लागि मूल स्यूस्स्या तीलीने नमयूजे लागिब मूल स्यूस्स्या क्यूर ख्यङ्, चेनेयलो प्रभुजे कामने ङैजे मूल स्यूस्स्या पदजे छप नमयू ख्यङ्। 3 ङैजे विरुद्धने क्यमबयूने ङैजे जवाफ अम्ब ख्यङ्, 4 ङीजे लागि थान्ता प्रेपर्देब हक त्वया? 5 सूजो मूल स्यूस्स्यायूप्र, प्रभुजे च्योनयू मेस्ये केफासदेप्र ङीदेये मज टेल्देबे प्रब हक त्वया? 6 ङै प्रे बारनाबासदे त्यामे ख्वाजे स्वेजे लागि काम चे पर्देया? 7 सूदे रङ्सेजे थान्ता चदेबे सिपाईजे काम चीक्क्या स्व? अङ्गुरजे बली प्वेबदे हम्बजे सी अन्चया? रोलायू स्वोत्देबे सूदे हम्बजे ङ्यलम् अन्थूङ् स्व? 8 अम्ब ङैदे मीजे विचारदे त्यामे क्यम्न औ स्व? मोशादे लिख्देब नियमदेये अम्ब पो अन्-यया? 9 चेनेयलो मोशाने पीनेब नियमने लिख्दीये ख्यङ्, “दाइँ पूप्प लप्जे ङूर्ने पूत्रू अम्पूल्लाची।” लप्जे लागि त्यामे परमेश्वरदे सूर्त चीक्क्या? 10 परमेश्वरदे ङीनजे लागि अम्ब य तेया? ङीनजे लागिने अम्ब लिख्दीये ख्यङ्। चेनेयलो रङ् य्वब प्रे दाइँ प्वेबदे खेतीजे भा प्रेक्कीच यब आशाने रङ् यूय मेस्ये दाइँ पूक्य। 11 कादेये ङीयूदे नमयूजे अन्द्रने आत्माजे लू सूग ख्यङ् यलो, मेस्ये नमयू ट्यादे च-थूङ सेयूने फूङ् पूक्क्ययलो च हम्ब हार्मन्देब पो क्यूक्क्या? 12 कादेये सूजो मीयूदे नमयू ट्यादे येर हक प्रेपर्तीय यदेबे यीय यलो, ङीजे हम्बयली थेप् हक अन्लादेया? होरेक्यूल्लीने ङीदे अम्ब हक प्रेपर्तीय यदेबे अन्-य, तर ख्रीष्टजे सूगब खबरने बाधा अन्चील्लाचीदे यदेबे बरू साप्ता पो ङी सैदीय। 13 मन्दिरने काम फरबयूदे मन्दिरने चेर्तीयेब चसेयू चीय, होर्दे बलि चेर्तेब टेने काम फरबयूदे बलि चर्दीयेब सेजे रङ्से भा प्रेक्क्य यब पो नमयूने था त्व? 14 होरप्रने सूगब खबर प्रचार चेबयूदेये सूगब खबर स्योत्देने रङ्से ख्वाजे लागि प्रेपर्तेब थान्ता प्रेस्स्य यदेबे प्रभुदे आज्ञा पीन्दे। 15 तर ङैदे यर हकयू कम्बये प्रेपर्तीय यदेबे अन्-य, होर्दे ङैजे लागि येर चीम्मीस्य यदेबे अम्ब पोयू लिख्दे दी। चेनेयलो ङैदे थान्ता स्यदेबे अम्ब काम चेयली बरू ङ तक्पने सीबब ज्य क्यूक्क्य, ङैदे नमयूने थान्ता अन्स्यलाबेने अम्ब काम नमयूजे लागि चे खूदे होरेक्यूत्देबे ङ त्वे ख्व ख्यङ्। 16 कादेये ङैदे सूगब खबर स्योत्देयलो, अम्बने ङ त्वे पर्देब कारण चेत्याये त्वो। चेनेयलो प्रचार चेने कर् लादे ख्यङ्। सूगब खबर प्रचार अन्चीत्देयलो ङैने धिक्कार ख्यङ्। 17 ङैजे रङ्से इच्छादे ङ अम्ब काम चीक्क्य यलो ङैजे लागि इनाम ख्यङ्, तर कादेये ङैदे रङ्सेजे इच्छादे अन्चील्लीने परमेश्वरदेने अम्ब कामजे जीम्मा ङैने पीने ख्यङ्। 18 होरेक्यूल्लो ङैजे लागि इनामब च ख्यङ्? होरेने सूगब खबर प्रचार चेप्रेस्स्य। सूगब खबर प्रचार चीप्प प्रेपर्तेब हक ङैदे अन्स्यलाबेने अम्ब काम चे खूस्य यब पो त्यामे ख्यङ्। 19 चेनेयलो ङ मीयूजे अधिनदे स्वतन्त्र क्यूल्लीने खूदासेमे येशूने विश्वास चेने कूम मीयू रेखूस्य यदेबे ङैदे खोत्ताजे लागि रङ्सेने त्वो क्यूस्स्ये पीन्दे। 20 यहूदीयूदे ख्रीष्टने विश्वास चेखूस्य यदेबे ङ यहूदीयूजे लागि यहूदीयूप्र क्यूत्दे। मोशाजे नियम मन्देब मीयूदे ख्रीष्टने विश्वास चीस्य यदेबे ङ रङ्सेदे हम्ब नियम अम्मन्दीलीने मन्देब मीयूजे लागि हम्ब नियम मन्देप्रने क्यूत्दे। 21 मोशाजे नियमजे नङने अन्टूङब मीयूदे ख्रीष्टने विश्वास चेखूस्य यदेबे ङ मोशाजे नियमजे नङ्ने अन्टूङबयूप्रने क्यूत्दे। तर परमेश्वरजे नियमदे ङ स्वतन्त्र त्वो, ङ ख्रीष्टजे नियमजे नङ्ने ख्यङ्। 22 विश्वासने बोल्यो त्वबयूने बोल्यो चे खूस्य यदेबे थमयूजे लागि ङैये विश्वासने बोल्यो त्वयूप्रने क्यूत्दे। ङैदे चे ख्वब साप्ता तर्तीप्दे त्या-यब त्यादेब ख्रीष्टने चीन्ते खूस्य यदेबे खोत्ताजे लागि ङ साप्ताने क्यूत्दे। 23 सूगब खबरजे असीयूप्रे ङैये सामेल् क्यूर खूस्य यदेबे ङ अम्ब साप्ता थोक चीक्क्य। 24 ग्य पार्देब मीयू क्वाने ग्येय, तर इनाम ब तीत्यादे त्यामे प्रेक्क्य यब पो नमयूने था त्वा? नमयू इनाम प्रेब तर्दीप्दे ग्य। 25 खेल क्याने सामेल् क्यूरबयू क्वादेने साप्ताकूरूने होस्स्यार क्यूत्देबे नियम नङ्ने टूङ-पर्तीय। थमयू नाश क्यूत्देबे प्रब मुकुट प्रेने येरे चीक्क्य, तर ङीनब कलङ्बेये नाश अन्क्यूप्पब मुकुट प्रेने येरे चीक्क्य। 26 येरेक्यूत्देबे उदेश्य त्व सीत्तीने ङ अन्-ग्य। मूड्कीदे उन्दूने खान्देब मीदेप्र ङ मूड्कीदे अङ्खान्दी। 27 तर ङ रङ्सेजे ङ्वने सकस् पीन्देबे रङ्सेजे काबुने येक्य, नत्रयलो सूजो मीयूने प्रचार चेङ्येदे रङ्सेब इनाम प्रेजे लागि लायक त्वब ठर्तीय। |
Ghale New Testament © Nepal Bible Society, 2011.
Nepal Bible Society