१ कोरिन्थी 7 - घले नयाँ करारङ्येन्जे पो 1 जेम्से नमयूदे लिख्दीयेब पोयूजे बारेने यीय: ङ्येन् अन्चील्लाबे टूङब मी सोरो ज्य ख्यङ्। 2 तर वेश्य कामयूने अम्फस्तीप्रस्य यदेबे क्वादेने ङ्येन् चीस्य। पती क्वाजेने रङ्से मज क्यूस्स्य, होरदे मदी क्वाजेने रङ्से प्ल्यङ् क्यूस्स्य। 3 ङ्येन्क्यूक्कमेस्ये रङ्से मजदे प्रेपर्देब हक प्ल्यङ्दे पीन्स्य, मेस्ये येरप्रने मजदेये रङ्से प्ल्यङ्ने चीस्य। 4 मजजे ङ्व फ्याने प्ल्यङ्जेये हक क्यूक्क्य, मजजे दी, होरप्रने प्ल्यङ्जे ङ्व फ्याने रङ्से मजजैये हक क्यूक्क्य, प्ल्यङ्जे दी। 5 प्ल्यङ्-मज प्रे ङ्यूमजे लागि त्यादे त्याने छ्यो अन्-यस्य। कादेये छ्यो यलीने ङ्हीजे मोतोदेने तेदिनजे लागित्यामे क्यूस्स्य मेस्ये प्रार्थना चीन्नखूस्य। होर्देङ्येदे फेरि प्रे-टूङ् नत्र सेम् थ्या-अङ्खूदेबे शैतानदे नमयूने पाप काम चेने फस्ते खूइय। 6 अम्ब नमयूदे चेने पर्दीय यदेबे ङैदे आज्ञाजे रूप्ने अन्-य, तर नमयूजे इच्छा क्यूल्लो येरे चे खूइय। 7 मी क्वाने ङप्र क्यूस्स्य यब ङ सेम् चीक्क्य। तर परमेश्वरदे क्वानेने खास-खास बर पीने ख्यङ्, त्याने सूजो बर, सूजोबने सूजो थर्जे बर पीने ख्यङ्। 8 तर ङ्येन् अन्क्यूरेबयू मेस्ये प्ल्यङ् सीयेबयूने ङ यीय, थमयूदे ङप्रने ङ्येन्अन्चील्लो सोरो ज्य क्यूर ख्यङ्दे। 9 तर थमयूदे रङ्से सेम् काबूने येअङ्खूदेबे ङ्येन् चीतीङ् रदेयलो थमयूदे ङ्येन् चीस्य। चेनेयलो ङ्येन्चेने सेम् प्ल्याङ्नयली बरू ङ्येन्चेब सोरो ज्य ख्यङ्। 10 ङ्येन् चीक्कबयूने ङ बोङ्बे आज्ञा पीन्क्य, ङैजे आज्ञा दी, तर प्रभुजे आज्ञा ख्यङ्: मजदे रङ्से प्ल्यङ्ने अन्क्यापीला चीस्स्य। 11 तर हम्बदे प्ल्यङ्ने क्यादेबे प्रलीने ङूदेब ङ्येन् अन्चीस्स्य, बरू रङ्से प्ल्यङ् ट्याने प्रदेबे फूङ् टूङ्स्य। प्ल्यङ्देये रङ्से मजप्रे लम् अम्प्रस्य। 12 तर नम सूजोयूने ङ यीय, अम्ब ङैदे यब पो ख्यङ्, प्रभुदे यब दी, कादेये कोइ च्योनजे मज ख्रीष्टने विश्वास अन्चेब ख्यङ् होर्दे, हम्ब मदी ङूप्रेने टूङब सेम् चील्लो ङूदे मजप्रे लम् अम्प्रस्य। 13 कादेये कोइ मदीजे ख्रीष्टने विश्वास अन्चेब प्ल्यङ् ख्यङ्, होर्दे ङूप्रे टूङ्ब सेम् चील्लो ङूदे प्ल्यङ्प्रे लम् अम्प्रस्य। 14 चेनेयलो विश्वास अन्चेब प्ल्यङ् रङ्से मजदे चेब विश्वासदे पवित्र क्यूक्क्य मेस्ये विश्वास अन्चेब मज रङ्से प्ल्यङ्दे चेब विश्वासदे पवित्र क्यूक्क्य, नत्रयलो थमयूजे च-चीमीयू अशुद्ध क्यूर ख्यङ्दे, तर तम्दम्ने थमयू पवित्र ख्यने ख्यङ्। 15 तर विश्वास अन्चेबदे विश्वास चेब प्ल्यङ् या मजप्रे लम् प्रदेबे टूङक्य यलो टूङ्स्य। येर क्यूप्प हम्ब विश्वास चेब प्ल्यङ् या मजजे बन्धन्नेये अन्क्यूर्। चेनेयलो परमेश्वरदे ङीनने शन्ति क्यूत्देबे टूङजे लागि क्व-ख्यङ्। 16 मदी! कादेये येशूने विश्वास अन्चेब रङ्से पतीने विश्वासने रे खूइय यदेबे था त्वा? होरप्रने पती! कादेये येशूने विश्वास अन्चेब रङ्से मदीने विश्वासने रे खूइय यदेबे था त्वा? 17 प्रभुदे क्वानेने कर खल्जे जीया चजे लागि खेर्तीयेख्य हम्ब जीयाने टूनू मेस्ये कर खल्जे जीया चेन बीलने कोदे, हम्ब अनुसारने हम्ब मीदे जीया चस्य। मण्डलीयू क्वाजे लागि ङैदे लोम्मेब पो अम्बने ख्यङ्। 18 खूम्ने खतना क्यूक्कब कोइ मी पर्मेश्वरदे सेले ख्यङ्देयलो ङूदे हम्ब च्यूनू मेल्बेने बोङ् अन्चील्लाचीस्स्य। कादेये कोइ मी खतना अन्क्यूप्पने परमेश्वरदे सेले ख्यङ्देयलो ङूदे खतना चेने बोङ् अन्चील्लाचीस्स्य। 19 चेनेयलो खतना चे प्रे अन्चेब केन् पो दी, तर केन् पो ब परमेश्वरजे आज्ञा मन्देब ख्यङ्। 20 कर अवस्थाने परमेश्वरदे मीयूने कोदे, होर अवस्थाने मीयू क्वाने टूनूस्य। 21 परमेश्वरदे कोब नमयू त्वो-त्वोम ख्य यलो सूर्त चे अम्पर्ती तर बन्धन्दे छूर्तेब मौका प्रेल्लो छूर्तीदे टूङ्। 22 चेनेयलो प्रभुदे कोब सू त्वो ख्य जेम्से प्रभुने स्वतन्त्र मी क्यूक्क ख्यङ्। होरप्रने प्रभुदे क्वब बीलने सू मी बन्धन्ने त्व ख्य, हम्ब ख्रीष्टजे त्वो क्यूर ख्यङ्। 23 परमेश्वरदे नमयूने लू फादेबे कीने ख्यङ्। मीयूजे त्वो अन्क्यूर्लाची। 24 येरेक्यूत्देबे अत अची च्योनयू, कर अवस्थाने परमेश्वरदे सू-सूने क्व ख्य, थमयू क्वाने हम्ब अवस्थाने परमेश्वरप्रे क्यून्नूस्य। 25 जेम्से कन्यायूजे बारेने प्रभुजे आज्ञा ङैप्रे चैत्याये त्वो। तर प्रभुजे कृपादे भर्पर्देब मी क्यूत्देबे नमयूने रङ्से मोतो पीन्क्य। 26 दीन्नजे दु:ख-सकस्ने येरे लेप्प सू मी कर अवस्थाने ख्य हम्ब अवस्थानेने टूनूलो सोरो ज्य क्यूक्क्य यब ङैदे थेको। 27 नदे ङ्येन् चीक्क औ? होरेयलो रङ्से मदीप्रे लम् प्र अम्मल्लाची। नैजे ङ्येन् अन्क्यूक्क औ? होरेयलो ङ्येन् चे अम्मल्लाची। 28 तर नदे ङ्येन् चीक्कलीने हम्ब पाप दी। ङ्येन् अन्क्यूक्कब मदीदे ङ्येन् चील्लो ङूदे पाप चेब अन्क्यूर्। अम्ब ज्यने ख्यङ्, तर ङ्येन् चेबयूदे अम्ब जीयाने कूम सकस् भोक्ते पर्तीय, होर्दे ङैदे नमयूने येर सकस्दे जूक्तेमेब सेम् चीन्न ख्यङ्। 29 अत अची च्योन्यु, ङैदे यमेब पो अम्ब ख्यङ्, बील क्यूट्ट ख्यङ्, जेम्सेमेस्ये कीम्म ख्यबयू कीम्म त्वयूप्र क्यूत्देबे टूङ्स्य। 30 शोक् चेबयू, शोक् अन्चेबयूप्र मेस्ये सोरो सूगबयू, अन्सूगबयूप्र क्यूत्देबे टूङ्स्य। कीन-सोङ चेबयू रङ्सेप्रे चेये त्वप्र क्यूत्देबे टूङ्स्य। 31 मेस्ये थमयू सूदे संसारजे सोरो कूम थोकयू चील्लीय हम्ब सेयूने रङ्सेने चैये सेम् त्वप्र चीस्य, चेनेयलो अम्ब संसार कूमसेमे टूनूस्ये त्वो। 32 ङैजे सेम् ब नमयू क्वाने सूर्त अन्चील्लाबे टूङ्स्य यब ख्यङ्। ङ्येन् अन्चेब मीदे केर्बे प्रभुने सूग्लाबे चे यदेबे प्रभुजे कामने नीम् ध्यान् पीन्क्य। 33 तर ङ्येन्क्यूरेब मीदे केर्बे रङ्से मदिने सूग्लाबे चे यदेबे संसारने ख्यब थोकयूने सेम् पीन्क्य। 34 यर मीजे सेम् पट्टी ङ्ही तेलेने क्यूक्क्य। ङ्येन् अन्क्यूरेब मदी या कन्या चम्चदे ङ्व प्रे आत्माने केर्बे पवित्र क्यूर पर्दे यदेबे प्रभुजे पोने नेम्-ध्यान् चीक्क्य। तर ङ्येन्क्यूरेब मदीदे रङ्से पतीने केर्बे सूग्लाबे ये यदेबे संसारने ख्यब सेयूजे सूर्त चीक्क्य। 35 अम्ब पो नमयूदे अन्चील्लाची यमेब दी, तर नमयूने ज्य क्यूस्स्य यदेबे क्यम्न ख्यङ्, येरेक्यूत्देबे नमयू सेम्त्या क्यूत्देबे प्रभुतेले पूरा सेम् पीन्देबे ठीक प्रकारजे जीया च खूस्य। 36 कादेये कोइ मीदे रङ्सेप्रे स्येगब कन्या मदीप्रे चेपर्तेब ठीक व्यवहार अन्चीक्क ख्यङ् मन्लो, हम्ब कन्या मैचजे ङ्येन् क्यूरब लो थेप् क्यूरे ख्यङ्, मेस्ये ङूदे ङ्येन् चेब सेम् चील्लो ङ्येन् चे खूइय। ङूने पाप अन्लादी। थमयूजे ङ्येन्क्यूरने पर्दीय। 37 तर कादेये कोइ मीदे ङ्येन् अन्ची यदेबे रङ्से सेम्ने पक्क चीक्क ख्यङ्, सूजे कर्कापनेये ङू अम्पर्ते ख्यङ्, तर रङ्से इच्छाने रङ्सेदेने कबूने येन खूइय, मेस्ये कन्याप्रे ङ्येन् अन्ची यदेबे पक्क चीक्कलीने यर मीदेये ज्यने चेब क्यूक्क्य। 38 येर्बे सूदे कन्याने ङ्येन् चीक्क्य, ङूदे ज्यने चीक्क्य, तर सूदे ङ्येन् अन्ची, ङूदे झन् ज्य चेब क्यूक्क्य। 39 प्ल्यङ् सोम्बो ख्यङ्दासेमे प्ल्यङ्जे नङ्ने मज टूङ्क्य, तर प्ल्यङ् सीब ङ्येदे ङूदे सेम् पर्तेब मीप्रे ङू ङ्येन्चेने स्वतन्त्र क्यूक्क्य, तर ङूब प्रभुने विश्वास चेब मी क्यूर पर्दीय। 40 तर ङैजे विचारने ङू ङ्येन् अन्चील्लाबे होरेने टूङ्लो झन् आनन्द क्यूक्क्य, होर्दे ङैप्रेये परमेश्वरजे आत्मा ख्यङ् यदेबे ङ ह्वे चीक्क्य। |
Ghale New Testament © Nepal Bible Society, 2011.
Nepal Bible Society