१ कोरिन्थी 3 - घले नयाँ करारमण्डलीने अन्थून क्यूरब 1 येरेक्यूतदेबे अत-अची च्योन्यू, नमयूप्रे क्यम्ब परमेश्वरजे आत्मा ख्यबयूप्रे क्यम-प्र ङ क्यम अङ्खू, तर संसारजे मीयूप्र नमयूप्रे क्यम्दे। ख्रीष्टने ज्यू थूङब पीचप्र ङ नमयूप्रे क्यम खूदे। 2 ङैदे नमयूने ङ्यलम् तूप्दे, खदीलो चसे अन्तूप् चेनेयलो खदीलो चसे नमयूदे मालङ-खूम्ये च-अङ्खू मेस्ये दीनीसेमेने च-अङ्ख्व ख्यङ्। 3 नमयू अझ ङ्वजे स्वभाव अनुसार जीया चेन ख्यङ्। चेनेयलो कन्छ्वाब नमयूजे अन्द्रने म्यातप् मेस्ये च्य-चीङ् क्यून्न ख्यङ् हन्छ्वाब नमयू ङ्वजे स्वभाव अनुसार चील्लेब न-मीन् त्व मीप्र अन्क्यूरया? 4 चेनेयलो त्यादे “ङ पावलजे” मेस्ये सूजोदे “ङ अपोल्लोसजे” यीय यलो, संसारजे स्वभाव अनुसार चील्लेब मी प्र अन्क्यूरया? 5 अपोल्लोस सू ख्यङ्? पावल सू ख्यङ्? येशू ख्रीष्ट फ्याने विश्वास चीस्से पीनने नमयूजे लागि ङी ङ्ही परमेश्वरजे काम फरब मीयूत्यामे ख्यङ्। प्रभुदे खेर्दीयेब काम ङी फर्क्य। 6 ङैदे पोङ् सूग्दे, अपोल्लोसदे क्यू पूत्दे, तर हम्बने ठोङ्से पीनब काम परमेश्वरदेने चीत्दे। 7 येरेक्यूत्देबे लू सूगब मेस्ये क्यू प्वेब चैत्याये दी, तर हम्बने ठोङ्लाबे चीम्मेब परमेश्वरत्यामे केन् ख्यङ्। 8 लू सूगब मेस्ये क्यू प्वेब त्याप्रने ख्यङ्। खोत्तादेने रङ्से रङ्से कामने चेब छेम्प्रे अनुसार रङ्सेजे मेला प्रेक्क्य। 9 चेनेयलो ङीन परमेश्वरजे काम प्रे-प्रे फरब मीयू ख्यङ्, नमयूब परमेश्वरजे रङ् ख्यङ्, मेस्ये परमेश्वरजे कीम् ख्यङ्। 10 ङैने पीनेब परमेश्वरजे अनुग्रह अनुसार, सोरो ज्य कीम् थ्या स्येब मीदेप्र ङैदे जा पूत्दे, मेस्ये सूजोदे हम्ब फ्याने कीम् थ्याकीय। हम्ब फ्याने थ्याकेब मी क्वादेने केर्बे थ्यानख्यङ् यदेबे हम्बदे चेलाबे ध्यान् पीन्स्य। 11 चेनेयलो परमेश्वरदे कम्ब जा पूत्ते ख्यङ् हम्ब येशू ख्रीष्ट ख्यङ्, हम्बयली सूजो जा कम्ब मीदेये प्वे अङ्खू। 12 कादेये कोइ मीदे अम्ब जा फ्याने मर-चाँदी, कूम लू पर्देब पत्थरयू पूत्देबे थ्याकीय, कोइमीदेब स्यङ्, साल्म्या या परल पूत्देबे कीम् थ्याकीय यलो, 13 मी क्वाजेने ज्यप्रे अन्ज्य काम परमेश्वरदे न्याय चेब दिनने जाँचदीय, चेनेयलो हम्ब दिनने थमयूदे चेब काम कर टूङ् यदेबे जाँचतेजे लागि मी-भोप्प्रोने पूत्देबे लेक्क्य। 14 येर्बे जाँचतीब कादेये हम्ब जा फ्याने बन्दीयेब कोइ मीजे काम टूनूदे यलो ङूदे इनाम प्रेक्क्य। 15 कादेये कोइमीजे काम मी प्ल्याङ्देबे नाश क्यूप्पदेयलो ङूदे नोक्सान भोक्ते पर्तीय, तर मी-भोप्प्रोदे प्ल्यीन्टप्र ङू रङ्सेब बच्दीय। 16 नमयू परमेश्वरजे मन्दिर ख्यङ्, होरदे परमेश्वरजे आत्मा नमयू नङ्ने टूङ्क्य यब पो नमयूने था त्वा? 17 कोइमीदे परमेश्वरजे मन्दिरने नाश चीक्क्य यलो परमेश्वरदे हम्बने नाश चीक्क्य। चेनेयलो परमेश्वरजे मन्दिर पवित्र ख्यङ्, मेस्ये नमयू हम्ब मन्दिर ख्यङ्। 18 सूमीदेये रङ्सेने धोक अम्पीन्स्य। कादेये अम्ब जूग्ने नमयू रङ्सेने बुद्धि ख्यब मी मेन्क्य यलो हम्ब मी मूर्ख क्यूप्पस्य, होरेक्यूल्लो ङू तम्दम्ने बुद्धि ख्यब क्यूर खूइय। 19 चेनेयलो संसारजे बुद्धि परमेश्वरजे खूम्ने मूर्ख ख्यङ्। चेनेयलो धर्मशास्त्रने येरे लिख्दीये ख्यङ्, “परमेश्वरदे बुद्धि ख्यबयूने थमयूदे चेब छट्टू कामने ङ्येप्क्य।” 20 मेस्ये फेरि, “बुद्धि ख्यबयूजे विचार काम अन्लादी यदेबे परमप्रभुदे स्येख्यङ्।” 21 येरेक्यूत्देबे सूदेये मीयू फ्याने केन् अन्त्वोल्लाचीस्य। चेनेयलो परमेश्वरदे नमयूजे लागि साप्ता थोक पीन्क ख्यङ्। 22 पावल, अपोल्लोस, केफास सूने क्यूल्ली, या संसार, जीया, सीब, दीनीजे बील, या ङ्येदेरब बील साप्ताने परमेश्वरदे नमयूजे लागि पीने ख्यङ्, 23 मेस्ये नमयूब ख्रीष्टजे ख्यङ्, होर्दे ख्रीष्टब परमेश्वरजे ख्यङ्। |
Ghale New Testament © Nepal Bible Society, 2011.
Nepal Bible Society