१ कोरिन्थी 16 - घले नयाँ करारपरमेश्वरजे पवित्र मीयूजे लागि भेटी 1 जेम्से यरूशलेमने ख्यब परमेश्वरजे पवित्र मीयूजे लागि ङैदे गलातियाने ख्यब मण्डलीजे मीयूने भेटी फूङ् प्वी येयेप्रने नमयूदेये ची: 2 सतजे पीछीने पात्ता खूम्जे दिनने नमयू खोत्तादेने रङ्से रङ्सेदे केमेदे अनुसार नोर् छीत्या छूर्दीदेबे फूङ् पून्नू, चेनेयलो ङ होने रब भेटी लङ्न अम्पर्तीस्य। 3 होर्दे ङ फ्योर ङ्येदे नमयूदे सेलब मीयूने सिफारीस चिट्ठी पीन्देबे नमयूदे लङब भेटी हम्ब मीयूजे लादे यरूसलेमने सबने कूल्पीय। 4 कादेये ङैये प्र पर्ते क्यूल्लो, थमयू ङैप्रे प्रीय। पावलजे बिन्ती 5 ङ माकेडोनियादे ल्वार ङ्येदे, नमयू त्वने रीय, चेनेयलो ङ माकेडोनिया क्यूत्देबे योङ्बीन ख्यङ्। 6 मेस्ये ङ नमयूप्रे ते-दिन टूङ्क्य, या क्यूत्देयलो सर्कतूम्ने टूङ्क्य। होर्दे ङ्येदे ङ केनेने प्रलीने नमयूदे ङैजे लम्जे लागि तोङ्मे खूइय। 7 प्रभुजे इच्छा क्यूत्देयलो, अम्ब पलोने ङ नमयूप्रे खात्यात्या अन्तूलाबे, ते-दम्त्या नमयूप्रे टूङस्ये यदेबे आशा चीन्न ख्यङ्। 8 तर पेन्तिकोसजे दीन्बरसेमे ङ एफिसस नेने टूङक्य। 9 चेनेयलो प्रभुजे केन् कामत्या चेने ङैजे लागि सोरो ज्य मौका प्रे ख्यङ्, होर्दे येने विरोध चेबयूये कूम ख्यङ्। 10 कादेये नमयू ट्याने तिमोथी रदेयलो ङूने नमयूदे गेसेन् चीत्देबे टूङ्स्ये पीन्। चेनेयलो तिमोथीदये ङैदे चीन्नप्रने प्रभुजे काम चीन्न ख्यङ्। 11 येरेक्यूत्देबे सूदेये ङूने ह्यल अन्चीस्स्य। तर ङूजे रङ्से लम्ने चेलाबे कूल्बी, मेस्ये ङू ङै ट्याने रस्य। चेनेयलो ङू सूजो च्योन्यूप्रे रीय यदेबे ङ आशा चीन्न ख्यङ्। 12 जेम्से च्योन् अपोल्लोसजे बारेने ङ अम्ब यीय: ङैदे ङूने सूजो अत-च्योन्यू प्रे स्योल्देबे नमयूने तूब यदेबे कूम कर्चङ ख्य, तर चूजो ङूदे छीत्यात्याये रब सेम् अन्ची। तर मौका प्रेबीतीक्ने ङू रीय। 13 होस्स्यार क्यूत्देबे टूङ्, विश्वासने बोल्यो क्यून्नू। सेम् केन् ची मेस्ये बोल्यो क्यूरो। 14 नदे चै काम फर्क्य हम्ब प्रेम तन्देबे फर्। 15 अत-अची च्योन्यू, अखैयाजे विश्वास चेबयू नङ्ने पात्ता खूम् विश्वास चेब स्तिफनासजे म्हीती ख्यङ् यदेबे नमयूदे स्ये ख्यङ्। थमयूदे परमेश्वरजे पवित्र मीयूजे सेवा चेने रङ्सेजे जीया पीन्दे। 16 येर मीयू मेस्ये येरप्र कामने छेम्प्रे चेब मीयू क्वाजे नङ्ने टूङ्, यदेबे ङ नमयूने बिन्ती चीक्क्य। 17 स्तिफनास, फोर्टुनाटस मेस्ये अखाइकस रब ङ सोरो सूग्दे, चेनेयलो नमयू ङैप्रे अन्क्यूल्लीने थमयूदे ङैने नमयू ख्यप्रने चीम्मीदे। 18 चेनेयलो ङैजे मेस्ये नमयूजे आत्मानेये थमयूदे सूग्लाबे चीम्मीदे। येर मीयूने गेसेन् ची। पात्ता ङ्येजे नमस्कार 19 एशियाने ख्यब मण्डलीजे मीयूदे नमयूने नमस्कार येबे ख्यङ्। नमयूने अकिलासप्रे प्रिस्कादे मेस्ये थमयूजे कीम्ने ख्यब मण्डलीजे मीयूदेये प्रभुजे मीन्ने कूम नमस्कार येबे ख्यङ्। 20 नमयूने अत-अची च्योन्यू क्वादेने नमस्कार येबे ख्यङ्। त्यादे त्याने तूब ख्रीष्टजे प्रेमदे नमस्कार ची। 21 ङ पावल, रङ्सेजे लादेने अम्ब नमस्कार यदेबे लिख्दीन ख्यङ्। 22 कोइदे प्रभुने प्रेम अन्चील्लो हम्ब मीने श्राप टस्य। ओ ङीन्जे प्रभु, ख! 23 प्रभु येशू ख्रीष्टजे अनुग्रह नमयूप्रे क्यूस्स्य। 24 ख्रीष्ट येशूने ङैजे माया नमयू क्वाप्रेने क्यूस्स्य। आमेन। |
Ghale New Testament © Nepal Bible Society, 2011.
Nepal Bible Society