१ कोरिन्थी 13 - घले नयाँ करारप्रेम 1 कादेये मीयूदे क्यमब मेस्ये स्वर्गदूतदे क्यमब केने ङ क्यम्लीने, ङैजे सेम्ने प्रेम त्वोदे यली, ङैदे क्यमब पो सीत्तीने तेरब छील्लीङ् मेस्ये झ्याइ झ्याइ चेब छ्योलोम्प्रत्या क्यूक्क्य। 2 ङैप्रे अगमवाणी क्यम ख्वब शक्ति ख्यङ्स्ये, मेस्ये क्व अङ्ख्वब नङ्सू पोयू, साप्ता थर्जे ज्ञानयूये क्व खूस्ये, होर्दे केन् गङ्यूने हर्दे ख्वबसेमेजे पूरा विश्वास ङैप्रे ख्यङ्लीने, ङैजे सेम्ने प्रेम त्वोदेयलो ङ चैत्याये दी। 3 कादेये ङैजे सम्पत्ति क्वाने दूख्प्रेयूने कोम्मीदे, मेस्ये मी भोप्प्रोने होम्बैने ङैजे ङ्व पीन्दे यलीने, ङैने प्रेम त्वोदेयलो ङैने चैये फाइदा अङ्क्यूर्। 4 प्रेम चेब मीदे सैदीय मेस्ये ङ्येम्क्य, प्रेम चेब मीदे ठेनब व्यवहार अन्तन्, होर्दे केन् अन्-त्वे। 5 प्रेम चेब मीदे अन्ज्य व्यवहार अन्तन् रङ्सेजे फाइदात्या अन्ले, रङ्से पोनेत्या अन्ट्या, झेचेर् अम्मन्दी, अन्ज्य पोयूजे हिसाब चीस्से त्वो। 6 अन्ज्य पो चीन्न तङ्ब प्रेम चेब मी सूग्स्ये त्वो, तर ज्य पोने सूग्क्य। 7 प्रेम चेब मीदे साप्ताने सैदीय, साप्ता पोने पत्तीय, साप्ता पोने ज्य क्यूरब आशा चीक्क्य, होर्दे साप्ता पोने धेरेन् टूङ्क्य। 8 अगमवाणीयू मल्बीय, सूजो-केयू अन्क्यम क्यूप्पीय, ज्ञानजे पोयू क्वाने मल्बीय, तर प्रेम कलङ्बेये मल्बस्ये त्वो। 9 ङीनदे तेतेत्या स्ये ख्यङ्, ङीन्जे अगमवाणी पूरा त्व ख्यङ्। 10 तर कन्छ्वाब सिद्धता फ्योरीय, हन्छ्वाब पूरा त्वब क्वाने मल्बीय। 11 कन्छ्वाब ङ पीच ख्य हन्छ्वाब पीचप्र क्यम ख्य, पीचजेप्र सेम् ख्य, पीचदेप्र ल्वे ख्य, तर कन्छ्वाब ङ स्योर्ब क्यूत्दे हन्छ्वाब पीचजे बनी क्यापीदे। 12 ङीङ् ऐनने ज्य अन्तङप्र चूजो ङीन तङ्क्य, तर हम्ब बीलनेब सोरो ज्य छाङ्लाङ्गे तङ्क्य। ङैदे चूजो तेतेत्यामे क्व-ख्यङ्, हम्ब बीलने पोयू क्वाने पूरा क्व खूइय। परमेश्वरदे ङैने चेलाबे स्येप्रने हम्ब बीलने ङैदेये पो क्वाने चेलाबे स्येखूइय। 13 होर्दे अम्ब पो सोम्-विश्वास, आशा मेस्ये प्रेम, येतार्ने टूनीय। तर अम्ब नङ्ने पाता केन्ब प्रेम ख्यङ्। |
Ghale New Testament © Nepal Bible Society, 2011.
Nepal Bible Society