မာကု 1 - The New Testament in Shwe Palaung

တရာပ်ုန်ဟောဂြည် ဗတ္တိဇံဆရာယောဟန်

¹ ယာမ်စ ဆဒါင်ကျ ကွံန်ဖြာ အကျံင်ယေဆုခရိ မိူဝ်ႈခိူည်အီုဝ်။

² ပ်ုန်တဲမ်အူန် တန်ုဘေဲႇကျံမ် ပရောဖက်ဟေရှာယမိူဝ်ႈ၊ “ဖြာဒါႈ၊ ‘ငိူပ်မေန်၊ အောဒီပ္လေါည်လေႈ ဖဇ်ုတပ္လေင်အော ရအာတ်မီ၊ အတွ ရဲန်ပိူဝ်ႈဒဲႈ ရဒေင်လာ်ႈ ကီုရ်ညာဖြာ။’

³ တန်ုကန္တာရ ဘီအူကူပြိုႈဒါႈ၊ ‘ရဲန်ဘြဲရဒေင် အတွစွလေႈ ကီုရ်ညာဖြာ၊ ရ်ုရ်ဒဲႈ ရဒေင်လာ်ႈအ်ုန် ဆီုဝ်ဆီုဝ်အေ့။’ ”

⁴ ကောပ်ခိူည်ဒီန် ယောဟန် ပေါရောတ်ဒေ ဟောဂြည်တရာ တန်ုကန္တာရ ဒဲႈပွံတ် မံင်ဂလာဗတ္တိဇံ။ အ်ုန်ဒါႈ တဘီဂဲ၊ “ဒဲႈပဲလှောႇဖိူမ် ဒိုရ်အပေတ်ဒေ ခါမ်ပွံတ် မံင်ဂလာဗတ္တိဇံ၊ က်ုန်ညာခိူည်ဒီန် ဖြာ ဒီပ္လိုတ်ခွါင်ဒဲႈ အပေတ်ပဲ။”

⁵ အခိင်ဒီန် ဘီကုင်ဘီရူ တကုင်ယေရုရှလင်၊ ဘီကပီုန်ကုင်ယုဒ ဘာ့်ဘာ့်ဘိူဝ်ဘိူဝ်ဂဲဒီန် လေႈလာ်ႈဇူ တယောဟန်။ ဂဲလာည်ဂြည်ပျဒိုည်ႇ အပေတ် ပ်ုန်က်ုရ်လူတ်ဒေ တအ်ုန် ဂဲခါမ်ဒိုည်ႇပွံတ် မံင်ဂလာဗတ္တိဇံ န်ုအိုမ်ယော်ဒန်။

⁶ ယောဟန် ချူပ်ဒေဒါ ဂြူရ်ုရ် တဟုကလာအု၊ တုပွံတ်ႎံရ်ဆဲႇဆရေ တညွည်ဒေ၊ အ်ုန်ဟောမ် ႎါႇဆျှံတ်ငှေါဂါရ် ငါမ်ဖျံရ်ဘြီ။

⁷ အ်ုန်ပြိုႈဂြည် တဘီဂဲ၊ “အီအ်ုန်မျြံတ်ဒါင် ဒိုရ်အော ဒီစွလေႈရဘံန်အောယာ့်။ ကူပ်အောကာႈဒဲႈ ႎံရ်ချှူပ်စာပ်အ်ုန်လိုည် အောကာထိူဝ်ႇ။

⁸ အောအီုဝ် ဒဲႈတပဲ မံင်ဂလာဗတ္တိဇံ ဇ်ုတ်တအိုမ်၊ ကောည်လိုည် အ်ုန်ဒီဒါႎိငျံန်ဆပဲ ဒဲႈမံင်ဂလာဗတ္တိဇံ တပဲ။”

ယေဆု ခါမ်မံင်ဂလာဗတ္တိဇံဂါရ် ဘ်ုပ်ခါမ်ကဝ်ဆျှူ

⁹ အခိင်ဒီန် ယေဆု ယိူဝ်ႇဒိုရ် ကုင်နာဇရက် တကပီုန်ဂါလိလဲ၊ စွလေႈဇူ ခါမ်ပွံတ် မံင်ဂလာဗတ္တိဇံ တယောဟန် တအိုမ်ယော်ဒန်။

¹⁰ ယာမ်ယေဆု ယိူဝ်ႇဇံင် ဒိုရ်န်ုအိုမ်၊ အ်ုန်ယိူဝ်ဒေငိူပ် ပ္လေင်က်ုရ်ပိူဝ်ႈပွံတ်ဒေ၊ ႎိငျံန်ဖြာ ညာခိူည်ဆီမ်အပ္လိုည် လေႈစံပ် ဒါ့်တပါင်ယာႇဒေ။

¹¹ ဟွည်ႇဒီန် ဂံရ်ႈလေႈ ဒိုရ်န်ုပ္လေင်ဒီန် ဒါႈ၊ “မီ မိူဝ်ႈညှိုႈ ကွံန်ပ်ုန်ရံက်အောယာ့်၊ မီဇူႈညှိုႈ နွံရ်ႈဖိူမ်အော။”

¹² ဟွည်ႇဒီန် ႎိငျံန် တောႇလာ်ႈပွံတ် ယေဆု တန်ုကန္တာရ အူဒီန်တောအူဒီန်။

¹³ ယာမ်ဒီန် အ်ုန်ဂွည်ဒေ တန်ုကန္တာရ ဖိုန်ကိူရ်ဆငီ၊ ဘ်ုပ်က်ုရ်တူႈ စာတန် ကီုရ်နံမ်ချှိုဂဲ ကဝ်ဆျှူစုင်ဇာမ်ဒေ။ အ်ုန်ဂွည်ရူမ် ဇောမ်တိုဘြီချှိုဂဲ အရာပ်ဒီန်၊ တမန်ဇ်ုဂဲတပ္လေင်မိူဝ်ႈ လေႈပေါဒေ ဟျံင်လူမ်လာပွံတ်အ်ုန်။

ယေဆုတောႇ အီဘဲႇကာဖိုန်ကူ

¹⁴ ယောဟန် ဟွည်ႇ က်ုရ်တူႈ ဘ်ုပ်ဇာ်ႈထံင်၊ ယေဆု စွလာ်ႈပွံတ်ဒေ တကပီုန်ကုင် ဂါလိလဲ၊ ဟွည်ႇဒီန် အ်ုန်ဟောဂြည် ဆဒါင်ကျဖြာ၊

¹⁵ အ်ုန်ဒါႈ “အခိင်ဟွည်ႇပြေ့စုင်၊ ကပီုန်ကုင်ဖြာ ဟွည်ႇဒံတ်တဲယာ့်၊ ဒဲႈပဲလှောႇဖိူမ် ဒိုရ်အပေတ်ဒေ၊ ညှိုမ်ဆဒါင်ကျအီုဝ်အေ့။”

¹⁶ ယာမ်ယေဆု စွလာ်ႈရာင်ကောည်ဒေ တပြါအိုမ်ဆက္လုင် ဂါလိလဲ၊ အ်ုန်ယိူဝ်ဒေငိူပ် ရှိမုန် ဇီုဝ်ပေတရုဂါရ် အန္ဒြေ ႎါႎည် မိူဝ်ႈအီဘဲႇကာ၊ ဂါရ်ဒါ့်ပျာ်ႈ ရရ်ုပ်ကာဒေ တန်ုအိုမ်ဆက္လုင်။

¹⁷ ယေဆုဒါႈ တဂါရ်၊ “လာ်ႈ ဇောမ်ရဘံန်အော၊ ပါရ်အာရ်ကူဒီန် အောဒီဒဲႈပဲပဲန် အီဘဲႇတိုဘီ။”

¹⁸ ဂဲဒီန်မိူဝ်ႈ ပဲတ်ပွံတ်ရရ်ုပ်ကာဒေ အူဒီန်တောအူဒီန် လာ်ႈဇောမ်ပွံတ်အ်ုန်။

¹⁹ ဘံန်ဟွည်ႇ စွလာ်ႈဘိုန် အရာပ်ဒီန်တရီတ် အ်ုန်ယိူဝ်ဒေငိူပ် ကွံန်အီမဲဇေဗေဒဲ ယာကုပ်ဂါရ် ယောဟန် ႎါႎည်အာရ်ကူ၊ ဂဲ ဒါ့်က်ုန်ဘာန် ရရ်ုပ်ကာဒေ တပါင်ရိူဝ်။

²⁰ ဘံန်ယေဆု ယိူဝ်ဒေငိူပ် အ်ုန်တောႇပွံတ်ဂါရ် အူဒီန်တောအူဒီန်၊ ဂါရ်ဒီန် ပဲတ်ပဲတ် ကူန်ဒေ ဇေဗေဒဲ ဒါ့်ဂွည်ဒေဇောမ်ဘီစာင်ဂဲ တပါင်ရိူဝ် လာ်ႈဇောမ်ပွံတ် ရဘံန်အ်ုန်။

ကီုရ်နံမ်ချှို လီပ်စံပ်တအီအူကူ

²¹ ဟွည်ႇဒီန် ယေဆုဂါရ် တဘဲႇအ်ုန်ဂဲ လာ်ႈလီပ်ဒိုည်ႇ တန်ုကုင် ကပေရနောင်၊ ဘံန်ရောတ် ဆငီဆဒါင် ယေဆုလီပ်ပွံတ် တကျောင်ရဆောန်ဒဲႈတရာ အ်ုန်ဆာင်ဆောန်ပွံတ်ဂဲ။

²² ယာမ်ဒီန်ဖုင်ဘီဂဲ ယိူဝ်ဒေဆတီုင် ငဲပ်ုန်ဆာင်ဆောန်အ်ုန် ဂဲညာအာမ်ဒိုည်ႇပွံတ်ဒေ။ ပ်ုန်ဆာင်ဆောန်ဒဲႈအ်ုန် ကာနှေရ်စိ ခိူည်တာဆရာနံပ်ဘေဲႇကျံမ်ဂဲ၊ ညာခိူည် ဘီယိူဝ်အခွါင်အာဏာ ဆုင်မဆာင်ဆောန်ဒဲႈ တဘီဂဲ။

²³ ဟွည်ႇဒီန် တန်ုကျောင်ရဆောန်ဒဲႈတရာ ယိူဝ်ကီုရ်နံမ်ကာကျကာလ လီပ်စံပ် တအီအူကူ လာ်ႈရောတ် အ်ုန်ပြိုႈဒေဒါႈ၊

²⁴ “အိူဝ် ကွံန်ကုင်နာဇရက် ယေဆု၊ ဆေမီ က်ုရ်ဆဴင် တယဲ၊ မီလာ်ႈရောတ် တအရာပ်အီုဝ် မိူဝ်ႈအတွ ပ်ုန်လူယဲအဲႈ။ အဆေမီမိူဝ်ႈ ယဲနံပ်အေ့၊ မီမိူဝ်ႈ ဘီမျြံတ်ဆပဲဖြာ။”

²⁵ ယေဆု ဒါႈငဲဆုင်မပွံတ် တကီုရ်နံမ်ကာကျကာလဒီန်၊ “ဂွည်ညီမ်ညီမ်၊ လေႈပွံတ်မီ ဒိုရ်အ်ုန်။”

²⁶ အခိင်ဒီန် ကီုရ်နံမ်ကာကျကာလ ဟွည်ႇယူႈရဲင်ပ်ုန်ခေါပွံတ် အီကူဒီန်၊ ပြိုႈဂံရ်ႈရဲင်ရဲင် လေႈပွံတ်ဒေ ဒိုရ်တိုအ်ုန်။

²⁷ ဟွည်ႇဒီန် ဘီဂဲ ညာအာမ်ဒိုည်ႇပွံတ်ဒေ၊ ဂဲလာည်က်ုရ်မိုန်တဒေ အူကူတောအူကူ ဂဲဒါႈ၊ “ပ်ုန်ဆာင်ဆောန်အ်ုန် က်ုန်မဲအီုဝ် ဆေမိူဝ်ႈအဲႈ။ အီကူအီုဝ် ယိူဝ်အခွါင်အာဏာ ဘံန်အ်ုန်ဒဲႈအမိင် တကီုရ်နံမ်ကာကျကာလဂဲ ဂဲဇူဒိုည်ႇငဲပ်ုန်ဂြည်အ်ုန်။”

²⁸ ဘံန်ညာခိူည်ဒီန် အကျံင် ဆဒါင်ယေဆုမိူဝ်ႈ ပြံတ်ဖာည်ပွံတ်ဒေ တန်ုကပီုန်ဂါလိလဲ အရာပ်တွံန်တီတွံန်တီ။

ယေဆု ဒဲႈဘီဘာ့်ဘိူဝ်ဂဲ ချံမ်ဆာ

²⁹ ဟွည်ႇဒီန် ယေဆုလေႈရူမ်ဇောမ် တဘဲႇဒေ ယာကုပ်ဂါရ် ယောဟန် ဒိုရ်ကျောင်ရဆောန်ဒဲႈတရာ၊ လာ်ႈပွံတ်တဂါင် ရှိမုန်ဂါရ် အန္ဒြေ။

³⁰ ကန်ရှိမုန်ပီ စံပ်ဆူဖိူဝ်နာ ဒါ့်အီတ်နှေရ်ဒေ တရအီတ်၊ ဂဲဂြည်ပွံတ် အကျံင်အ်ုန် တယေဆု အူဒီန်တောအူဒီန်။

³¹ အ်ုန်လာ်ႈဇူပွံတ် အီပ်ုန်ဒီန်၊ ဘာတီပျိုႇယိူဝ်ႇပွံတ်အ်ုန်၊ ဒံင်အူကပြေ့ ဆူဖိူဝ်နာအ်ုန်ဒီန် ဟြာည်ပွံတ်ဒေ။ အ်ုန်ယိူဝ်ႇဘဲပွံတ်ဒေ ရ်ုရ်ခါမ်ခဲႇ ဟျံင်လူမ်လာပွံတ်ဂဲ။

³² အခိင်ဆငီလီပ် စူန်မှိူဝ်ဒီန် ဘီဂဲ ဒေါလာ်ႈဒေဒိူည် ဘ်ုရ်ယိူဝ်ဘီဆူနာဂဲဂါရ် ဘီကီုရ်နံမ်ချှို လီပ်စံပ်တဂဲ တရအာတ်ယေဆု။

³³ ဘီပည်ကုင်ဂဲဒီန် လာ်ႈရောတ်ဒေက်ုရ်စုဒိုည်ႇ တရအာတ်ဘာင်ဘိုႈဂါင်။

³⁴ အခိင်ဒီန် ဘီဘ်ုပ်ရောဂါ တွံန်မျိုတွံန်နဲ ယေဆု ဟွည်ႇဒဲႈဂဲချံမ်ဆာ၊ ရူပ်လေႈဒိုည်ႇပဲတ် ကီုရ်နံမ်ချှိုတဂဲ။ ကောပ်ကီုရ်နံမ်ချှိုဂဲဒီန် နံပ်အ်ုန်မိူဝ်ႈအဆေ၊ ငဲအူမိုတ်လိုည် အ်ုန်ကာဒဲႈစိ အခွါင်တဂဲဂြည်။

ယေဆုဟောဂြည်တရာ တန်ုကပီုန်ကုင်ဂါလိလဲ

³⁵ ဆငီဘံန် အခိင်ရႎါရ်ႈဇံဝ်ဇံဝ်၊ ယေဆု ယိူဝ်ႇလေႈဒိုရ်ဂါင် စွလာ်ႈဆုတောင် တအရာပ်ယေန်ညီမ်။

³⁶ အခိင်ဒီန် ရှိမုန်ဂါရ် ဘူဂေါဘူဆေဂဲ ဇောမ်ဒေလဲမ်ဒိုည်ႇအ်ုန်၊

³⁷ ဘံန်ဂဲယိူဝ်ဒေငိူပ်အ်ုန် ဂဲဒါႈ၊ “ဘီဂဲ လဲမ်ဒိုည်ႇမီ။”

³⁸ ကောည်လိုည် ယေဆုဒါႈတဂဲ၊ “အယ်လာ်ႈဒိုည်ႇ အတွဒဲႈအောဘိူန်အော ဟောဂြည်တရာ တရူက်ုရ်ဒံတ်အရာပ်အီုဝ်။ ကောပ်မိူဝ်ႈခိူည်ဒီန် အောတလာ်ႈပေါရောတ် ဟာအီုဝ်။”

³⁹ ဘံန်ညာခိူည်ဒီန် အ်ုန်လာ်ႈဒေင် တကပီုန်ကုင်ဂါလိလဲ အရာပ်တွံန်တီတွံန်ဒဲန်၊ အ်ုန်ဟောဂြည်တရာ တကျောင်ရဆောန်ဒဲႈတရာဂဲ ရူပ်လေႈဒိုည်ႇ ကီုရ်နံမ်ချှို။

ယေဆု ဒဲႈဘီအူကူချံမ်ဆာ

⁴⁰ ဘီဘ်ုပ်တူတ်အူကူဒီန် လာ်ႈရောတ်ဒေ မာ့်ပ်ုရ်ဒ်ုပ်ပွံတ် တရအာတ်ယေဆု၊ အ်ုန်မှာန်ဒါႈ၊ “မီက်ုန်ယိူဝ်နွံရ်ႈဖိူမ်၊ မီဘဲအေ့ဒေ ရ်ုရ်ဒဲႈအောဆပဲ။”

⁴¹ ယေဆု ယိူဝ်နွံရ်ႈဖိူမ်က်ုရ်ႎေအ်ုန်၊ ဆာတ်တီဒေ ထိပွံတ်တိုအီကူဒီန်။ အ်ုန်ႎီရ်ဒါႈ၊ “အောယိူဝ်အေ့ နွံရ်ႈဖိူမ်၊ ဒဲႈမီရောတ်တဆပဲ။”

⁴² ဒံင်အူကပြေ့ တူတ်ပ်ုန်ဘ်ုပ်အ်ုန်ဒီန် မိူဝ်ႈဟြာည် ဆပဲပွံတ်ဒေ။

⁴³ ဟွည်ႇဒီန် ယေဆု တံမ်ရံတ်ငဲတအ်ုန် ဒဲႈအ်ုန်ႎေင်ပွံတ်ဒေ အူဒီန်တောအူဒီန်၊

⁴⁴ ဘံန်ဟွည်ႇဒါႈတအ်ုန်၊ “ဆတီုင်ဘိူဝ်၊ မီမာည်ဂြည်တအဆေ အကျံင်အီုဝ်၊ လာ်ႈပွံတ်မီ တတာယဇ်ပုရောဟိတ် ဒဲႈဂဲစဲတ်မီ၊ က်ုန်ဟွည်ႇ ပျတိုဒေတဂဲ၊ ခိူည်မီရောတ်တဆပဲအီုဝ် ဒဲႈမီပဲန်ဆာ့်ဆေ တရအာတ်ဘီဂဲ၊ လှူအာပ်ကာပ်ဒဲႈပ်ုန်လှူ ခိူည်ပ်ုန်ပိင်ငျှံပ်အူန် မောရှေ တပဲအေ့။”

⁴⁵ ကောည်လိုည် အီကူဒီန် လေႈပွံတ်ဒေ လာ်ႈဂြည်ဆဒါင်ဒီန် တအရာပ်တွံန်တီ၊ ဘံန်အ်ုန်ဂြည်ဆဒါင်ဒီန်ဘ္လံမ် ယေဆုကာဂိူပ်ယာႇလီပ်ဂွည် တက်ုန်ဒီဘီ လိူရ်ႈလိူရ်ႈ။ ဆဲႈဒီန်၊ အ်ုန်ဂွည်ဂိူဝ်ဒေ တဘြီရိူဝ်ႇကုင် အရာပ်ယေန်ညီမ်၊ အခိင်ဒီန် ဘီအရာပ်တွံန်တီ လာ်ႈရောတ်ပေါဒိုည်ႇတအ်ုန်။