Mattheu 28 - Baasraak Sotho NT

Mattheu 28

¹ Eitse ha Sabatha e fela, ha bo esa, ka letsatsi le qalang veke, Maria Magdalena le Maria e mong ba tla ho bona lebitla.

² Mme bonang, ha eba le tshisinyeho e kgolo ya lefatshe, hobane lengeloi la Jehova le theohile lehodimong, la tla, la phikolosa lejwe la monyako, la dula hodima lona.

³ Sefahleho sa hae se ne se le jwaloka lehadima, le diaparo tsa hae di le tshweu jwaloka lehlwa.

⁴ Ka baka la ho o tshaba, balebedi ba thothomela, ba eba jwaloka bafu.

⁵ Lengeloi la araba, la re ho basadi bao: Le se ke la tshaba, hobane ke a tseba hore le batla Jesu ya neng a thakgisitswe.

⁶ Ha a yo mona, hobane o tsohile, jwalokaha a ne a boletse. Tloong, le bone nqalo eo Jehova a neng a robetse ho yona.

⁷ Eyang kapele, le bolelle barutuwa ba hae hore o tsohile bafung; mme bonang, o le etella pele ho ya Galelea; le tla mmona teng: bonang, ke le boleletse.

⁸ Ba tloha kapele lebitleng ka tshabo le ka thabo e kgolo; mme a matha ho ya bolella barutuwa ba hae.

⁹ Yare ba sa ya bolella barutuwa ba hae, bonang, Jesu a ba kgahlanyetsa, a re: Dumelang! Ba tla, ba mo tshwara ka maoto, ba mo kgumamela.

¹⁰ Jesu a re ho bona: Se tshoheng; eyang le bolelle banabeso hore ba ye Galelea, mme ba tla mpona teng.

¹¹ Yare ba sa tsamaya, bonang, ba bang ba balebedi ba tla motseng, ba tsebisa baprista ba baholo tsohle tse etsahetseng.

¹² Eitse hobane ba phuthehe le baholo, ba rerisane, ba nea bahlabani tjhelete tse ngata.

¹³ ba re: Le re: Barutuwa ba hae ba tlile bosiu, ba mo utswa re sa robetse.

¹⁴ Mme haeba hoo ho ka utlwahala ho mmusisi, rona re tla mo qekisa, mme re le sireletse.

¹⁵ Yaba ba nka ditjhelete, ba etsa kamoo ba rutilweng kateng, mme polelo eo ya bolelwa hara Bajuda, ho fihlela kajeno.

¹⁶ Jwale barutuwa ba leshome le motso o mong ba ya Galilea, thabeng eo Jesu a ba laetseng yona.

¹⁷ Yare ha ba mmona, ba mo kgumamela; empa ba bang ba belaela.

¹⁸ Jesu a atamela, a bua le bona, a re: Ke neilwe matla wohle lehodimong le lefatsheng.

¹⁹ Eyang ke hona, le rute ditjhaba tsohle, le ba kolobetse ka lebitso la Ntate, le la Mora, le la Moya o Halalelang;

²⁰ le ba rute ho boloka tsohle tseo ke le laetseng tsona; mme bonang, ke na le lona kamehla yohle, ho isa bofelong ba lefatshe. Amen.