Mattheu 24 - Baasraak Sotho NT

Mattheu 24

¹ Yaba Jesu o a tswa, a tloha tempeleng, mme barutuwa ba hae ba tla ho yena ho mmontsha mehaho ya tempele.

² Jesu a re ho bona: Na ha le bone tseo tsohle? Kannete ke re ho lona: Ha ho ka ke ha leswa lejwe hodima lejwe le leng, le ke keng la heletswa.

³ Eitse ha a dutse thabeng ya Mehlwaare, barutuwa ba hae ba tla ho yena boinotshing, ba re: Re bolelle, tseo di tla etsahala neng? mme pontsho e tla ba efe ya ho tla ha hao, le ya ho fela ha lefatshe?

⁴ Jesu a araba, a re ho bona: Iponeleng, le se ke la thetswa ke motho.

⁵ Hobane ba bangata ba tla tla ka lebitso la ka, ba re: Ke nna Kreste; mme ba tla kgelosa ba bangata.

⁶ Le tla utlwa dintwa le menyenyetsi ya dintwa, le hlokomele hore le se tshohe;

⁷ Hobane setjhaba se tla tsohela setjhaba matla, mmuso o tsohele mmuso matla, mme ho tla ba le ditlala, le mafu a sewa, le ditshisinyeho tsa lefatshe nqalong tse ngata.

⁸ Tsena tsohle ke qalo ya bohloko.

⁹ Mohlang oo ba tla nehelana ka lona mahlomoleng, ba le bolaye, mme le tla hlouwa ke ditjhaba tsohle ka baka la lebitso la ka.

¹⁰ Ke moo ba bangata ba tla kgoptjwa, mme ba tla ekana, ba hloyana.

¹¹ Ho tla hlaha baporofeta ba bohata ba bangata, mme ba tla kgelosa ba bangata.

¹² Mme ka baka la ho ata ha bokgopo, lerato la ba bangata le tla tapa.

¹³ Empa ya tiisetsang ho isa bofelong, ke yena ya tla bolokeha.

¹⁴ Mme Evangeli ena ya mmuso e tla bolelwa lefatsheng lohle, e be bopaki ho ditjhaba tsohle; mme e tla ba hona bofelo bo hlahang.

¹⁵ Etlare ha le bona manyala a bofediso, a boletsweng ke moporofeta Daniele, a eme nqalong e halalelang, ya balang a ke a utlwisise.

¹⁶ Mohlang oo, ba leng Judea ba balehele dithabeng.

¹⁷ Ea leng holim’a ntlo a se ke a theoha ho ntša letho ka tlung ea hae.

¹⁸ Le ea tšimong a se ke a khutla ho ea nka liaparo tsa hae.

¹⁹ Ho madimabe baimana le ba anyesang mehleng eo!

²⁰ Empa le rapele hore paleho ya lona e se ke ya eba mariha, leha e le ka letsatsi la Sabatha.

²¹ Hobane mohlang oo, ho tla ba le matshwenyeho a maholo, a esong ho be teng ho tloha tshimolohong ya lefatshe ho fihlela jwale, tjhe, mme ha a sa tla hlola a eba teng hape.

²² Hoja matsatsi ao a se ke a kgutsufatswa, ho ka be ho se motho ya tla pholoha, empa ka baka la bakgethwa matsatsi ao a tla kgutsufatswa.

²³ Mohlang oo, ha motho a ka re ho lona: Bonang, Kreste o mona, kapa Kreste o mane; se lumeleng.

²⁴ Hobane ho tla hlaha bo-Kreste ba bohata, le baporofeta ba bohata, mme ba tla etsa mehlolo e meholo le meeka; hoo, hola ke ntho e ka etswang, ba ka thetsang le bona bakgethwa.

²⁵ Bonang, ke le boleletse pele.

²⁶ Ka baka leo, ha ba ka re ho lona: Bonang, o nahathothe; le se ke la tloha: bonang, o phaposing e patilweng; se lumeleng.

²⁷ Hobane jwaloka lehadima le tswang botjhabela, mme le benyetsa bophirimela; ho tla ha Mora motho ho tla ba jwalo.

²⁸ Hohle moo setopo se leng teng, ke moo manong a tla bokana teng.

²⁹ Hanghang kamora matshwenyeho a matsatsi ao letsatsi le tla fifala, mme kgwedi e ke ke ya fana ka lesedi la yona, dinaledi di tla wa lehodimong, le matla a mahodimo a tla sisinyeha.

³⁰ Ke moo pontsho ya Mora motho e tla hlaha lehodimong, mme meloko yohle ya lefatshe e tla lla, mme e tla bona Mora motho a etla ka maru a lehodimo ka matla le kganya e kgolo.

³¹ O tla roma mangeloi a hae ka modumo o moholo wa terompeta, mme a tla bokella bakgethwa ba hae meyeng e mene, ho tloha pheletsong e nngwe ya lehodimo ho isa pheletsong e nngwe.

³² Jwale ithuteng setshwantsho ka sefate sa feiye; Ha lekala la wona le se le le lenana, mme le hlahisa mahlaku, le a tseba hore lehlabula le haufi.

³³ Ka mokgwa o jwalo, etlare ha le bona ntho tseo tsohle, le tsebe hore o haufi, o monyako.

³⁴ Kannete ke re ho lona: Moloko ona o ke ke wa feta, tseo tsohle di eso ho etsahale.

³⁵ Lehodimo le lefatshe di tla feta, empa mantswe a ka a ke ke a feta.

³⁶ Empa malebana le letsatsi leo le hora eo ha ho ya tsebang, leha e le mangeloi a lehodimong, haese Ntate feela.

³⁷ Empa jwalokaha ho bile mehleng ya Noe, ho tleng ha Mora motho ho tla ba jwalo.

³⁸ Hobane jwaloka mehleng ya pele ho morwallo, ba ne ba eja, ba enwa, ba nyala, ba nyadisa, ho fihlela tsatsi leo Nowe a keneng arekeng ka lona,

³⁹ mme ba se ke ba tseba ho fihlela moroallo o tla, o ba hohola bohle; ho tla ha Mora motho ho tla ba jwalo.

⁴⁰ Jwale ba babedi ba tla be ba le tshimong; e mong o tla nkwa, e mong a tlohelwe.

⁴¹ Basadi ba babedi ba tla be ba sila lelwaleng; e mong o tla nkwa, e mong a tlohelwe.

⁴² Fadimehang ke hona, hobane ha le tsebe nako eo Morena wa lona a tla tla ka yona.

⁴³ Empa le tsebe sena, hore hoja monga ntlo a ne a tsebile nako eo leshodu le tla tla ka yona, a ka be a lebetse, mme a ka be a sa ka a dumela hore ntlo ya hae e phunngwe.

⁴⁴ Ka baka leo, le lona le itokise, hobane Mora motho o tla tla ka nako eo le sa e nahaneng.

⁴⁵ Ha ho le jwalo, ke ofe mohlanka ya tshepahalang, ya bohlale, eo monga hae a mmeileng moalosi wa ba ntlo ya hae, ho ba nea dijo ka nako e loketseng?

⁴⁶ Ho lehlohonolo mohlanka eo, ha morena wa hae a fihla, a tla mo fumana a etsa jwalo.

⁴⁷ Kannete ke re ho lona: O tla mmea hore a okamele tsohle tsa hae.

⁴⁸ Empa ha mohlanka eo e mobe a ka re pelong ya hae: Monga ka o diehile ho tla;

⁴⁹ Mme o tla qala ho otla bahlanka ka yena, le ho ja, le ho nwa le matahwa;

⁵⁰ Morena wa mohlanka eo o tla tla ka tsatsi leo a sa mo lebellang, le ka hora eo a sa e tsebeng.

⁵¹ O tla mo kgaola dikoto, a mo bee kabelo ya hae le baikaketsi; teng ho tla ba le dillo le ditsikitlano tsa meno.