Mattheu 14 - Baasraak Sotho NT

Mattheu 14

¹ Mehleng eo, morena Heroda a utlwa botumo ba Jesu,

² A re ho bahlanka ba hae: Enwa ke Johanne Mokolobetsi; o tsohile bafung; mme ke ka baka leo mesebetsi e matla e iponahatsang ho yena.

³ Hobane Heroda o ne a ile a tshwara Johanne, a mo tlama, a mo kenya teronkong, ka baka la Herodiase, mosadi wa Filipi, ngwanabo.

⁴ Johanne o ne a re ho yena: Ha o a dumellwa hore o be le yena.

⁵ Eitse ha a rata ho mmolaya, a tshaba letshwele, kahobane le ne le mo nka e le moporofeta.

⁶ Empa ha ho ketekwa letsatsi la tswalo ya Heroda, moradi wa Herodiase a tjeka pela bona, a kgahlisa Heroda.

⁷ Yaba o tshepisa ka kano hore o tla mo nea eng kapa eng eo a tla e kopa.

⁸ Mme yena, a laetswe ke mmae, a re: Mphe mona ka mokeke hlooho ya Johanne Mokolobetsi.

⁹ Kgosi ya swaba, empa ka baka la kano, le ka baka la ba dutseng dijong le yona, ya laela hore a e newe.

¹⁰ Yaba o romela ho kgaola Johanne hlooho teronkong.

¹¹ Hlooho ya hae ya tlisoa ka mokeke, ya newa morwetsana, mme a e isa ho mmae.

¹² Barutuwa ba hae ba tla, ba nka setopo, ba se epela, mme ba ya bolella Jesu.

¹³ Jesu ha a utlwa hoo, a tloha teng ka sekepe, a ya sebakeng se le seng a le mong;

¹⁴ Yare ha Jesu a etswa, a bona letshwelehadi, a le utlwela bohloko, mme a fodisa ba kulang ba lona.

¹⁵ Eitse ha e se e le mantsiboya, barutuwa ba hae ba tla ho yena, ba re: Mona ke nahathothe, mme nako e se e ile; lesa bongata bo tsamaye, ba ye metsaneng, ba ithekele dijo.

¹⁶ Empa Jesu a re ho bona: Ha ho hlokahale hore ba tsamaye; le ba fe dijo.

¹⁷ Ba re ho yena: Ha re na mona, haese mahobe a mahlano feela le dihlapi tse pedi.

¹⁸ A re: Di tliseng kwano ho nna.

¹⁹ Yaba o laela bongata hore bo dule hodima jwang, a nka mahobe a mahlano le dihlapi tse pedi, a lelala lehodimong, a boka, a ngwatha, a nea barutuwa ba hae mahobe, mme barutuwa ba abela matshwele.

²⁰ Ba eja bohle, ba kgora, mme ba nka dingwathwana tse setseng, tsa tlala diroto tse leshome le metso e mmedi.

²¹ Ba jeleng e ne e ka ba banna ba dikete tse hlano, ho sa balwe basadi le bana.

²² Jesu a phakisa a laela barutuwa ba hae hore ba kene sekepaneng, ba mo etelle pele ho ya mose wane, ha yena a ntse a phatlalatsa matshwele.

²³ Eitse hobane a phatlalatse matshwele, a nyolohela thabeng a le mong ho ya rapela;

²⁴ Empa sekepe se ne se se se le hara lewatle, se ntse se tsokotswa ke maqhubu, hobane moya o ne o le qholotsa.

²⁵ Eitse ka tebelo ya bone ya bosiu Jesu a ya ho bona, a tsamaya hodima lewatle.

²⁶ Yare ha barutuwa ba mmona a tsamaya hodima lewatle, ba tshoha, ba re: Ke seriti; mme ba howa ke tshabo.

²⁷ Jesu a phakisa a bua le bona, a re: Betang dipelo; ke nna; se tshoheng.

²⁸ Petrose a mo araba, a re: “Morena, haeba ke wena, ntaele hore ke tle ho wena hodima metsi.

²⁹ A re: Tloo. Yare ha Petrose a theoha sekepeng, a tsamaya hodima metsi, ho ya ho Jesu.

³⁰ Empa ha a bona moya o fokang, a tshoha; mme a qala ho teba, a howa, a re: Morena, mpholose!

³¹ Jesu a phakisa a otlolla letsoho la hae, a mo tshwara, a re ho yena: “Wena ya tumelo e nyenyane, o belaeletse’ng?

³² Eitse ha ba kena sekepeng, moya wa kokobela.

³³ Yaba ba ka sekepeng ba tla, ba mo kgumamela, ba re: Kannete o Mora wa Modimo.

³⁴ Eitse hobane ba tshelele mose wane, ba fihla naheng ya Genesareta.

³⁵ Yare ha banna ba sebaka seo ba mo tseba, ba romela mathoko le naha eo yohle, mme ba tlisa ho yena bohle ba kulang;

³⁶ Ba mo rapela hore ba mpe ba ame qola ya seaparo sa hae feela;