Mareka 3 - Baasraak Sotho NT

Mareka 3

¹ A boela a kena sinagogeng; mme ho ne ho le teng monna ya letsoho le omeletseng.

² Ba mo disa ho bona hore na o tla mo fodisa ka tsatsi la Sabatha; ba tle ba mo qose.

³ A re ho monna ya letsoho le omeletseng: Ema o eme.

⁴ A re ho bona: Hleka ho dumeletswe ho etsa botle ka Sabatha, kapa ho etsa bobe na? Ho pholosa bophelo, kapa ho bolaya? Empa ba kgutsa.

⁵ Yare ha a ba tadima ka nqa tsohle ka kgalefo, a swabiswa ke bothata ba dipelo tsa bona, a re ho monna eo: Otlolla letsoho la hao. A le otlolla, mme letsoho la hae la fola, la ba jwaloka le leng.

⁶ Bafarisi ba tswa, mme hanghang ba rera le balatedi ba Heroda ka yena, hore ba tle ba mmolaye.

⁷ Empa Jesu a tloha le barutuwa ba hae, ba ya lewatleng, mme bongata bo boholo ba batho ba tswang Galelea le Judea ba mo latela.

⁸ le Jerusalema, le Idumea, le mose wane wa Jordane; le mathoko a Tire le Sidone, ha le utlwa tse kgolo tseo a di etsang, la tla ho yena.

⁹ A bolella barutuwa ba hae hore sekepana se mo emele ka baka la bongata, esere ba mo petetsa.

¹⁰ Hobane o ne a fodisitse ba bangata; hoo bohle ba neng ba na le dikotsi ba neng ba mo petetsa hore ba mo ame.

¹¹ Le meya e ditshila, ha e mmona, e ne e itihela fatshe pela hae, e howe, e re: O Mora wa Modimo.

¹² A ba laya haholo hore ba se ke ba mo tsebahatsa.

¹³ Yaba o nyolohela thabeng, a bitsa bao a ba ratileng, mme ba tla ho yena.

¹⁴ A bea ba leshome le metso e mmedi, hore ba be le yena, le hore a tle a ba roma ho bolela.

¹⁵ le ho ba le matla a ho fodisa malwetse, le ho leleka batemona;

¹⁶ Simone a mo reha lebitso la Petrose;

¹⁷ le Jakobo, mora Sebedea, le Johanne, ngwanabo Jakobo; mme a ba rea mabitso a Boanergese, ke ho re, Bara ba seaduma.

¹⁸ le Andrease, le Filipi, le Bartholome, le Mattheu, le Thomase, le Jakobo, mora Alfea, le Thaddea, le Simone wa Mokanana,

¹⁹ le Judase Iskariota, e leng yena ya mo ekang, mme ba kena tlung.

²⁰ Letshwele la boela la bokana, hoo ba neng ba sitwa le ho ja bohobe.

²¹ Yare ha metswalle ya hae e utlwa, ya tswa ho ya mo tshwara; hobane ba ne ba re: O a hlanya.

²² Bangodi ba theohileng Jerusalema ba re: O na le Beelsebule, mme o leleka batemona ka morena wa batemona.

²³ A ba biletsa ho yena, a re ho bona ka ditshwantsho: Satane a ka leleka Satane jwang?

²⁴ Mmuso ha o ikarola ho itwantsha, mmuso oo o ke ke wa tiya.

²⁵ Leha ntlo e ikarola ho itwantsha, ntlo eo e ke ke ya tiya.

²⁶ Le Satane ha a itsohela matla, mme a ikarola, a ke ke a ema, empa o tla fela.

²⁷ Ha ho motho ya ka kenang tlung ya senatla, mme a hapa thepa ya sona, ha a sa ka a tlama monna eo ya matla pele; joale o tla tlatlapa ntlo ea hae.

²⁸ Kannete ke re ho lona: Bana ba batho ba tla tshwarelwa dibe tsohle, le dinyefolo tsohle tseo ba nyefolang ka tsona.

²⁹ Empa ya nyefotseng Moya o Halalelang, a ke ke a tshwarelwa le ka mohla o le mong, empa o molato wa kahlolo e sa feleng.

³⁰ Hobane ba itse: O na le moya o ditshila.

³¹ Yaba banababo le mmae ba tla, ba ema kantle, ba romela ho yena ho mmitsa.

³² Mme bongata bo ne bo dutse bo mo teetse hare, mme ba re ho yena: Mmao le banabeno ba kantle, ba a o batla.

³³ A ba araba, a re: Mme ke bomang, le banabeso ke bomang?

³⁴ Yaba o qamaka ba dutseng ba mo teetse hare, a re: “Mme le banabeso ke bana!

³⁵ Hobane e mong le e mong ya etsang thato ya Modimo, ke yena ngwaneso, le kgaitsedi ya ka, le mme.