Luka 17 - Baasraak Sotho NT

Luka 17

¹ Yaba o re ho barutuwa: Ho ke ke ha etsahala hore dikgopiso di tle; empa ho madimabe eo di tlang ka yena!

² Ho ka bang molemo ho yena ha lelwala le ka fanyehwa molaleng, mme a lahlelwa lewatleng, ho ena le hore a kgopise e mong wa ba banyenyane bana.

³ Le itebele: Ekare ha ngwaneno a o sitelwa, o mo kgalemele; mme ha a baka, o mo tshwarele.

⁴ Ekare ha a ka o sitelwa hasupa ka letsatsi, mme a kgutlela ho wena hasupa, a re: Ke bakile; u mo tšoarele.

⁵ Baapostola ba re ho Morena: Ekeletsa tumelo ya rona.

⁶ Morena a re: Hoja le na le tumelo e ka ka hlaku ya mosetareta, le ne le ka re ho sefate sena sa sikane: Fotholwa, o itlhome lewatleng; ’me e lokela ho u mamela.

⁷ Empa ke ofe ho lona ya nang le mohlanka ya lemang, kapa ya alosang, ya tla re hang ha a etswa masimong a re ho yena: ’Eya o dule, o je?

⁸ Mme a ke ke a re ho yena: Lokisa seo ke tla lalla ka sona, o itlame, mme o ntshebeletse, ke be ke je, ke nwe; mme kamora moo o tla ja, wa nwa?

⁹ Na o tla leboha mohlanka eo, kahobane a entse tseo a di laetsweng na? Ha ke soka.

¹⁰ Ka mokgwa o jwalo le lona, etlare ha le entse tsohle tseo le di laetsweng, le re: Re bahlanka ba se nang thuso;

¹¹ Eitse ha a eya Jerusalema, a feta hara Samaria le Galelea.

¹² Eitse ha a kena motsaneng o mong, a kgahlana le banna ba leshome ba lepera, ba eme hojana.

¹³ Ba phahamisa mantswe, ba re: Jesu, Monghadi, re hauhele!

¹⁴ Yare ha a ba bona, a re ho bona: Eyang, le itlhahise ho baprista. Ya re ba ntse ba tsamaya, ba ntlafala.

¹⁵ E mong wa bona, ha a bona hore o fodile, a kgutla, a tlotlisa Modimo ka lentswe le phahameng.

¹⁶ A itihela fatshe ka sefahleho maotong a hae, a mo leboha; mme e ne e le Mosamaria.

¹⁷ Jesu a araba, a re: Na ha ho a hlwekiswa ba leshome na? empa ba robong ba kae?

¹⁸ Ha ho a fumanwa ba kgutletse ho tlotlisa Modimo, haese moditjhaba enwa.

¹⁹ A re ho yena: Ema, o ikele; tumelo ya hao e o fodisitse.

²⁰ Eitse ha a botswa ke Bafarisi, hore na mmuso wa Modimo o tla tla neng, a ba araba, a re: Mmuso wa Modimo ha o tle ka ponahatso;

²¹ Hape ba ke ke ba re: Bonang mona! kapa, bona mane! hobane, bonang, mmuso wa Modimo o hara lona.

²² A re ho barutuwa: Ho tla matsatsi ao ka wona le tla lakatsa ho bona le leng la matsatsi a Mora motho, mme le ke ke la le bona.

²³ Mme ba tla re ho lona: Bonang mona; kapa, bona moo: le se ke la ba sala morao, leha e le ho ba latela.

²⁴ Hobane jwaloka lehadima, le hadima ho tloha karolong e nngwe e tlasa lehodimo, le benya ho isa karolong e nngwe tlasa lehodimo; Mora motho le yena o tla ba jwalo mehleng ya hae.

²⁵ Empa e ka kgona a utlwiswe bohloko bo boholo pele, mme a lahlwe ke moloko ona.

²⁶ Jwalokaha ho bile mehleng ya Noe, ho tla ba jwalo le mehleng ya Mora motho.

²⁷ Ba ne ba eja, ba enwa, ba nyala, ba nyadisa, ho fihlela letsatsi leo Nowe a keneng arekeng ka lona, mme morwallo wa tla, wa ba timetsa bohle.

²⁸ Ho bile jwalo le mehleng ya Lota; ba ne ba ja, ba enwa, ba reka, ba rekisa, ba lema, ba haha;

²⁹ Empa letsatsing leo Lota a tsoileng Sodoma ka lona ho ile ha na mollo le sebabole ho tsoa leholimong, ’me tsa ba timetsa kaofela.

³⁰ Ho tla ba jwalo ka letsatsi leo Mora motho a tla senolwa ka lona.

³¹ Ka tsatsi leo, ya tla beng a le hodima ntlo, mme thepa ya hae e le ka tlung, a se ke a theoha ho ya e nka; le ya leng tshimong, le yena a se ke a kgutlela morao.

³² Hopolang mosali oa Lota.

³³ E mong le e mong ya batlang ho pholosa bophelo ba hae, o tla timellwa ke bona; mme e mong le e mong ya lahlehelwang ke bophelo ba hae, o tla bo boloka.

³⁴ Ke a le bolella, ka bosiu boo, banna ba babedi ba tla be ba le betheng e le nngwe; e mong o tla nkwa, e mong a tlohelwe.

³⁵ Basali ba babeli ba tla be ba sila hammoho; e mong o tla nkwa, e mong a tlohelwe.

³⁶ Banna ba babedi ba tla be ba le naheng; e mong o tla nkwa, e mong a tlohelwe.

³⁷ Ba araba, ba re ho yena: Ho kae, Morena? A re ho bona: Moo setopo se leng teng, ke moo manong a tla bokana teng.