तीतुस 3 - सोरियाली नय्या नियम

मसीह चाल-चलन

¹ विश्वासी लोगून याद दिलो, कि शासकून और अधिकारीन को आदर करून, और उनेरि हुकुम माना और दुसारान खिन हरेक भल कामून खिन तैयार रौ।

² कैकी बदनामी जन कर, झगड़ालू नै हो, और शान्त आदत को हो, और सब लोगून का दगाड़ भौत दयालु बनभेरन रौ।

³ क्याखिनकि हम सब विश्वास में उन है पैलि मूर्ख और परमेश्वरा का हुकमून नै मानूनवाला छ्या, और लोगून थैं भटे ध्वाका खान वाला छ्या, और हम बुरी इच्छा और संसारा का चीजून का गुलाम छ्या, जसीकैं बैर-भाव और डाह करून में जीवन जी छ्या, और लोगून थैं नफरत करछ्या, और एक दुसारा भटे बैर राख छ्या।

⁴ लेकिन फिरले हमार मुक्तिदाता परमेश्वर ले अपूनी दया और प्रेम हम लोगून में दिखाछ,

⁵ उनूनले हमून पापून का सजा भटे छुड़ाछ, यो हमार द्वारा करिना का भल कामून का कारण नै जो हमूले कर्यान, उले अपूनी दया का अनुसार, हमार पापून धोभेरन दूर कर्यान। और पवित्र आत्माक द्वारा हमून नय्या स्वभाव और नय्या जीवन दीछ।

⁶ हमोरो मुक्तिदाता यीशु मसीहा ले जो उक द्वारा परमेश्वर ले पवित्र आत्मा दी रैछ, ताकि उ हमूथैं सामर्थ का काम करा सको।

⁷ जैले हम उ अनन्त जीवन स पाना की आश राखभेरन जो परमेश्वर ले हमून अपूनी संतान का रूप दीना को वादा करछ्य। और येका बारिमें हम जाण सकनू क्याखिनकि परमेश्वर ले अपून अनुग्रह का द्वारा हमून अपून दगाड़ सही ठैहराछ।

⁸ यो बात हर तरीका ले मानून लायक छै, जो मैंले तैंस बतायान और मैं चाछूँ कि तैं विश्वासीन इन बातूना का बारिमें मजबूती ले सिखौ। येक कारण कि जिनूनले परमेश्वर में विश्वास करछ्य, उन भल काम करून खिन अपूनो बखत दीन खिन ध्यान लगून। यो बात सबून खिन निकी और फैदा की छै।

झगड़ान है बचा

⁹ लेकिन बेकारा बहसून है दूर रौ। वंशावालिन की सूची में अपूनो बखत खराब जन करा, बैर-भाव और बिरोध, और उन झगड़ान है जो मूसा का नियम-कानून का बारिमें हुनान, उनून है बचभेरन रौ, क्याखिनकि उन बातुन को कोई फैदा नाहातिन और नै कैकी मद्दत कर सकछी।

¹⁰ तैंस कम है कम द्वी बार उन लोगून चेतावनी दीन चैछी जो विश्वासीन की मण्डली में फुट डालनान, कि उन इसो करून बन्द करून। दुसारा बार चेतावनी दीन का बाद उनून है कोई सम्बन्ध जन राँखा।

¹¹ तैं यो पक्का जाण ले इसा लोग जो जान बुझ भेरन पाप करनान, उन जाणनान कि उन बुर काम करून मर्यान और उ ऊस लगातार करनै रूनान।

आखरी हुकुम और नमस्कार

¹² जब मैं त्यारा पास क्रेते टापू में अरतियास और तुखिकुस विश्वासी भाईन भेजूलो, त म्यारा पास निकोपुलिस शैहर में उनाकी कोशिश करे, क्याखिनकि मैंले वाँई जाड़ान का मौसम में रूना को फैसाला करछ्य।

¹³ जब जेनास वकील और अपुल्लोसे स अपूनी यात्रा खिन निको रियान, तैं उनेरि मद्दत खिन जैले कर सकछ्य, उनून खिन करे। यो ध्यान राखे उनून के बात की कमी नै हो।

¹⁴ सिर्फ इतुकैं नै तैंस विश्वासीन सिखूनै रून चैंछो कि भल काम करून खिन लगातार मेहनत करनै रून ताकि उन लोगून की जरूरत पुरी हो सकौ। और यो विश्वासीन की मद्दत करोलो कि उन एक मक्शद का दगाड़ जीवन जी सकून।

¹⁵ म्यारा दगाड़ याँ का सब विश्वासी तैंस नमस्कार करनान। वाँ क्रेते में हमार दगाड़ विश्वासीन जो हमून प्रेम करनान, उनूनले म्यारा तरफ भटे नमस्कार कये। मैं प्रार्थना करछूँ कि तुम सबून में प्रभु अनुग्रह करो।