तीतुस 2 - सोरियाली नय्या नियम

सच्ची शिक्षा को पालन

¹ लेकिन तीतुस तैखिन यो ठीक छै कि तैंस विश्वासीन सिर्फ उई सिखून चैछो जो यीशु मसीह की सच्ची शिक्षा छै।

² बुढ़ा लोगून अपून आप में काबू राखून, और इसो तरीका को ब्यवहार करून ताकि लोग उनोरो आदर करून, और समझदारी ले जीन सिखौ। और उनून विश्वास में मजबूत हुन चैछो और दुसरान का दगाड़ प्रेम करून चैछो और सहन करूना की शक्ति हुन चैछी।

³ उसीकैं बुढ़ी स्यैनिन को ले इसीकैं ब्यवहार करून चैछो जो हर बात में परमेश्वरो को आदर दीन वाली। और केमें दोष लगून वाली और मदिरा पिन वाली नै हुन चैछी, बल्कि निकी बात सिखून वाली हो

⁴ ताकि उन जवान स्यैनिन खिन एक उदारण बन सकून। और यो ले सिखा सकून कि अपून घरवाला का और नान्तिनान का दगाड़ कसो प्रेम करून चैछो।

⁵ जवान स्यैनिन अपून आप में काबू राखून वाली, और अपून घरवाला का दगाड़ वफादार रौ और अपूनो घर स सभालून वाली और अपून-अपून घरवालान का अधीन रून वाली हो, ताकि परमेश्वर बचन की निन्दा नै पौ।

⁶ इसोई जवान आदिमीन ले समझदारी ले ब्यवहार करून खिन मजबूत करनै रौ कि उन ले अपून आप में काबू करूनवाला हुन।

⁷ तैंस हमेशा भल काम करून चैछो, ताकि तैं दुसारा लोगून खिन उदारण बनौ। जब तैं विश्वासीन परमेश्वरा का बारिमें सिखूछै, त तैंस निका इरादा ले सिखून चैछो, जैले लोग तेरो आदर कर सकून।

⁸ और तैंस सिखून चैछो जो सही छै, ताकि कोई ले तैमें दोष नै लागा सको, जैले त्यारा बिरोधीन शर्मिन्दा हुन क्याखिनकि उ शिक्षा में कोई बुरी बात नाहातिन, जैले कि उ त्यारा खिलाफ के कै सकून।

⁹ अपून विश्वासीन की मण्डली में दासून सिखौ कि उन हमेशा अपून मालिकून को हुकमो को पालन करून। उनून ऊसो करून खिन जेले उनार मालिक खुश रून, और उन उनार काम का बारिमें शिकायत नै करून।

¹⁰ चोरी-चालाकी जन करून; बल्कि उन साबित करून की उन हमेशा ईमानदार छन, ताकि लोग उनार निका ब्यवहार में ध्यान दीन और जो कुछ ले उन करनान उन लोगून का द्वारा हमार मुक्तिदाता परमेश्वरा का बारिमें संदेश सुणून को कारण बना।

¹¹ उन विश्वासीन इसीकैं सिखौ, किलैंकी परमेश्वर ले सब लोगून को पाप भटे उद्धार को बाटो दिखाभेरन अपूनो अनुग्रह उनूनमें करछ्य।

¹² यो अनुग्रह का कारण परमेश्वर हमून सिखूछो, कि हम उ स्वभाव स छोड़ून सिखा, जो परमेश्वरो को अपमान करछो और उन चीजून की इच्छा स ले छोड़ून चैंछो, जिनरी इच्छा अविश्वासी करनान। और जब कि हम यो संसार में छा त बुद्धिमानी ले और धार्मिकता का दगाड़ इसा तरीका जीवन जीया जैले परमेश्वर खुश हुछो।

¹³ हम इसीकैं ब्यवहार करनू जब हम उ दिनो को इन्तजार करूनमर्यान, जैकी हमून आश छै, उ दीन जब यीशु मसीह, जो हमोरो महान परमेश्वर मुक्तिदाता छै, अपूनी पुरी महिमा का दगाड़ संसार में वापस आलो।

¹⁴ यीशु मसीह ले अपून आपस हमून खिन सूली में बलिदान कर दीछ ताकि हमून हर प्रकार का बुराई भटे छुड़ा ले और हमून पापून भटे आजाद करभेरन अपून खिन एक इसी प्रजा बना ले जो भल काम करून खिन पुर जोश दगाड़ तैयार रौ।

¹⁵ येक कारण तीतुस मैं चाछूँ कि तैं क्रेते का विश्वासीन यो बातुन सिखौ जो मैंले तैंस बताईना का छन। अपून लोगून मजबूत कर और जाँ जरूरी हो, वाँ उनूनमें सुधार कर, तैंस इसो करून में म्यारा तरफ भटे पुरो अधिकार छै, कोई ले तेरो निरादर नी कर सकोलो।