तीतुस 1 - सोरियाली नय्या नियम

स्वागत

¹ यो चिठ्ठी पौलुसाक तरफ भटे छै। मैं परमेश्वरो को दास और यीशु मसीह को प्रेरित छूँ। मैंस परमेश्वरा का चुनिना का लोगून को विश्वास मजबूत करून और उनेरि मद्दत करून खिन चुन रैछ, ताकि उन उ सच्चाई जाणभेरन इसो जीवन जियून, जैले परमेश्वर स आदर मिलछो।

² येक कारण उन परमेश्वरा का दगाड़ हमेशा खिन रून की आश करनान, क्याखिनकि परमेश्वर जो कभै झूठ नै बोलूनो, उले संसारा बनून है पैलि वादा करिना को छ्यो कि उक लोग हमेशा खिन ज्यूना रौला।

³ और अब बिल्कुल ठीक बखत में परमेश्वर ले यो सुसमाचार स हमार सामुनि प्रगट करछ्य, और हम येको प्रचार सबून का बीच करनू। हमार मुक्तिदाता परमेश्वर ले यो हुकुम दीभेरन मैंस जिमेदारी दी रैछ, कि उखिन यो काम करू।

⁴ मैं यो चिठ्ठी तीतुस खिन लिखूनमरयूँ। तैं म्यारा च्याला नियाती छै क्याखिनकि तैले मसीह में विश्वास करछै जसीकैं मैं करछूँ। मैं प्रार्थना करछूँ कि पिता परमेश्वर और हमोरो मुक्तिदाता यीशु मसीह तैंस अनुग्रह और दया, और शान्ति दीनै रून।

क्रेते में तीतुस को काम

⁵ मैं तुमून क्रेते टापू येक कारण छोड़ आईना को छूँ, कि तुम वाँ का कामून की पुरी ब्यवस्था करा ताकि हर नगर में म्यारा हुकुम का अनुसार इसा अगुवान चुना,

⁶ जो निर्दोष, और अपून घरवाली का प्रति वफादार, और जिनारा बच्चाले विश्वासी हुन, और उन शरीराक इच्छान में चलूनवाला नै हुन, और ईजा-बबा को आदर करूनवाला हुन।

⁷ क्याखिनकि अगुवान परमेश्वरा का मुन्सी हुना का कारण निर्दोष हुन चैछो; नै जिद्दी, नै क्रोधी, नै पियक्कड़, नै मारपीट करनवालो, और नै नीच कमाईको लालची हो।

⁸ और घर में आईना का मेहमानून की इज्जत करून वालो, दुसारा लोगून खिन भलाई करून वालो, हर हालात में अपून में काबू राखून वालो, सच्चो न्याय करून वालो, धर्मी, और पवित्र जीवन जीन वालो, अपूनी इच्छान में काबू करून वालो हुन चैछो।

⁹ ऊस यीशु मसीह का बचनून में मजबूती ले विश्वास करून चैछो जो हमूले ऊस सिखाईना को छ्यो। ताकि उ दुसरान सही शिक्षा मानून खिन हिम्मत दी सकून, और दुसरान का गलतिन ठीक कर सकून।

¹⁰ मैं यो येक कारण कुछूँ, क्याखिनकि भौत लोग सही शिक्षा को बिरोध करनान, उन जो बक-बक करनान और दुसरान ध्वाका दीन सिखूनान। खास करभेरन उन यहूदीन का बारिमें जो सच्ची में विश्वासी बन ग्यान।

¹¹ इसा लोगून विश्वासीन सिखूना को हुकुम जन दीये, क्याखिनकि जब उन इन बातुन सिखूनान जो उनून सिखूनी चैछी, त उन पुर परिवारो को विश्वास नाश कर द्याल। उन इसो येक कारण करनान ताकि धन कमा सकून।

¹² क्रेते टापू में एक आदिमी ले जैस उन बुद्धिमान आदिमी माननान, उ कुंछो कि क्रेते का लोग हमेशा झूठ बोलनान और जानवरून की नियाती ब्‍यवहार करनान। उन आलसी और हमेशा भौत ज्यादा खानो खानान।

¹³ और क्रेते का लोगून का बारिमें यो बात अब ले सच्ची छै। येक कारण उनून कड़ी चेतावनी दीनै रौ, ताकि उ यीशु मसीह की सच्ची शिक्षा में विश्वास करून।

¹⁴ तुम यहूदीन की झूठ्ठी कथा-कहानीन और उन लोगून का हुकुमन को पालन जन कर्या, जो सच्चाई भटे भटक ग्यान।

¹⁵ उन लोगून खिन जिनारा मन में बुरा बिचार नाहातिन, सब चीज नियम का अनुसार शुद्ध छन, लेकिन उन लोगून खिन जो बुरा छन जो यीशु मसीह में विश्वास नै करना, जो कुछ ले उन करनान उ ठीक नै करूना

¹⁶ उन झूठ्ठी शिक्षा दीन वाला कुंनान कि हम परमेश्वर स जाणनू, लेकिन उन अपून काम ले दिखूनान कि उन जाणना। क्याखिनकि उन नफरत ले भरिना का छन और हुकुम नै मानून वाला छन और उन कोई ले भल काम करून योग्य नाहातिन।