रोमियून 3 - सोरियाली नय्या नियम

¹ त कोई कि कै सकछो, अगर खतना हुना ले परमेश्वर हम यहूदीन नै अपनूनो, त यहूदी हुन में गैर-यहूदी हुन है कोई फैद नाहातिन।

² होई एक यहूदी हुन में भौत फैद छै। सबून जरूरी है पैलि त यो की यहूदी लोगून मूसा और परमेश्वरा का संदेश दिनवाला लोगून को लेख दी ग्योछ।

³ अगर कुछ यहूदी लोगून ले परमेश्वर में विश्वास नै कर्यो त की भ्यो, त क्या येको मतलब यो छी की परमेश्वर उनार दगाड़ करिनाको अपूनो वादान पुरो करून में अविश्वासयोग्य होला?

⁴ नै! बिल्कुल ले नै। लेकिन परमेश्वर हमेशा सच्ची कुंछूँ, और हरेक आदिमी झूठ्ठो साबित हो, जसो पवित्रशास्त्र में लिखीना को छै; “जेलै तैं अपून बातुन में धर्मी ठहरलै और न्याय करून बखत तैं जीत पालै।”

⁵ अगर हमार बुर काम परमेश्वर की धार्मिकता ठैरा दीछी, तो हम कि कुंनू? क्या उ जो परमेश्वर क्रोध करछो और हमून सजा दीनो गलत छी? यो त मैं आदिमी का नजरिया ले कुनमर्यू।

⁶ कभै नै, अगर परमेश्वर यहूदी लोगूनको न्याय सही तरीका ले नै करना त उन दुसारा लोगूनको न्याय कसकै कर सकनान?

⁷ कोई के सकछो, कि परमेश्वर म्योरो न्याय कसकै कर सकछो और मैंस पापी ठैहरा सकछो जब कि म्योरो झूठ उकी सच्चाई स बढ़ावा दीछो और ऊस ज्यादा महिमा मिलछी।

⁸ “हिटा, हम बुर काम करा कि येले थ्वाड़ा भल हो जौ।” जसिकै थ्वाड़ा लोग हमरि निन्दा करभेरन हमून में यो दोष लगूनान, और कुछ लोग कुंनान की हमून योई सिखूनान। लेकिन जो म्यारा बारिमें इसी बात कुंनान उन सजा का हकदार छन।

कोई धर्मी नाहातिन

⁹ त, कि हम यहूदी लोग दुसरान है निकी हालत में छाई? नै! बिलकुल नै। क्याखिनकि हम यहूदी और गैर-यहूदी लोग द्वीवैन में दोष लगा चुक गया कि सब लोग पाप का बश में छन।

¹⁰ जसो पवित्रशास्त्र में लिखीनाको छै, “परमेश्वरा का सामुनि कोई ले धर्मी नाहातिन, एक ले नै।

¹¹ एक ले इन्सान नै जो सच्ची में समझ सको सही कि छै, और कोई परमेश्वरा का बारिमें जाणून नै चांनो।

¹² सब परमेश्वर भटे दूर हो ग्यान और सबा का सब परमेश्वरा का कामून खिन निकम्मा बन ग्यान; और भलाई करून वालो कोई ले नाहातिन, एक ले नाहातिन।

¹³ उनोरो मुँख खुलीना की कबर की जसी छै, जैमें भटे वास उछी और उनेरि बातचीत गंदा छन। और उनोरो जिबोड़ो झूठ ले भरिना को छै। उनार बात स्यापाक जहरा का नियाती छन।

¹⁴ उनार बातुन में श्राप और कड़वाहट भरिना की छै।

¹⁵ और चोट पुजून में और मारून खिन भौत फुर्तीला छन।

¹⁶ उन जाँ ले जानान वाँ विनाश छै और मुसीबत लीभेरन उनान।

¹⁷ उन दुसरा लोगून का दगाड़ शान्ति ले रून खिन नै जाना।

¹⁸ उनूनमें परमेश्वरोको डर छैई नै।”

¹⁹ हम जाणनू कि नियम-कानून जै केले कूछो उनूनथैं कुंछो, जो नियम-कानून का अधीन छन; ताकि लोगून बाहान बनूना को मौक नै मिलो, और संसाराक सब लोग परमेश्वरा का सामुनि दोषी छन।

²⁰ किलैंकी मूसा नियम-कानून मानना का द्वारा कोई ले आदिमी परमेश्वरा का सामुनि धर्मी नी ठैहरोलो, किलैंकी नियम-कानून हमून साफ-साफ बता दीनान की हम पापी छा।

विश्वास का द्वारा धार्मिकता

²¹ लेकिन अब सब नियम-कानून को पालन करिनाका बिना परमेश्वरे ले हमून धर्मी ठैहराछ, जैका बारिमें मूसा का नियम-कानून और परमेश्वरो को संदेश दिनवालान की किताबून में भौत पैलि लिखीनाको छै, कि हम परमेश्वरा का दगाड़ धर्मी कसकै बन सकनू।

²² हम परमेश्वरा का दगाड़ तब धर्मी बन सकनू जब हम यीशु मसीह में विश्वास करनू। किलैंकी परमेश्वर सबून का दगाड़ एक जसो बर्ताव करनान।

²³ येक कारण सबून ले पाप करछ्य और उ महिमा तक नै पुजी सक्या जो परमेश्वर दीछो।

²⁴ लेकिन परमेश्वरा का अनुग्रह ले यीशु मसीहा का द्वारा हमार पापून की सजा भटे बचिया, और हमार के करि बिना परमेश्वर घोषित करछो की हम धर्मी छै।

^25-26 परमेश्वरे ले यीशु मसीह स हमून खिन सूली में बलिदान हुन खिन भेजछै, और मसीह ले अपूनो बलिदान येक कारण दीछ ताकि उमें विश्वास करभेरन हम परमेश्वरा नजिक आ सकां। भौत पैलि परमेश्वरे ले यो बतून खिन करछै की उ धीरज राखून में और पापिन माफ करून में सही छ्यो। येले यो ले पत्तो हुछो की परमेश्वर सही छै, जब मसीह में विश्वास करून वालान धर्मी ग्रहण करछो।

²⁷ त क्या कोई इसी चीज छी जैक बारिमें हम घमण्ड कर सकनू? उ खिन कोई मौका न्हैतिन। को नियमून का कारण ले? यो येक कारण छै किलैंकी हम नियम-कानून को पालन करनू? नै, लेकिन यीशु मसीह में विश्वास करना का कारण ले।

²⁸ येक कारण हम जाणनू की हम मसीह में विश्वास करना का द्वारा धर्मी ठैहरनू नै की मूसा का नियम-कानून मानना का द्वारा।

²⁹ क्या परमेश्वर केवल यहूदीन को परमेश्वर छी? क्या उ गैर-यहूदीन को परमेश्वर नाहतिनी? उ जरूर गैर-यहूदीन को ले परमेश्वर छै।

³⁰ क्याखिनकि एक्कै परमेश्वर छै, जो खतना करिना वालान और बिना खतना करिना वालान विश्वासा का द्वारा धर्मी ठैहरालो।

³¹ त क्या हम नियम-कानून विश्वासा का द्वारा बेकार समझनू? नै! बिलकुल नै। किलैंकी विश्वासा का द्वारा हम मूसा का नियम-कानून स पुरो करनू।